قازاقستان رەسپۋبليكاسى پارلامەنتى سەناتىنىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتورايىمى داريعا نازاربايەۆا ق ر سىرتقى ىستەر مينيسترلىگى قىزمەتىنىڭ ماسەلەلەرى بويىنشا قوعامدىق كەڭەستىڭ جاڭا ءتورايىمى بولىپ سايلاندى، دەپ حابارلايدى Qamshy.kz اقپارات اگەنتتىگى ق ر ءسىم باسپا ءسوز قىزمەتىنە سىلتەمە جاساپ.

كەڭەستىڭ كەزەكتى وتىرىسى 15 قاراشادا سىم-دە ءوتتى. د. نازاربايەۆا وسى لاۋازىمدا پارلامەنت سەناتىنىڭ دەپۋتاتى ءبىرعانىم ءايتىموۆانى اۋىستىرىپ، ءايتىموۆاعا كەڭەستى باسقارا وتىرىپ اتقارعان جۇمىسى ءۇشىن العىس ءبىلدىردى.

ءوزىنىڭ كىرىسپە سوزىندە د. نازاربايەۆا وسى سالاداعى زاماناۋي تالاپتار مەن جاھاندىق ترەندتەرگە جاۋاپ بەرەتىن سىرتقى ساياسي ۆەدومستۆو مەن ازاماتتىق قوعامنىڭ تىكەلەي بايلانىسىن قامتاماسىز ەتۋ قوعامدىق كەڭەستىڭ باستى مىندەتى بولىپ قالاتىنىن اتاپ ءوتتى.

كۇن تارتىبىنە سايكەس، سىرتقى ىستەر ءمينيسترى قايرات ءابدىراحمانوۆ بۇۇ باس اسسامبلەياسىنىڭ 72ء-شى سەسسياسىنا قازاقستاندىق دەلەگاسيانىڭ قاتىسۋ ناتيجەلەرىن، سونداي-اق قازاقستاننىڭ بۇۇ قاۋىپسىزدىك كەڭەسىندەگى مۇشەلىگى باسىمدىقتارى جونىندە تولىق بايانداپ بەردى.

مينيسترلىك بەيبىتشىلىك پەن قاۋىپسىزدىكتى قولداۋ جونىندەگى جاھاندىق ۇيىمداعى ءوزىنىڭ قىزمەتىندە وسى جىلدىڭ قاڭتار ايىندا بۇۇ قك-نىڭ اشىق پىكىرتالاستارىندا ايتىلعان پرەزيدەنت ن.ءا.نازاربايەۆتىڭ «ءقاۋىپسىز، ءادىل جانە گۇلدەنگەن الەم قۇرۋ ءۇشىن جاھاندىق ارىپتەستىكتى نىعايتۋعا قازاقستاندىق تۇجىرىمدامالىق كوزقاراسى» اتتى ارنايى ساياسي ۇندەۋىنىڭ نەگىزگى قاعيدالارىن باسشىلىققا الادى.

«قازاقستان ءوزىنىڭ قاۋىپسىزدىك كەڭەسىندەگى مۇشەلىگىن، ۇلتتىق مۇددەلەرىمىزدى ىلگەرىلەتۋ ءۇشىن، ەڭ باستىسى، بۇۇ تاريحىندا قاۋىپسىزدىك كەڭەسىندە تۇڭعىش رەت ۇسىنىلىپ وتىرعان ورتالىق ازيادا تۇراقتىلىق پەن قاۋىپسىزدىكتى نىعايتۋ ءۇشىن پايدالانۋدا»، - دەپ حابارلادى ق.ءابدىراحمانوۆ.

ۆەدومستۆو باسشىسى باستى تاقىرىپتارى ورتالىق ازيا جانە اۋعانستان بويىنشا قاراردى ىلگەرىلەتۋ، سونداي-اق تەرروريزمگە قارسى ءىس-قيمىل ماسەلەلەرى بولىپ تابىلاتىن 2018 جىلدىڭ قاڭتارداعى بۇۇ قك-دەگى قازاقستان ءتوراعالىعىنا دايىندىعى تۋرالى حابارلادى.

سونىمەن قاتار، وتىرىس بارىسىندا كەڭەستىڭ باستى باعىتتارى بويىنشا جۇمىس ناتيجەلەرى تۋرالى ەسەپتەر تىڭدالدى. اتاپ ايتقاندا، «قازاقستاننىڭ ينتەرنەت قاۋىمداستىعى» زتب پرەزيدەنتى شاۆكات سابيروۆ ءوزىنىڭ سوزىندە قوعامدىق كەڭەس جۇمىسىنىڭ اقپاراتتىق-يميدجدىك باعىتى بويىنشا ناتيجەلەرىن بايانداپ بەردى.

ءسىم سىرتقى ساياسي تالداۋ مەن بولجامداۋ دەپارتامەنتىنىڭ ديرەكتورى ءالىم قيرابايەۆ جانە ق ر پرەزيدەنتى جانىنداعى قازاقستاندىق ستراتەگيالىق زەرتتەۋلەر ينستيتۋتىنىڭ ديرەكتورى زارەما شاۋكەنوۆا جۇمىستىڭ تالدامالىق-ساراپتاۋ جاعىن ىسكە اسىرۋ ناتيجەلەرى بويىنشا باياندادى. قازاقستان رەسپۋبليكاسىنىڭ 2014-2020 جىلدارعا ارنالعان سىرتقى ساياسي تۇجىرىمداماسىنىڭ قولدانىلۋ مەرزىمى 2019 جىلى اياقتالاتىنى ايتىلدى. وسىعان بايلانىستى ق ر ءسىم مەن قسزي ساراپتاما قوعامداستىقپەن بىرگە سىرتقى ساياساتتىڭ جاڭا تۇجىرىمداماسىن جاساۋعا كىرىستى. وتىرىس قاتىسۋشىلارىنىڭ ورتاق پىكىرىنشە، حالىقارالىق ۇدەرىستەردىڭ بۇرىن بولماعان تۋربۋلەنتتىلىگى مەن جوعارى سەرپىنىنە بايلانىستى قۇجاتتىڭ جاڭا رەداكسياسىندا قازاقستاندىق سىرتقى ساياساتىنىڭ كەيبىر باعىتتارىنىڭ بەيىمدەلۋى تالاپ ەتىلەدى. قۇجاتتىڭ مازمۇنىن ساپالى تەكسەرىستەن وتكىزىلگەنى، ال نەگىزگى تارماقتارى جانە تاراۋلارى باستى الەمدىك جانە ايماقتىق ترەندتەرىنە سايكەس بولۋى ءتيىس.

«قازاقستاندىق ديپلوماتتاردىڭ بىرلەستىگى» رقب مۇشەسى بولات نۇرعالييەۆ «سىرتقى ساياسي قىزمەتىندەگى شىعىندارىنىڭ ۇنەمدەۋ رەزەرۆتەرى تۋرالى» تاقىرىبىنا بايانداما جاسادى. ءىس-شارا بارىسىندا، «قازگزۋ ۋنيۆەرسيتەتى» اق-نىڭ حالىقارالىق قۇقىق ورتالىعىنىڭ قىزمەتكەرى مەن وقىتۋشىسى ليليا ىسپەنبەتوۆا «حالىقارالىق قۇقىق ورتالىعى مەن قوعامدىق كەڭەسى ىنتىماقتاستىعىنىڭ نەگىزگى باعىتتارىن ىسكە اسىرۋ» تاقىرىبىنا بايانداماسىن ۇسىندى. اتالعان ءوزارا ءىس-قيمىل ءۇ.ج. قاڭتارداعى سوڭعى وتىرىس بارىسىندا قول قويىلعان ق ر ءسىم جانە «كازگيۋۋ ۋنيۆەرسيتەتى» اق اراسىنداعى ىنتىماقتاستىق تۋرالى مەموراندۋمىن ىسكە اسىرۋ شەڭبەرىندە جۇرگىزىلەدى.

بيىل 25-جىلدىعى اتاپ وتىلەتىن قازاقستان رەسپۋبليكاسى ديپلوماتيالىق قىزمەتىنىڭ نىعايتۋى مەن دامۋىنا قوسقان ۇلەسى ءۇشىن د.نازاربايەۆاعا ءتيىستى مەرەيتويلىق مەدال تابىس ەتىلدى.

قوعامدىق كەڭەستىڭ ق ر ءسىم قىزمەتىنىڭ ماسەلەلەرى جونىندەگى كەزەكتى وتىرىسى 2018 جىلدىڭ كوكتەمىنە جوسپارلاندى.