رەسەيلىك بلوگەر نيكولاي پودوسكورسكيي عىلىمي زەرتتەۋلەرمەن ءبولىستى. وندا ءدىني وتباسىنان شىققان بالالاردىڭ وزدەرىمەن قۇرداس اتەيستەرگە قاراعاندا قاتىگەزدەۋ كەلەتىنى دالەلدەنگەن. عىلىمي زەرتتەۋ ءادىسى تومەندەگىدەي.

بۇرىندارى پسيحولوگتار سەنىمدى تىلسىم ويلاردىڭ ءبىر ءتۇرى دەپ كورسەتكەن. بۇگىندە ءدىن دارەجەسى ادام تاربيەلەنەتىن مادەني ورتاعا بايلانىستى دەپ دالەلدەيدى. بىرنەشە جىل بۇرىن چيكاگو ۋنيۆەرسيتەتىنىڭ عالىمدارى عىلىمي تاجىريبە جۇرگىزگەن. تاجىريبە بارىسىندا التى مەملەكەتتىڭ – كانادا، جۇڭگو، يوردانيا، وڭتۇستىك افريكا، تۇركيا جانە اقش ەلدەرىنىڭ 5 جاستان 12 جاسقا دەيىنگى مىڭداعان بالالارىن تەكسەردى.

قاتىسۋشىلارعا ەڭ الدىمەن قامقورلىق پەن مەيىرىمدىلىك باعالاناتىن «ديكتاتور» پسيحولوگيالىق ويىنىن ويناتادى. بالالارعا ون جاپسىرما قاعازىن تاراتىپ، ءوزى تانىمايتىن بالالارمەن ءبولىسۋى ءتيىس ەكەنى ايتىلادى. كەلەسى تاپسىرمادا بالالاردىڭ ايىپتاۋشىلىعى مەن جاناشىرلىعى باعالاناتىن قىسقا مەتراجدى مۋلتفيلمدەر كورسەتىلدى، وندا ءبىر كەيىپكەر ەكىنشى كەيىپكەردى ادەيى نەمەسە بايقاۋسىزدا يتەرىپ جىبەرەدى.

انكەتانى قاتىسۋشىلاردىڭ اتا-انالارى دا تولتىردى. ولار وتباسىنداعى سەنىم مەن دىنگە دەگەن كوزقاراستارىن، مورال مەن ادىلدىك تۋرالى تۇسىنىكتەرىن جازدى.

تاجىريبە بارىسىندا ءدىني وتباسىنان شىققان بالالار ساراڭدىق تانىتقان، وزدەرىنە تاراتقان جاپسىرمالاردى وزگە بالالارعا بەرمەي، ولاردىڭ ىس-ارەكەتتەرىن ايىپتاي باستايدى. جانە سول بالالاردىڭ جازالاۋىن تالاپ ەتكەن، دەپ جازادى زەرتتەۋ اۆتورلارى.

«بۇدان شىعاتىن قورىتىندى – ءدىنشىل وتباسىنان شىققان بالالار مەيىرىمدى بولادى دەگەن تۇسىنىك جوققا شىعىپ وتىر. ءبىزدىڭ تاجىريبە بويىنشا ءدىنشىل ەمەس ءارى اتەيستەر وتباسىندا تاربيەلەنگەن بالالار جاناشىر بولىپ شىقتى»، - دەدى زەرتتەۋ اۆتورلارىنىڭ ءبىرى جان دەسەتي.

سونداي-اق «ءدىنشىل اتا-انالار بالالارىن مەيىرىمدىلىككە، ادىلدىك پەن ادالدىققا ۇيرەتەدى، الايدا بالالاردان مۇنداي قاسيەتتەر بايقالمايدى، - دەپ قورىتىندىلادى زەرتتەۋ تاجىريبەسىنىڭ ناتيجەسىن.