حابار-وشارسىز كەتكەن بريتاندىق ساياحاتشى بەنەديكت اللەن پاپۋا - جاڭا گۆينەيا ماڭىنداعى يەسىز قالعان اەرودرومنىڭ ماڭىنان امان-ەسەن تابىلدى دەپ جازادى Qamshy.kz اقپارات اگەنتتىگى BBC.com - عا سىلتەمە جاساپ.

يايفو تايپاسىن ىزدەپ دجۋنگليگە اتتانعان 57 جاستاعى اللەن 14ء-شى قاراشادا ۇيىنە قايتۋ كەرەك بولعان، الايدا ول كۇنى ۇيىنە ورالماعان. وسىدان كەيىن تۋىستارى دابىل قاققان.

جاقىندارىنىڭ ايتۋى بويىنشا، اللەن بۇعان دەيىن دە ەشقانداي ناۆيگاتور، ۇيالى تەلەفونسىز، سپۋتنيكسىز ساپارعا شىعاتىن. الايدا ەشقاشان رەيسكە كەشىكپەيتىن.

ءقازىر اللەندى ەۆاكۋاسيالاۋدىڭ امالدارى قاراستىرىلىپ جاتىر، الايدا وعان ەشقانداي ءقاۋىپ ءتونىپ تۇرعان جوق دەپ ايتۋ قيىن.

اللەننىڭ اگەنتى دجو سارسبي ونىڭ ەنگا پروۆينسياسىنىڭ پروگەر قالاسىنان 32 شاقىرىم قاشىقتىقتاعى اەرودرومنان تابىلعاندىعىن راستادى.

«ءبىز ونىڭ ناقتى قايدا ەكەنىن بىلەمىز. اللەندى ەۆاكۋاسيالاۋ ءۇشىن دايىندىق جۇمىستارىن جۇرگىزىپ جاتىرمىز» دەيدى دجو سارسبي.

اگەنتتىڭ ايتۋىنشا، تايپا وكىلدەرى باسقا ادامدار مازالاماۋى ءۇشىن كوپىردىڭ بارلىعىن قيراتقان. سول سەبەپتى ساياحاتشىعا جەڭىل كولىكپەن جەتۋ مۇمكىن ەمەس، وعان تىك ۇشاق جىبەرىلەدى.

العاش رەت اللەن وركەنيەتتى الەمنەن قاشاتىن يايفو تايپاسىمەن 30 جىل بۇرىن كەزدەسكەن. بۇل جولعى ساپارىنىڭ ماقساتى – ارنايى بي-بي-سي ارناسى ءۇشىن يايفو تايپاسى جايلى دەرەكتى فيلم ءتۇسىرۋ بولعان. بۇل جولى اللەن ساپارعا ەشقانداي بايلانىس قۇرالىنسىز، GPS- ناۆيگاتورسىز اتتانعان.

جەرگىلىكتى تايپا تۇرعىن اللەندى اەرودرومنىڭ ماڭىنان كورگەندىكتەرىن جانە ول ونى قۇتقارۋدى سۇراعاندىعىن Radio4 ەفيرىنەن فرانك گاردنەر حابارلاعان بولاتىن.

اللەننىڭ اپكەسىنىڭ ايتۋى بويىنشا، ول دجۋنگليدە قالاي كۇن كورۋ كەرەك ەكەندىگىن جاقسى بىلەدى جانە جەرگىلىكتى تۇرعىندارمەن وڭاي ءتىل تابىسىپ كەتە الادى. باستىسى قاراقشىلارعا جولىقپاسا بولعانى. 

بەنەديكت اللەن 22 جاسىندا ساياحاتقا العاش رەت جالعىز شىققان. ساياحاتشى جالاڭاياق امازونكا وزەنىن كانوەمەن كەسىپ وتكەن.

سونداي-اق ول پاپۋا - جاڭا گۆينەيادا ەرلەرگە ارنالعان التى اپتالىق راسىمگە قاتىسىپ، سالتانات كەزىندە 20 ەركەكپەن بىرگە قولتىراۋىن ۇياسىندا وتىرعان.

ءوزىنىڭ كەي ساياحاتتارىن بي-بي-سي ارناسىنا دەرەكتى فيلم رەتىندە تۇسىرگەن، ءوز ساپارلارى جايلى كىتاپ جازعان.

بەنەديكت اللەن تۆيتتەر پاراقشاسىنداعى سوڭعى جازباسىن 11ء-شى قازاندا جاريالاعان. وندا: «مەن پاپۋا - جاڭا گۆينەياعا اتتانىپ بارامىن. مەنى قۇتقارۋعا تىرىسپاڭدار. مەنى ءبارىبىر تابا المايسىڭدار» دەپ جازعان.

ساياحاتشى اشتان ولمەۋى ءۇشىن ءوز ءيتىن جەۋگە ءماجبۇر بولعان كەزىن ومىرىندەگى ەڭ اۋىر ءساتى ەكەنىن ايتادى.
بەنەديكت اللەننىڭ وتباسى چەحيادا ءومىر سۇرەدى.