الماتى قالاسى رەسپۋبليكا سارايىندا «الاش ۇلى» توبىنىڭ حالىققا رۋحاني ازىق پەن رۋح، جىگەر سىيلاعان «بىزبەن بىرگە» اتتى جەكە كونسەرتى ءوتتى دەپ جازادى Qamshy.kz اقپارات اگەنتتىگى. اتالعان كەشتە «ۇلىلار» ءوز ونەرىن كورسەتىپ، حالىققا سوزبەن ايتىپ جەتكىزە المايتىن رۋحتى سىيلاپ، كورەرمەندەردىڭ دەلەبەسىن قوزدىردى. قازاقتىڭ اتىن حالىقارالىق دەڭگەيگە تانىتىپ جۇرگەن «ۇلىتاۋ» توبى، ۇلى دالانىڭ بالاسى تورەعالي ءتورالى جانە ەتنو-فالكلورلىق «تۇران» توبىمەن الاش ۇلى قوسىلىپ ونەر كورسەتكەن كەزدەگى كورەرمەندەردىڭ ىستىق ىقىلاسىن، سەزىمىن جەتكىزۋ ءتىپتى مۇمكىن ەمەس. الاشۇلىمەن بىرگە قوسىلىپ ءان شىرقاعان كورەرمەن  3 ساعاتقا سوزىلعان كونسەرتتىڭ قالاي اياقتالعانىن دا بايقاماي قالدى. سونىمەن بىرگە وسىدان ءبىراز ۋاقىت بۇرىن جەكە شىعارماشىلىعىن شىڭداۋ ءۇشىن توپتان كەتكەن ۇشقىن جامالبەك پەن جاڭا قۇرامداعى الاش ۇلى توبى قازاق ونەرىنىڭ قارا شاڭىراعىندا «قارا شاڭىراق» ءانىن بىرگە شىرقادى. كورەمەندەرگە بىرنەشە ساعاتتىق ەمەس، بىرنەشە ايلىق ەنەرگيا سىيلاي بىلگەن ۇلى قازاقتىڭ ۇلدارى جانكۇيەرىمەن قيماي قوشتاستى. جانكۇيەرلەر دە كونسەرتتەن بىردەن كەتە قويمادى. ءدال وسىنداي رۋحتى كەشتى اڭساپ، ساعىنىپ جۇرگەن كورەرمەن كونسەرت سوڭىندا الاشتىڭ ۇلدارىن قيماي، تاعى دا ءان سۇرادى. ناعىز ونەر، ناعىز ءان، ناعىز انشىلەر ءدال وسىنداي بولماق.

حالىقتىڭ جاندى داۋىستاعى كونسەرت پەن قازاقتىڭ كۇمبىرلەگەن قارا دومبىراسىن ساعىنىپ، اڭساعاندارى بايقالىپ تۇردى. قازىرگى XXI عاسىردا  جاساندى مەن تابيعي، ەستى مەن ەسەر ءاندى اجىراتا الماي جاتقان كەزدە «الاش»، — دەپ، «قازاق»، — دەپ ۇرانداتقان، قازاق ءۇشىن ايانباي ەڭبەك ەتىپ جۇرگەن ونەرلىلەرگە ءبىز قاتتى ءزارۋمىز. ۇلتتىق يدەولوگيا تۋرالى تەك ايتىپ قانا قويماي، كورسەتە دە ءبىلۋ كەرەك. كەيىنگى بۋىندى وسىنداي كەشتەرگە ءجيى اپاراتىن بولساق بولاشاق ۇرپاقتىڭ دا جۇرەگى قازاق دەپ سوعىپ، الاش دەپ ۇرانداتار ەدى. كونسەرتتە كىشكەنتاي بالالاردىڭ الاش دەپ ايتقانىن كورگەندە بولاشاعىمىزدىڭ جارقىن بولاتىنىنا سەنىپ، ءۇمىتىمىز ۇلعايا تۇسكەن. كەزىندەگى ءاليحاندار مەن احمەتتەر الاش دەپ ۇرانداتار كۇندى اڭساپ، ارمانداپ كەتتى ەمەس پە؟ ءبىز – وسىنداي كەشتىڭ كۋاسى بولعاندار مەن رۋحتى كەشتى وتكىزگەندەر باقىتتى قازاقپىز. تەك وسى باقىتىمىزدى، باعىمىزدى قادىرلەپ، باعالاي بىلسەك بولعانى. شەتەلدىڭ ۇساق-تۇيەك، قوقىسىنا قىزىعىپ، ەلىكتەمەي، ءوزىمىزدىڭ قۇندى بايلىعىمىزدى دارىپتەپ، قولداساق قانا بايلىعىمىزدى ەسەلەپ كوبەيتە الامىز.

رۋحاني ازىق پەن رۋحتى سەزىندىرە بىلگەن الاشتىڭ نار ۇلدارى جاس بولسا دا ءوز زامانداستارىنىڭ الدى ەكەنىن كورسەتىپ قانا قويماي دالەلدەي ءبىلدى. كورەرمەندەردىڭ كەشتەن العان اسەرى مەن سەزىمىن سوزبەن جەتكىزۋ تىپتەن مۇمكىن ەمەس. تەك وسىنداي كەشتىڭ كۋاگەرى بولىپ قانا رۋحتى، ەنەرگيانى سەزىنىپ، بىلە الاسىز. 

اسەل بولات قىزى