سامارقان وبلىسىندا كوللەدج جانە مەكتەپتىڭ جوعارى سىنىبىندا وقيتىن وقۋشى قىزداردىڭ ءبارىن گينەكولوگقا تەكسەرۋگە جىبەرىپ جاتىر دەپ حابارلايدى Qamshy.kz اقپارات اگەنتتىگى centralasian.org سايتىنا سىلتەمە جاساي وتىرىپ. دەرەككوزدىڭ مالىمەتىنشە، ونداعى ماقسات - توسەك قاتىناسىن ەرتە باستاعان جاسوسپىرىمدەردى انىقتاۋ.
سامارقان وبلىسى اكىمشىلىگىندەگى دەرەككوزدىڭ حابارلاۋىنشا، وقۋشى قىزداردى تەكسەرۋ ارقىلى ەرتە جۇكتىلىكتى انىقتاماق جانە وزدەرىنە قول جۇمساۋ وقيعاسىنىڭ الدىن الماق. جىنىستىق قاتىناستى ەرتە باستاعان وقۋشىلارمەن پسيحولوگتار جۇمىس ىستەيتىن بولادى دەيدى.
الايدا وقۋشىلار وزدەرىن ءماجبۇرلى تۇردە دارىگەرگە قاراتۋىنا قارسى. ءبىراق تەكسەرۋدەن كەيىن كوللەدجدە وقيتىن ءبىر ءجاسوسپىرىمنىڭ جۇكتى ەكەنى انىقتالعان.
جاپپاي تەكسەرۋ وزبەكستان پرەزيدەنتى شاۆكات ميرزيايەۆتىڭ سامارقاندا سويلەگەن سوزدەرىنەن كەيىن باستالعان.
9 قاراشادا مەملەكەت باسشىسى سامارقان وبلىسى حالىق دەپۋتاتتارىنىڭ كەڭەسىندە ايەلدەر اراسىندا وزىنە قول جۇمساۋ دايەگى كوبەيىپ بارا جاتقانىنا الاڭداعان. ميرزيايەۆ سوڭعى ۋاقىتتا ءبىر سامارقان وبلىسىندا 145 قىز-كەلىنشەكتىڭ وزىنە قول جۇمساعانىن ايتقان.
