22 قاراشادا قازاقستاندىق ءانشى سيۆي ماحمۇدي «ەڭبەك داڭقى» وردەنىن العانىن ءوزىنىڭ Instagram جەلىسىندەگى پاراقشاسىندا مالىمدەدى. الايدا جەلى قولدانۋشىلارى ءانشىنىڭ قانداي ەڭبەگى ءۇشىن ماراپاتتالعانىن بىلمەي دال بولدى، نارازىلىق ءبىلدىردى. وسىعان وراي سيۆي ءماحمۇديدىڭ نە سەبەپتى «ەڭبەك داڭقى» وردەنىن العانىن ءانشىنىڭ PR-مەنەدجەرى گۇلدانا يمانباي Today.kz تىلشىسىنە ءتۇسىندىردى، دەپ حابارلايدى Qamshy.kz اقپارات اگەنتتىگى.

«بۇل ماراپاتتى ق ر مادەنيەت جانە سپورت مينيسترلىگى بەرگەن جوق، سونى تۇسىنسەڭىزدەر دەيمىن. جاپ-جاس بولىپ «ەڭبەك داڭقى» ماراپاتىن الدى دەپ حالىق ءدۇر سىلكىندى. ايتا كەتەيىن، ماراپاتتى سيۆيگە مادەنيەت، سپورت جانە اقپارات قىزمەتكەرلەرىنىڭ سالالىق كاسىپوداعى تابىستادى. ءبىز ءوزىمىز دە كۇتپەدىك، بىلمەدىك. ماراپات سيۆي ءماحمۇديدىڭ 10 جىلدىق ەڭبەگى ءۇشىن بەرىلدى. بۇل ماراپات جىل سايىن جاستارعا بەرىلىپ وتىرادى»، - دەدى گۇلدانا يمانباي.

سونداي-اق 2017 جىلى ءانشىنىڭ نەمەن اينالىسقانىن ايتىپ بەردى.

«بوسانعان سوڭ سيۆي مۋزىكانت ايدار رىسبەكپەن جۇمىس ىستەدى، ونى شەتەلگە بايقاۋعا جىبەردى. «سالامات» توبىن قۇردى، جىلدىق كونسەرت وتكىزدى»، - دەدى PR-مەنەدجەر.

ايتا كەتەيىك، «ەلەكتروندىق ۇكىمەت» پورتالىنىڭ اقپاراتىنا سايكەس، «ەڭبەك داڭقى» I، II، III دارەجەلى ماراپاتى مەتاللۋرگيا ونەركاسىبىندە ۇزاق ۋاقىت ەڭبەك ەتكەن ازاماتتارعا بەرىلەدى.