قازاقستان پرەزيدەنتى نۇرسۇلتان نازاربايەۆ مۇزافار الىمبايەۆتىڭ قايتىس بولۋىنا بايلانىستى تۋعان-تۋىسقاندارى مەن جاقىندارىنا كوڭىل ايتۋ جەدەلحاتىن جولدادى، دەپ حابارلايدى Qamshy.kz اقپارات اگەنتتىگى.

مەملەكەت باسشىسى كورنەكتى اقىننىڭ دۇنيەدەن وتكەنى تۋرالى حاباردى زور كۇيزەلىسپەن قابىلدادى.

جەدەلحاتتا مۇزافار الىمبايەۆتىڭ قازاق ادەبيەتىن دامىتۋعا جانە قازاقستاننىڭ وسكەلەڭ ۇرپاعىن تاربيەلەۋگە باعا جەتپەس ۇلەس قوسقانى اتاپ وتىلگەن.

«كەڭەستىك كەزەڭدە ول قازاق ادەبيەتىنىڭ الىپتارىمەن قاناتتاسا ءجۇرىپ، وتان يگىلىگى جولىندا جەمىستى ەڭبەك ەتتى. كوپتەگەن جىر جيناقتارى مەن ءان ماتىندەرىنىڭ اۆتورى اتاندى. وتىز جىلعا جۋىق بالالاردىڭ سۇيىكتى «بالدىرعان» جۋرنالىنىڭ رەداكتورى بولىپ، انا ءتىلىمىزدىڭ دامۋىنا جانە بۇلدىرشىندەرىمىزدىڭ دۇرىس تالىم-تاربيە الۋىنا لايىقتى ۇلەس قوستى. قالىڭ جۇرتشىلىق ءۇشىن ونىڭ حالقىمىزدىڭ ماقال-ماتەلدەرىن جيناقتاپ، زەرتتەۋدەگى ەڭبەگىنىڭ ماڭىزى زور. ول جۇرت ءاردايىم ايتىپ جۇرەتىن كوپتەگەن قاناتتى سوزدەر مەن ءسوز تىركەستەرىن ومىرگە اكەلدى.

مۇزافار الىمبايەۆتىڭ ەسىمى مەن ەڭبەگىن حالقىمىز ءاردايىم جادىندا ساقتايدى دەپ سەنەمىن»، – دەلىنگەن جەدەلحاتتا.