استانالىق تۇرعىن اسلان وسپانوۆ قازاقستان رەسپۋبليكاسى پرەزيدەنتىنىڭ رەزيدەنسياسى اقوردانىڭ ماكەتىن جاساپ شىقتى، دەپ حابارلايدى Qamshy.kz اقپارات اگەنتتىگى.
بۇل كۇندە اقوردانىڭ ماكەتىن جاساعاندار از ەمەس، الايدا بۇل جولعى ماكەتتىڭ ەرەكشەلىگى - اقوردا وزگەشە ستيلمەن - 60 مىڭنان استام جىلتىراعان اشەكەي تاستارمەن جاسالعان. ماكەتكە قاراپ كۇندىزگى جانە تۇنگى استانانىڭ كورىنىسىن كورە الامىز، ءارى ىشىنەن ەلىمىزدىڭ گيمنى دە شىرقالىپ تۇرادى.
اقوردانى جاساۋعا اسلاننىڭ 1 جىلدان استام ۋاقىتى كەتكەن. بۇدان بۇرىن جارناما اگەنتتىگىندە جۇمىس ىستەگەن جاس ساۋلەتشى سوڭعى بەس ايىن تەك اقوردانىڭ ماكەتىن جاساۋعا ارنايدى. سول ءۇشىن جۇمىسىنان دا شىعىپ كەتكەن. ەسەسىنە اسلاننىڭ جارى مەن اتا-اناسى وعان قارجىلاي دا، پسيحولوگيالىق جاعىنان دا قولداۋ ءبىلدىرىپ، كومەك كورسەتەدى. مەكتەپتى دە، ۋنيۆەرسيتەت قابىرعاسىن دا استانا قالاسىندا ءتامامداعان اسلاننىڭ ماماندىعى – ساۋلەتشى.
استانا قازاقستاننىڭ استاناسى بولعالى باس قالاداعى قۇرىلىس بارىسى اسلاننىڭ كوز الدىندا وتكەن. قالاعا ەرەكشە اسەمدىك بەرەتىن كوزدىڭ جاۋىن الاتىن ءزاۋلىم عيماراتتار اسلاننىڭ ساۋلەتشى بولامىن دەگەن ارمانىنىڭ تۋۋىنا سەبەپ بولادى.
ول ءۇشىن جاس استانادا بوي كوتەرگەن اسپانمەن استاسقان عيماراتتاردىڭ ءبارى ادەمى بولدى. الايدا كوڭىلىنە ەرەكشە ۇناعانى، ديزاينىنا اسا قىزىققان ءبىر عيمارات – اقوردا رەزيدەنسياسى. جاستايىنان اقوردانىڭ ەرەكشە ستيلدەگى، ەرەكشە ديزاينداعى ماكەتىن جاساسام دەگەن ارمانى اسلاننىڭ كوكەيىندە قالىپ قويدى.
ءسويتىپ ءبىر جىل بۇرىن ارمانىنا قول جەتكىزۋدەگى العاشقى قادامىن باستاپ تا كەتتى. اقوردانىڭ ماكەتىن جاساۋ ءۇشىن الماتىدان 60 مىڭنان استام اشەكەي تاستار ساتىپ العان.
ۇساق تاستارمەن ۇلكەن ماكەت جاساپ شىعارۋ ءۇشىن ۇلكەن توزىمدىلىكتىڭ كەرەگى بەلگىلى. 1 جىل بويى كوز مايىن تامىزىپ، بار جۇمىسىن ىسىرىپ قويىپ جاساعان ەڭبەگىنىڭ ءساتتى شىققانىن بايقاۋعا بولادى.
اسلاننىڭ الداعى ماقساتى – ەلباسىمەن كەزدەسىپ، اقوردانىڭ ماكەتىن پرەزيدەنتكە ءوز قولىممەن تاپسىرسام دەيدى.
بۇگىن قازاقستان رەسپۋبليكاسىنىڭ تۇڭعىش پرەزيدەنتى كۇنى. سونداي-اق اسلان وسپاننىڭ دا تۋعان كۇنى. تۋعان كۇندە ءار ادام ومىرىندە ورىن الار ءبىر عاجايىپقا سەنەدى. اسلان دا سونداي ءبىر عاجايىپ ورناپ، ەلباسىنىڭ قابىلداۋىنا ىلىكسەم دەگەن نيەتىن جاسىرمادى.
اسلاننىڭ جارى، قولداۋشىسى نۇرتىلەك ريانبەك ەرىنىڭ ەڭبەگىن جوعارى باعالادى:
«ەكىنىڭ ءبىرىنىڭ قولىنان كەلمەيدى، ءتوزىمى دە جەتپەيدى. ۇيىقتاماي كۇنى-تۇنى ەڭبەكتەندى. ەڭبەكتەنۋگە تۇراتىن دۇنيە دەپ ويلايمىن. ەڭ باستى تىلەگىم – ەلباسىنا تاپسىرسام دەگەن ارمانى ورىندالسا ەكەن. اسلاننىڭ ەڭبەگى مەن توزىمدىلىگىمەن مەن دە، اتا-اناسى دا ماقتانامىز»، - دەدى نۇرتىلەك حانىم.
نۇرتىلەك ريانبەكتىڭ ايتۋىنشا، بۇگىنگى تاڭدا ماكەتكە قىزىعۋشىلىق تانىتىپ، ساتىپ الۋعا نيەت بىلدىرگەندەر دە بار.
«ەلباسى اسلاندى قابىلداۋى دا، قابىلداماۋى دا مۇمكىن. ەگەر بولاشاقتا ماكەت ۇيدە بولىپ، ونىڭ ەڭبەگىنە ساي ۇلكەن قارجى ۇسىنىپ، ساتىپ الامىن دەگەندەر بولسا، ساتۋعا قارسى ەمەسپىز»، - دەيدى ساۋلەتشىنىڭ جارى.
ال اسلاننىڭ الداعى ۋاقىتتاعى جوسپارى – ۇلكەن جوبالاردى قولعا الىپ، تاپسىرىستار قابىلداۋ، ماكەتتەر جاساۋ.
