قازاقستان رەسپۋبليكاسىندا ۇەۇ مەن مەملەكەتتىڭ ءوزارا ءىس-قيمىلىن دامىتۋ جونىندەگى 2020 جىلعا دەيىنگى ۇلتتىق جوسپارعا وزگەرىستەر ەنگىزىلدى دەپ حابارلايدى Qamshy.kz اقپارات اگەنتتىگى.

ۇلتتىق جوسپارعا مەملەكەت باسشىسىنىڭ «رۋحاني جاڭعىرۋ» باعدارلامالىق ماقالاسىنىڭ باسىمدىقتارىن ىسكە اسىرۋ جونىندەگى شارالار ەنگىزىلىپ وتىر. وسىلايشا، ق ر ءدىن ىستەرى جانە ازاماتتىق قوعام مينيسترلىگى «جومارت جۇرەك»، «الەۋمەتتىك باستامالار كارتاسى» جانە «تۋعان جەرگە تاعزىم» اكسيالارى سياقتى الەۋمەتتىك جوبالاردى ىسكە اسىراتىن بولادى.                  اتالعان ءىس-شارالار تۇرعىنداردى، ۇكىمەتتىك ەمەس ۇيىمداردى،   كاسىپكەرلەردى جانە ەرىكتىلەردى كىشى وتانىن (تۋعان جەرىن دامىتۋعا) قولداۋ كورسەتۋگە، سونداي-اق جەرگىلىكتى تۇرعىنداردىڭ وزەكتى ماسەلەلەرىن شەشۋگە ۇلەس قوستىرۋعا باعىتتالعان.

جوسپارعا سايكەس، مەملەكەت پەن ۇكىمەتتىك ەمەس ۇيىمدار اراسىنداعى سالالىق ىنتىماقتاستىقتى كەڭەيتۋ، قوعامدىق مونيتورينگ پەن باقىلاۋ جۇيەسىن دامىتۋ، قايىرىمدىلىق جانە الەۋمەتتىك جاۋاپكەرشىلىكتى دامىتۋ مادەنيەتىندەگى ۇكىمەتتىك ەمەس ۇيىمداردىڭ ءرولىن ارتتىرۋ سياقتى ءبىرقاتار شارالار جۇزەگە اسىرىلاتىن بولادى.

بۇل رەتتە مەملەكەتتىك ورگانداردىڭ ۇكىمەتتىك ەمەس ۇيىمدارمەن تۇراقتى كەزدەسۋلەرىن وتكىزۋ، ۇەۇ-مەن ءوزارا ءىس-قيمىل جونىندەگى ۇيلەستىرۋ كەڭەسىنىڭ وتىرىسى، «ASAR» ءۇش جاقتى ىنتىماقتاستىق فورۋمى، قوعامدىق كەڭەستەردىڭ ءماجىلىسى جانە باسقا دا ءىس-شارالاردى وتكىزۋ تاجىريبەلەرى جالعاساتىن بولادى.

جالپى العاندا، جوسپاردىڭ ىسكە اسىرىلۋى ۇەۇ مەن مەملەكەتتىڭ ءوزارا ءىس-قيمىلىنىڭ جاڭا تاسىلدەرىن ازىرلەۋگە، ۇەۇ-عا حالىقتىڭ الەۋمەتتىك قىزمەتتەرىنىڭ ساپاسىن جاقسارتۋعا جانە ولاردىڭ قارجىلىق تۇراقتىلىعىن ارتتىرۋعا مۇمكىندىك بەرەدى.

ەستەرىڭىزگە سالا كەتەيىك،  قازاقستان رەسپۋبليكاسىندا ۇەۇ مەن مەملەكەتتىڭ ءوزارا ءىس-قيمىلىن دامىتۋ جونىندەگى ۇلتتىق جوسپار قازاقستان رەسپۋبليكاسى ۇكىمەتىنىڭ 2015 جىلعى 21 قاراشاداعى № 155-ر قاۋلىسىمەن بەكىتىلگەن.