40398 اسكەري ءبولىمىنىڭ بولىمشە كومانديرى سەرجانت اسلان شاكەنوۆ الماتى وبلىسى بويىنشا «ۇزدىك جاس اسكەري قىزمەتشى» اتاندى، دەپ حابارلايدى Qamshy.kz اقپارات اگەنتتىگى.

جاس اسكەري قىزمەتشىگە وبلىس اكىمى اماندىق باتالوۆ ءوز قولىمەن «Ko’s’bass’y - 2017» جاستار سىيلىعىن تابىس ەتتى. تالدىقورعاندا ۇزدىك جاس ماماندارعا الماتى وبلىسى اكىمىنىڭ ءداستۇرلى ماراپاتى ۇسىنىلدى. ماراپات 17 نوميناسيا بويىنشا تاعايىندالدى: ۇزدىك اسكەري قىزمەتشى، جۋرناليست، دارىگەر، كاسىپكەر، مەملەكەتتىك قىزمەتكەر جانە ت.ب.

وبلىس اكىمى اماندىق باتالوۆ ءار لاۋرەاتقا ديپلوم مەن 250 000 تگ. سىياقى تابىس ەتتى. اتالعان شارا الماتى وبلىسىنىڭ جاستار ساياساتى ماسەلەلەرى باسقارماسى، جاستار ساياساتى ورتالىعى، «جاس وتان» جق الماتى وبلىستىق فيليالىنىڭ ۇيىمداستىرۋىمەن وتكىزىلدى.

ولاردىڭ پىكىرىنشە جاستاردى وسىداي ءىس-شارالار ارقىلى قولداۋ ولاردىڭ العا ۇمتىلىپ، ءوز شەبەرلىكتەرىن شىڭداي تۇسۋىنە ىقپال ەتەدى.

- الماتى وبلىسى اكىمىنىڭ «Ko’s’bass’y» سىيلىعى 2009 جىلدان بەرى وتكىزىلىپ كەلەدى. ۇمىتكەرلەر قاتاڭ تالاپتار مەن بۇلجىماس ەرەجەگە سايكەس ىرىكتەلىپ، ىشىنەن ەڭ ۇزدىكتەرى تاڭدالدى. جاڭا 17 ەسىم تاريحقا ەنگىزىلدى، - دەدى الماتى وبلىسىنىڭ جاستار ساياساتى ماسەلەلەرى باسقارماسى باسپا ءسوز قىزمەتىنىڭ باسپا ءسوز حاتشىسى اينۇر نۇربول قىزى.

ونىڭ ايتۋىنشا، «ۇزدىك اسكەري قىزمەتشى» نوميناسياسىنا قارۋلى كۇشتەردىڭ، باسقا دا اسكەرلەر مەن اسكەري قۇرىلىمداردىڭ اسكەري قىزمەتشىلەرىنەن بىرنەشە ءوتىنىش كەپ تۇسكەن. كاسىبي دەڭگەيلەرىن، كوشباسشىلىق قابىلەتتەرىن، جەتكەن جەتىستىكتەرىن سارالاي كەلە ق ر قك قۇرلىق اسكەرلەرى 40398 ءا/ب سەرجانتى سەرجانت اسلان شاكەنوۆ وبلىس اكىمىنىڭ ماراپاتىنا لايىق دەپ تانىلدى. اسلان شاكەنوۆ «جەكپە-جەك» بويىنشا قازاقستان چەمپيوناتىنىڭ جۇلدەگەرى، «جەكپە-جەك» بويىنشا حالىقارالىق تۋرنيرلەردىڭ جەڭىمپازى، «دجيۋ-دجيتسۋ» بويىنشا قازاقستان چەمپيونى.

وسى كەزگە دەيىن 50-دەن اسا وبلىستىق، رەسپۋبليكالىق، حالىقارالىق جارىستاردا باعىن سىناعان.

-بارلىعى ءبىزدىڭ اسكەري بولىمدە ۇيىمداستىرىلعان جەكپە-جەك جارىسىنان باستالدى. قارسىلاستارىمدى جەڭگەن سوڭ ودان جوعارى دەڭگەيدەگى جارىستارداباعىمدى سىناي باستادىم. «ۇزدىك جاس اسكەري قىزمەتشى» اتانۋ مەن ءۇشىن زور مارتەبە، قول جەتكىزگەن تابىستارىم تەك مەنىكى ەمەس، قورعانىس مينيسترلىگى باسشىلىعىنىكى دەپ بىلەمىن. سەبەبى مەنىڭ شەبەرلىگىمدى شىڭداۋعا، كاسىبيلىگىمدى دامىتۋعا جاقسى جاعداي جاسالىپ وتىر. ءبىز الدىڭعى بۋىن اعالارعا قاراپ وسسەك، ارتقى بۋىن بىزگە قاراپ بوي تۇزەيدى. دەمەك ءبىزدىڭ جامان، نە ورتاشا بولۋعا قاقىمىز جوق، ءبىز، قازاقستاندىق جاستار، ءارقاشان الدا، كوشباسشى بولۋىمىز قاجەت، - دەپ وي ءتۇيدى سەرجانت اسلان شاكەنوۆ.

سالتاناتتى ماراپاتتاۋ شاراسى قازاقستاندىق ەسترادانىڭ جارقىن جۇلدىزدارى كامشات جولدىبايەۆا مەن «Renzo» توبىنىڭ قويعان عالامات كونسەرتىمەن اياقتالدى.