الماتى وبلىسىندا ۇيلەنۋ تويىنا بارعان جىگىت ۇيىنە ورالمادى. ءبىر توپ جىگىتتىڭ تەپكىسىنە ءتۇسىپ، مەيرامحانا ماڭىندا كوز جۇمعان. وسىلاي دەگەن وتباسى مۇشەلەرى ادىلدىك ىزدەپ ءجۇر. ولار 23 جاستاعى سۇڭعاتتى سوققىعا جىعىپ ولتىرگەندەر 1 اي وتسە دە، قاماۋعا الىنبادى دەپ وتىر. كۇدىكتى كىمدەر، ولار نەگە بوستاندىقتا ءجۇر؟ ماسەلەنىڭ ءمان-جايىن استانا تەلەارناسى حابارلادى، دەپ جازادى.

بەگدالييەۆتەر اۋلەتىنە قان جۇتتىرعان وقيعا قازاننىڭ 27-نەن 28-نە قاراعان ءتۇنى بولعان. اكەسى وسپاندياردىڭ ايتۋىنشا، سول كۇنى كەشكە بالاسى تالعار اۋدانىنداعى كولساي مەيرامحاناسىنا دوسىنىڭ تويىنا كەتەدى. ءبىراق ءتۇن اۋا ساعات 2 جارىمدار شاماسىندا، توي يەسى سۇڭعاتتىڭ اۋرۋحاناعا تۇسكەندىگىن، حابارلاپتى.

«رەستوراننىڭ الدىندا ولگەن. بىزگە "ءولى دەنەسىن الىپ كەلدى" دەدى.  بۇل گرۋپپوۆوي. ەشقايسىسىن ۇستاپ وتىرعان جوق. ءبىر بالانى عانا الىپ قالدى. بۇل جەردە ەشقانداي ادىلدىك جوق. مەنىڭ سۇرارىم، ادىلدىك!» - سۇڭعاتتىڭ اكەسى وسپانديار بەگدالييەۆ.

اكەسىنىڭ ايتۋىنشا، بالاسىن 9 بۇزاقى توپ بولىپ تەپكىگە العان. شامبايىنا باتىپ وتىرعانى - بارلىعىنىڭ قاماۋعا الىنباعانى. ويتكەنى كۇدىكتى دەپ توعىزى ەمەس، تەك ەكەۋى عانا قامالعان. ونىڭ ءبىرىن كوپ ۇزاماي بوساتىپ جىبەرگەن دەيدى. وسپانديار بەگدالييەۆ تالعار اۋداندىق ىشكى ىستەر ءبولىمىنىڭ تەرگەۋشىسى ىسكە ەنجارلىق تانىتقاندىقتان، امالسىز وبلىسقا شاعىمداندىم دەپ وتىر. قورعاۋشى 2 قاراشادان بەرى بۇل ىسكە ءۇڭىلىپ، تالاي شيكىلىكتى تاپقانىن ايتادى. 

بەگدالييەۆتەر اۋلەتىنىڭ ادۆوكاتى كامشات شينتەكوۆا: «دەر كەزىندە ايعاقتاردى جيناماي، كۋالاردى انىقتاماي، سوت مەديسينا ساراپتاۋىنىڭ تاعايىنداۋى بويىنشا قاۋلىمەن جابىرلەنۋشى تاراپتى تانىستىرماي جانە ايىپتالۋشىلاردىڭ كيىمىن ۋاقىتىلى، دەر كەزىندە الماعان. 99-شى باپ، كىسى ءولىمى ورىن العاندىقتان، سول باپپەن قوزعاۋىن تالاپ ەتىپ وتىرمىز. ءبىراق تالابىم ءالى كۇنگە دەيىن قاناعاتتاندىرۋسىز»، - دەيدى.

ال الماتى وبلىسى ىشكى ىستەر دەپارتامەنتىنىڭ وكىلى جىگىتتىڭ ولىمىنە ەكى كۇدىكتىنىڭ قاتىسى بار دەيدى.

«اتادلعان ىسكە بايلانىستى ەكى كۇدىكتى ۇستالدى. 1994 جىلى تۋىلعان ولاردىڭ بىرىنە قىلمىستىق كودەكستىڭ 106 بابى بويىنشا ءىس قوزعالسا، ەكىنشىسىنە «بۇزاقىلىق» فاكتىسىمەن ايىپ تاعىلدى. قازىرگى تاڭدا كۇدىكتىنىڭ ءبىرى ءۇي قاماققا شىعارىلدى. ەكىنشى ازامات ۋاقىتشا قاماۋدا. قازىرگى تاڭدا ءىس وبلىستىق تەرگەۋ باسقارماسىنا جىبەرىلدى».