17 جاستاعى يراندىق ساحار تاباردىڭ سۋرەتى ءبىر كۇندە بۇكىل الەمگە تارالىپ كەتتى. قىز “اكتريسا اندجەلينا دجوليگە ۇقساۋ ءۇشىن 50 پلاستيكالىق وپەراسيا جاساتتى” دەپ شۋلادى گازەتتەر. دەگەنمەن جەلى قولدانۋشىلارى ساحاردى “گولليۆۋد جۇلدىزىنا ەمەس، “قالىڭدىق ءمايىتى” مۋلتفيلمىندەگى كەيىپكەرگە ۇقساتتى. يراندىق قىز شىن مانىندە قانشا رەت پىشاققا ءتۇستى؟ شىنىمەن دە دجوليگە ۇقساعىسى كەلدى مە؟ اتىشۋلى يراندىق قىزدىڭ ەكسكليۋزيۆتى سۇحباتىن Qamshy.kz اقپارات اگەنتتىگى Sputnik قازاقستان سايتىنا سىلتەمە جاساي وتىرىپ وقىرمان نازارىنا ۇسىنادى.
— قولدانۋشىلاردىڭ پىكىرىنشە، ءسىزدىڭ پروفيلىڭىزدەگى فوتوسۋرەتتەر “قالىڭدىق ءمايىتىن” ەسكە تۇسىرەدى ەكەن. وپەراسيادان كەيىن شىنىمەن دە بەت-الپەتىڭىز وسىلاي وزگەردى مە؟
— ارينە، جوق. بۇل فوتوشوپ جانە ماكياج. سۋرەتىمدى جۇكتەگەن سايىن مەن بەت-الپەتىمدى جۇرتقا قىزىقتىراق ەتىپ كورسەتەمىن. بۇل ءوز ويىمدى ءبىلدىرۋدىڭ ءبىر ءادىسى، ونەر دەسە دە بولادى. ماعان قىزىعا قارايتىن ادامدار ءتۇرىم ونداي ەمەس ەكەنىن بىلەدى.
— بارلىق ب ا ق اندجەلينا دجوليگە ۇقساعىڭىز كەلگەنىن جازدى. سولاي ما؟
— شىندىعىندا ولاي ەمەس. ءتىپتى دجوليگە ۇقساۋدى ويلاعان ەمەسپىن. سونداي-اق “قالىڭدىق ءمايىتى” مۋلتفيلمىندەگى كەيىپكەرگە دە ۇقساعىم كەلمەگەن. ءقازىر ولارمەن بايلانىستىراتىن ورتاق نارسە بار ەكەنىن تۇسىنەمىن، الايدا مەن ءوز الدىما مۋزامىن جانە بىرەۋگە ۇقساۋ — قارا باستىڭ قامى ەمەس.
— قانداي پلاستيكالىق وتا جاساتتىڭىز؟
— مۇرنىما وتا جاسالعان، ەرىندەرىمدى ءىسىردىم، ليپوساكسيا جاساتتىم. وپەراسيالاردان قورقىنىشتى ەشنارسە كورىپ وتىرعان جوقپىن: مۇندا، تەگەراندا ءبىر وپەراسيا 10 ميلليون يران ريالى (شامامەن 93 مىڭ تەڭگە —رەد.ەسكەرتپەسى) تۇرادى.
— 49 كيلوگرامم بولۋ ءۇشىن قاتتى ارىقتاپ كەتتى دەپ جاتىر؟
— سالماق تاستاعانىم راس. ءبىراق 40 نەمەسە 30 ەمەس، بەس التى-التى كيلوگرامم عانا. ءقازىر سالماعىم 54 كيلوگرامم تارتادى.
— بۇعان وتباسىڭىز قالاي قارادى؟ يران — ادەت-عۇرىپتى قاتاڭ ۇستايتىن مۇسىلمان ەلى عوي.
— باستاپقىدا ولار قارسى بولدى. ولار ءۇشىن پلاستيكالىق وتا قالىپتى نارسە ەمەس. الايدا ءقازىر، ءبارى ءساتتى وتكەننەن كەيىن اتا-انام مەنى قولداپ وتىر. ەڭ باستىسى وسى.
