مەملەكەت باسشىسى نۇرسۇلتان نازاربايەۆتىڭ قاتىسۋىمەن «جاڭا يندۋستريالاندىرۋ: قازاقستاندىق بارىستىڭ قادامى» ۇلتتىق تەلەكوپىرى باستالدى. شارا بارىسىندا ونلاين رەجيمىندە بۇكىل ەل بويىنشا جاڭا يندۋستريالىق-يننوۆاسيالىق، ينفراقۇرىلىمدىق، ەنەرگەتيكالىق، اگروونەركاسىپتىك جوبالار ىسكە قوسىلماق، دەپ حابارلايدى Qamshy.kz اقپارات اگەنتتىگى.

اتاپ ايتقاندا، «قازاقالتىن تەحنولودجي» كومپانياسى اقسۋ اۋىلىندا التىن ءوندىرۋ فابريكاسىن ىسكە قوسپاق. اقتوبە وبلىسىندا ماشينا جاساۋ جانە مەتالل وڭدەۋ سەكتورىندا مۇناي-گاز جابدىقتارىن ءوندىرۋ جانە قۇبىرلار شىعارۋمەن اينالىساتىن «قازاقستان مۇناي جابدىقتارى زاۋىتى» ج ش س زاۋىتى اشىلادى. اتىراۋ وبلىسىندا («جىگەرمۇنايسەرۆيس» ج ش س) روبوتتى دانەكەرلەۋ ادىسىمەن مەتالل قۇراستىرمالارى ءوندىرىسى جۇمىسىن باستايدى.

تاماق ونەركاسىبىندە جانە اۋىلشارۋاشىلىق ونىمدەرىن قايتا وڭدەۋدە سولتۇستىك قازاقستان وبلىسىنداعى «ماسلودەل» ج ش س «تەترا پاك» ج ش س جوعارى تەحنولوگيالىق قوندىرعىلارمەن جابدىقتالعان ءسۇت زاۋىتىن اشادى. جامبىل وبلىسىندا «شاعىن جانە ورتا بيزنەستى دامىتۋدىڭ جاڭا سەكتورلارى» باعىتى بويىنشا «ورگستروي» ج ش س گرانيت، ءمارمار جانە گيپس ءوندىرۋ، جارىلعىش قۇرىلعىلاردى ءوندىرۋدىڭ جاڭا تەحنولوگياسىن وڭدەۋ جونىندەگى ءوندىرىسىن ىسكە قوستى. قاراعاندى وبلىسىندا ەسكى كولىكتەردى قايتا وڭدەۋمەن اينالىساتىن كاسىپورىن «Recycling Company» ج ش س جۇمىس ىستەي باستاماق. كاسىپورىن جىلىنا توزىعى جەتكەن اۆتوكولىكتەردىڭ 50 مىڭىن قايتا وڭدەۋگە قاۋقارلى.

سونداي-اق، استاناداعى جالپىۇلتتىق تەلەكوپىر بارىسىندا ەۋروپالىق اۆياسيالىق قاۋىپسىزدىك اگەنتتىگىنىڭ ستاندارتتارىنا سايكەس ءوز اۆيالاينەرلەرى مەن باسقا دا اۋە كومپانيالارىنىڭ  ۇشاقتارىنا تەحنيكالىق قىزمەت كورسەتەتىن «ەير استانا» اۆياسيالىق تەحنيكالىق ورتالىعى جۇمىس ىستەي باستايدى.

ايتا كەتەيىك، 2017 جىلدىڭ باسىنان بەرى 1،9 تريلليون تەڭگەلىك 127 جوبا ىسكە قوسىلىپ، 10 مىڭنان استام تۇراقتى جۇمىس ورنى اشىلدى.