استانادا ءوتىپ جاتقان ۇلتتىق تەلەكوپىر بارىسىندا "ينتەرگاز ورتالىق ازيا" اق اقتوبە وبلىسىنداعى "بوزوي" قويماسىندا گاز كەپتىرۋ قوندىرعىسىن ىسكە قوستى، دەپ حابارلايدى Qamshy.kz اقپارات اگەنتتىگى.

"ينتەرگاز ورتالىق ازيا" اق "بوزوي" قويماسىندا گازدى كەپتىرۋ قوندىرعىسىن ىسكە قوستى. جوبا رەسەي، جۇڭگو مەن وزبەكستانعا تاسىمالداناتىن گاز ءترانزيتىنىڭ ەكسپورتتىق كولەمىن ۇلعايتۋعا، گازدى قۇرعاتۋ جانە تازالاۋ قوندىرعىسى ستراتەگيالىق ماڭىزدى "بوزوي" گاز قويماسىنىڭ تيىمدىلىگىن ارتتىرۋعا مۇمكىندىك بەرەدى. جاڭا قوندىرعى گاز وتكىزۋ كولەمىن تاۋلىگىنە 27 ملن تەكشە مەترگە جەتكىزەدى. بۇل وڭتۇستىك پەن باتىستاعى قازاقستاندىق تۇتىنۋشىلاردى ۇزدىكسىز گازبەن قامتاماسىز ەتۋگە مۇمكىندىك بەرمەك.

مەملەكەت باسشىسى "ينتەرگاز ورتالىق ازيا" اق اتالعان جوبانى ىسكە قوسۋ ارقىلى ەل ءۇشىن ماڭىزدى دۇنيەنى شەشكەنىن اتاپ ءوتتى.

"وزدەرىڭىز بىلەسىزدەر، ءبىز مۇناي مەن گازدى شىعاراتىن مەملەكەت بولا تۇرا، سول گازعا تاۋەلدى بولىپ كەلدىك. بىرەسە رەسەيدەن، بىرەسە وڭتۇستىگىمىزدەن. قىستا وڭتۇستىگىمىزدەگى قازاقتاردىڭ ءبارى توڭىپ-جاۋراپ، قايدان گاز الامىز دەپ، ۇكىمەت بولىپ، ەل بولىپ سۇراپ جۇردىك. ەندى، مىنە، ءقازىر سودان شىعۋ ءۇشىن ءبىز بۇل ماسەلەنى شەشتىك.  مىنا قۇبىر وتە قاجەت. ەلدى گازداندىرۋ ءۇشىن عانا ەمەس، ەكسپورتقا شىعاراتىن گازعا يە بولدىق. بولاشاقتا قاشاعاننان، قاراشىعاناقتان شىعاتىن گاز بار، كولەمى 70-80 ميللياردقا جەتكەن كەزدە، گازدى ەكسپورتتاۋشى ەل بولامىز. بۇل ءبىر. ەكىنشىدەن، ول گازدى قۇرعاق تۇرىندە بەرمەي، وڭدەپ، سول گازدان شىعاراتىن ونىمدەردى كوبەيتۋىمىز قاجەت. سوندىقتان، سىزدەر ەل ءۇشىن وتە ماڭىزدى دۇنيەنى شەشتىڭىزدەر. ەڭبەكتەرىڭىز تابىستى بولسىن"، — دەدى ەلباسى.