قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىحالىقوۆانىڭ ءتوراعالىق ەتۋىمەن جاڭارتىلعان قۇرامدا العاش رەت قازاقستان رەسپۋبليكاسى پرەزيدەنتىنىڭ جانىنداعى جاستار ساياساتى جونىندەگى كەڭەستىڭ حح وتىرىسى ءوتتى دەپ حابارلايدى Qamshy.kz اقپارات اگەنتتىگى. 

وتىرىسقا ۇكىمەت مۇشەلەرى، قازاقستان رەسپۋبليكاسى پارلامەنتىنىڭ دەپۋتاتتارى، ساراپشىلار، ەلىمىزدىڭ جاستار ۇيىمدارىنىڭ كوشباسشىلارى قاتىستى.

ءوزىنىڭ كىرىسپە سوزىندە گ.ءابدىحالىقوۆا جاستار ساياساتى -  2050 ستراتەگياسىنىڭ نەگىزگى ماقساتىنىڭ ءبىرى ەكەنىن اتاپ ءوتتى.  مەملەكەت باسشىسى: «ءبىزدىڭ جاستارىمىز وقۋعا، جاڭا ءعىلىم-بىلىمدى يگەرۋگە، جاڭا ماشىقتار الۋعا، ءبىلىم مەن تەحنولوگيانى كۇندەلىكتى ومىردە شەبەر دە ءتيىمدى پايدالانۋعا ءتيىس. ءبىز بۇل ءۇشىن بارلىق مۇمكىندىكتەردى جاساپ، ەڭ قولايلى جاعدايلارمەن قامتاماسىز ەتۋىمىز كەرەك» دەپ اتاپ وتكەن بولاتىن. 

شارا بارىسىندا جاستاردى جۇمىسپەن قامتۋعا، ونىڭ ىشىندە اۋىل جاستارىن جۇمىسپەن قامتۋدى قامتاماسىز ەتۋگە باعىتتالعان قازاقستان رەسپۋبليكاسى پرەزيدەنتىنىڭ جانىنداعى جاستار ساياساتى جونىندەگى كەڭەستىڭ 2018 جىلعا ارنالعان جۇمىس جوسپارى قاراستىرىلدى.

كەڭەس وتىرىسى اياسىندا ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ مەملەكەت تاراپىنان جاستاردى قولداۋعا باعىتتالعان ءىس-شارالاردىڭ، اتاپ ايتقاندا «تۇلەكتەر تاقتاسى»، «جاستار تاجىريبەسى»، «جاسىل ەل»، «ديپلوممەن اۋىلعا»  باعدارلامالارىنىڭ جۇزەگە اسىرىلۋى جايىندا باياندادى.

سوڭعى جىلدارى جاستار اراسىنداعى جۇمىسسىزدىق دەڭگەيى ايتارلىقتاي تومەندەگەن. 2002 جىلمەن سالىستىرعاندا 2017 جىلى 13،1% -دان 4% -عا دەيىن ازايعان. 

2017 جىلدىڭ 3-توقسانىندا بەلسەندى جاستار سانى 2 120،7 مىڭ، ونىڭ ىشىندە جۇمىسپەن قامتىلعاندارى – 2 036،0 مىڭ ادام بولدى.

كۇن تارتىبىندە قارالعان ماسەلەلەر بويىنشا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا، ءبىلىم جانە عىلىم ءمينيسترى ەرلان ساعادييەۆ، ۇلتتىق ەكونوميكا ۆيسە-مينيسترى سەرىك جۇمانعارين، قازاقستان جاستار كونگرەسىنىڭ اتقارۋشى ديرەكتورى ايدىن سابيتوۆ، «جاستار»  ورتالىعىنىڭ ديرەكتورى تالعات قالييەۆ بايانداما جاسادى.

كەڭەس قورىتىندىسىندا مەملەكەتتىك حاتشى جاستار ساياساتىن ىسكە اسىرۋ بويىنشا ءبىرقاتار ناقتى تاپسىرمالار بەردى.  

ەستەرىڭىزگە سالايىق، قازاقستان رەسپۋبليكاسى پرەزيدەنتىنىڭ جانىنداعى جاستار ساياساتى جونىندەگى كەڭەس ەلىمىزدەگى مەملەكەتتىك جاستار ساياساتىن جەتىلدىرۋ جونىندەگى شارالاردى ازىرلەۋگە باعىتتالعان نەگىزگى سۇحبات الاڭى بولىپ تابىلادى. كەڭەستىڭ جاڭارتىلعان قۇرامىنا جالپى سانى 51 ادام مۇشە. ولاردىڭ قاتارىندا ورتالىق مەملەكەتتىك ورگانداردىڭ ءبىرىنشى باسشىلارى، جاستار ۇيىمدارىنىڭ كوشباسشىلارى، بيزنەس، ءبىلىم، مادەنيەت، سپورت جانە ب ا ق وكىلدەرى بار.