اقتوبەدە كۇشتى جەلدىڭ سالدارىنان قالانىڭ باستى شىرشاسى قۇلاعان. جەرگىلىكتى بيلىك «جاڭا جىلعا دەيىن شىرشانى قايتا تۇرعىزامىز» دەپ ۋادە بەردى، دەپ جازادى Qamshy.kz اقپارات اگەنتتىگى.

«اۋا-رايىنىڭ قولايسىزدىعىنا قاراماستان اقتوبەنىڭ باستى شىرشاسىن قايتا قالپىنا كەلتىرۋ جۇمىستارى جاسالىپ جاتىر. مۇنى ەسكەرگەن بارشا الەۋمەتتىك جەلى قولدانۋشىلارىنا العىس ايتامىز. مۇنداي جاعداي قايتالانباس ءۇشىن ءتيىستى شارالار قولدانىلادى. الاڭدايتىن دانەڭە جوق. كۇنى ەرتەڭ قوناقتار مەن بالالار باستى شىرشانىڭ جانىندا سۋرەتكە ءتۇسۋىن جالعاستىراتىن بولادى»، - دەلىنگەن اقتوبە قالاسى اكىمدىگىنىڭ فەيسبۋكتەگى پاراقشاسىندا.

ال بۇدان بۇرىن استانا قالاسىنىڭ تۇران كوشەسىندەگى جاساندى شىرشا ورتەنگەن بولاتىن. وقيعا تاڭعى ساعات 06:19-دا ورىن العان. 06:38-دە ءورتتىڭ بەتى قايتتى. ءورت سوندىرۋشىلەردىڭ جىلدام قىزمەتىنىڭ ناتيجەسىندە ءتىلسىز جاۋ اينالاعا تاراپ ۇلگەرمەگەن. ءورتتىڭ شىعۋ سەبەبى ءالى انىقتالعان جوق.

الايدا تۇرعىندار الەۋمەتتىك جەلىدە ءوز نارازىلىقتارىن بىلدىرۋدە. ءتىپتى شىرشانى مۇلدەم ورناتپاۋ تۋرالى ۇسىنىس ايتقاندار دا كوپ بولدى.