Instagram جۇلدىزىنا اينالعان ايجان بايزاقوۆانى ءۇش كۇنگە قاماپ قويدى. بۇگىن كۇندىز ايجاندى المالى اۋداندىق ىشكى ىستەر باسقارماسىنا شاقىرعان، دەپ جازادى Qamshy.kz اقپارات اگەنتتىگى. بۇل تۋرالى tengrinews.kz حابارلادى. 

الماتى ءىىد باسپا ءسوز قىزمەتىنىڭ مالىمەتىنە سۇيەنسەك، 22 جاستاعى بويجەتكەندى كىشىگىرىم بۇزاقىلىق ارەكەتى بويىنشا شاقىرتقان. بۇدان بۇرىن الەۋمەتتىك جەلىدە قىزداردىڭ اقشاعا بولا الماتىلىق كلۋبتاردىڭ بىرىندە شەشىنىپ جاتقان ۆيدەوسى تاراعان.

«الماتى تۇرعىنى ا.س. بايزاقوۆانىڭ ىسىنە قاتىستى 434-باپ، اكىمشىلىك قۇقىقبۇزۋشىلىق تۋرالى ق ر كودەكسىنىڭ 1-بولىمىنە سايكەس حاتتاما جاسالدى. ونى قوعامدىق ءتارتىپتى جانە ەتيكالىق نورمالاردى بۇزۋ ارقىلى قوعامدىق ءىس-شارانى وتكىزگەنى ءۇشىن ايىپتادى. ءىستىڭ اقپاراتى الماتى قالاسىنىڭ مامانداندىرىلعان اۋدانارالىق اكىمشىلىك سوتىنا جىبەرىلدى. ا.س. بايزاقوۆانىڭ ءىسى تولىعىمەن دالەلدەندى. سوت شەشىمى بويىنشا ول ءۇش كۇنگە اكىمشىلىك قاماۋعا الىندى»، - دەلىنگەن الماتى قالاسىنىڭ مامانداندىرىلعان اۋدانارالىق اكىمشىلىك سوتىنىڭ حابارلاماسىندا.

الەۋمەتتىك جەلىدە حالىقتىڭ نازارىن وزىنە قاراتىپ، سىنىنا ۇشىراعان ايجان بايزاقوۆا كىناسىن مويىنداپ، ىستەگەن ىسىنە وكىنەتىندىگىن جەتكىزگەن.