سەۋلدە استاناداعى ەكسپو-2017 كورمەسىندە كورەي پاۆيلونىنىڭ جۇمىسىن ۇيىمداستىرعان كورەيا ازاماتتارى ماراپاتتالدى، دەپ ازاتتىققا سۇيەنە وتىرىپ جازادى Qamshy.kz اقپارات اگەنتتىگى. عالىمدار، ديزاينەرلەر جانە ستۋدەنتتەر استانادا وتكەن كورمەگە سىڭىرگەن ەڭبەگى ءۇشىن وڭتۇستىك كورەيا ۇكىمەتىنەن العىس الدى.
سالتاناتتى ماراپاتتاۋ راسىمىندە ساۋدا، ونەركاسىپ جانە ەنەرگەتيكا مينيسترلىگىنىڭ وكىلدەرى وڭتۇستىك كورەيانىڭ ەكسپو-2017-گە قاتىسۋى ءساتتى بولعانىن اتاپ ءوتتى. تاڭعى سامال ەلىنىڭ پاۆيلونى ەڭ كوپ تاماشالاناتىن نىساندار تىزىمىنە كىردى. ونى شامامەن 560 مىڭ ادام كورگەن.
سونىمەن قاتار حالىقارالىق كورمەلەر بيۋروسى وڭتۇستىك كورەيا پاۆيلونىن «ۇزدىك ديزاينى ءۇشىن» قولا مەدالمەن ماراپاتتادى. پاك ءبون دجۋن، ديزاينەرلىك كومپانيانىڭ وكىلى: - ەگەر استانا ەكسپو 2017ء-نى ميلان مەن شانحاي كورمەلەرىمەن سالىستىرساق، قازاقستانداعى كورەرمەندەردىڭ مىنەزى اشىق.
ءبىر نارسەگە قىزىقسا، كوڭىلىن جاسىرماي بىلدىرەدى. ۇيىمداستىرۋشىلاردىڭ جاقسى جۇمىسىنىڭ ارقاسىندا استاناداعى كورمە ءساتتى ءوتتى. كومپانيامىز قويىلعان مىندەتتەردى ءساتتى ورىنداعانى ءۇشىن سىيلىققا يە بولدى. ءبىز ۇكىمەتتىڭ وسىنداي باعاسىنا يە بولعانىمىزدى ماقتان تۇتامىز.
