الداعى جىلى استاناداعى تاكسيلەردىڭ مەملەكەتتىك نومىرلەرىنە ءبىرىڭعاي ءتۇس قولدانىلماق، دەپ حابارلايدى ەلوردا اكىمدىگىنىڭ مەديا ورتالىعى.
بۇل تۋرالى استانا قالاسىنىڭ جولاۋشىلار كولىگى باسقارماسىنىڭ قالاداعى تاكسي قىزمەتىنىڭ جۇمىسىن قورىتىندىلاۋ تۋرالى وتكىزگەن جيىندا بەلگىلى بولدى.
«2018 جىلى تاكسيلەردىڭ مەملەكەتتىك نومىرلەرىنە ءبىرىڭعاي تۇستەر گامماسىن قولدانۋ بولىگىندە وزگەرتۋلەر مەن تولىقتىرۋلار ەنگىزۋدى جوسپارلاپ وتىر.
الەمدىك تاجىريبە كورسەتكىشتەر بويىنشا، دامىعان بارلىق ەلدەرىندە اۆتوموبيل تاكسيلەرىمەن جولاۋشىلار مەن باگاجداردى زاڭدى تاسىمالدايتىن تاكسي كولىك قۇرالدارىنا مەملەكەتتىك تىركەۋ نومىرلىك بەلگىلەرىنە ءبىرىڭعاي ءتۇستى گامما قولدانىلادى. وسىنداي جاڭا ەنگىزۋلەر جولاۋشىلار مەن قاداعالاۋ ورگاندارىنا زاڭسىز تاسىمالداۋشىلار اراسىندا رەسمي تاكسيلەردى اجىراتۋعا مۇمكىندىك بەرەدى»، - دەلىنگەن باسقارما تاراتقان حابارلامادا.
سونىمەن بىرگە، الداعى ۋاقىتتا قالاداعى تاكسي كولىكتەرى گازعا كوشىرىلەدى.
بۇگىنگى كۇنى 150 كولىككە گازبالوندىق قۇرال ورناتىلدى. 2018 جىلى شامامەن 500 تاكسي اۆتوموبيلدەرىن گازعا اۋىستىرۋ جوسپارلانۋدا.
