ۇلتتىق ارنا باسشىسى ەرلان قارين الەۋمەتتىك جەلىدە قىزۋ تالقىعا تۇسكەن "قوزى كورپەش-بايان سۇلۋ" تەلەحيكاياسىنا قاتىستى پىكىر ءبىلدىردى، دەپ حابارلايدى Qamshy.kz اقپارات اگەنتتىگى. 

ەرلان قارين ءوز پىكىرىن Facebook الەۋمەتتىك جەلىسىندەگى جەكە پاراقشاسىندا جازدى.

"كەشەلى بەرى «قوزى كورپەش-بايان سۇلۋ» تەلەحيكاياسى جايلى پىكىرلەرىڭىزدى كورىپ، ەستىپ جاتىرمىز. ۇناتىپ جاتقاندار دا، ۇناتپاي جاتقاندار دا بار. دەگەنمەن، ءوزىمىزدىڭ وتاندىق تەلەونىمنىڭ شىعىپ، وسىنداي رەزونانس تۋدىرتىپ، تەلەحيكاياعا دەگەن ۇلكەن قىزىعۋشىلىق تانىتىپ جاتقاندىعى قۋانتادى. سەبەبى، قانشاما جىلدار بويى وتاندىق تەلەارنالاردا شەتەلدىك تەلەحيكايالاردىڭ سانى باسىم بولىپ كەلدى. ەندى، مىنە كورەرمەندەرگە ءوز ونىمدەرىمىزبەن شىعىپ جاتىرمىز. 2009 جىلدان بەرى ءبىزدىڭ كورپوراسيا 80-گە جۋىق وتاندىق تەلەحيكايانى كورەرمەن نازارىنا ۇسىنىپتى. ءبىز بۇل جۇمىستى ءالى دە جالعاستىرۋدامىز. بيىلعى جىلدىڭ وزىندە مەلودراما، دراما، تاريحي نەمەسە ەكشن جانرلارىنداعى تەلەحيكايالاردى ءتۇسىرۋدى قولعا الدىق. قازىرگى ماقساتىمىز كورەرمەنگە ءار ءتۇرلى جانرداعى كونتەنت ۇسىنۋ. 
«قوزى كورپەش-بايان سۇلۋ» تەلەحيكاياسىنا كەلسەك، ارينە كەمشىلىكتەر بار، بەلگىلى ءبىر سايكەسسىزدىكتەردى دە جوققا شىعارمايمىز. ءبىراق تا، سونىمەن قاتار، بۇل كينو ەمەس تەلەحيكايا ەكەنىن دە ۇمىتپاعاندارىڭىز ءجون. جانە دە بۇل وتە شاعىن تەلەxيكايا. سونداي-اق، شىن مانىسىندە تەليەۆيدەنيەدە نەمەسە كينو سالاسىندا بولسىن تولىقتاي ءبىر سايكەستىك بولۋ كەرەك دەگەن قاتىپ قالعان تالاپ جوق. ءتىپتى، الەمدىك دەڭگەيدەگى ادەبي شىعارمالاردى دا ەكرانيزاسيالاعاندا نەشە ءتۇرلى پىكىرتالاستار ورىن الىپ جاتادى. دەگەنمەن وسىنداي تاريحي تۋىندىلار كەرەك. ال ورىن العان ءتۇرلى قاتەلىكتەردى الدىن الۋ ءۇشىن ءبىز اۋتسورسينگ كومپانيالارمەن جۇمىس جاساۋ ءتارتىبىن وزگەرتەتىن بولامىز، ونى جاقىندا كەلىسىپ قويعانبىز، سوسىن تەلەحيكايالاردى قابىلداۋ بويىنشا كوركەمدىك كەڭەستىڭ جۇمىسىن دا قولعا الماقپىز. ءبىز سىزدەردىڭ بارلىق پىكىرلەرىڭىزدى ەسكەرۋدەمىز. بولاشاقتا دا كورەرمەندەر مەن مامانداردىڭ تالاپتارىنا ساي ءونىم دايىنداۋعا ۇمتىلاتىن بولامىز.
ال، بىزگە كەلىپ ءتۇسىپ جاتقان ولشەمدەرگە سايكەس، بۇل تەلەحيكايا جاستار اراسىندا ۇلكەن قىزىعۋشىلىق تۋدىرتتى جانە كورسەتىلىم دەڭگەيى وتە جوعارى كورسەتكىشتەرگە يە بولدى. 
ەڭ باستىسى، الداعى ۋاقىتتا ودان دا قىزىقتى جانە ساپاسى جوعارى تۋىندىلار كۇتىپ تۇرعانىن ايتا كەتەيىن. اتاپ ايتقاندا، قازاق زيالىلارىنىڭ ازاتتىق ءۇشىن كۇرەسى مەن ءومىرىن بەينەلەيتىن 14 ءبولىمدى «تارزامان» تەلەحيكاياسىنىڭ ءتۇسىرىلىمى اياقتالدى. ونى الداعى جىلدىڭ باسىندا سىزدەرگە ۇسىناتىن بولامىز. ۇلتتىق ارنانىڭ تەلەونىمدەرىن قاراپ، ۇلكەن قىزىعۋشىلىق ءبىلدىرىپ وتىرعاندارىڭىزعا راحمەت!" - دەپ جازادى ەرلان قارين.