الماتىدا 29، 30 جەلتوقسان كۇندەرى «تاۋەلسىزدىككە تارتۋ» اتتى ايتىس ءوتتى، دەپ جازادى Qamshy.kz ءتىلشىسى.

ءجۇرسىن ەرماننىڭ باسقارۋىنداعى ايتىس اقىندارى مەن جىرشى، تەرمەشىلەردىڭ حالىقارالىق وداعى ۇيىمداستىرعان ايتىسقا كەلەدى دەپ حابارلانعان رينات زايتوۆ، ديدار قامييەۆ سىندى كەيبىر اقىندار كەلگەن جوق. ايتىسقا قاتىسقان 18 اقىننىڭ ءبارى بيىل رەسپۋبليكانىڭ ءار ايماقتارىندا وتكەن ءتۇرلى ايتىستاردىڭ جەڭىمپازدارى.

ايتىس ناتيجەسى بويىنشا 8 اقىنعا جۇلدە بەرىلسە قالعان 10 اقىنعا 100 مىڭ تەڭگەدەن شابىتتاندىرۋ ماقساتىندا اقشالاي سىيلىق تاپسىرىلدى. باس جۇلدە «ايتىستىڭ اقتانگەرى» اتاعى مەن تەمىرتۇلپار ايبەك قالييەۆكە بۇيىردى. 1-ورىن جانسايا مۋسيناعا (1ملن) بۇيىرسا، 2-ورىن ەركەبۇلان قاينازار مەن مەيىربەك سۇلتانحانعا (500 مىڭنان)، 3-ورىن ەرشات قايبولدين، قاليجان بىلداشيەۆ، تىلەگەن ءادىلوۆ سىندى 3 ادامعا 200 مىڭ تەڭگەدەن بەرىلدى.

وعان قوسا «تاس كرەديت» كومپانياسىنىڭ باس ديرەكتورى دۋلات تاستەكەيەۆتىڭ ارنايى جۇلدەسى جالپى كولەمى 1 ملن 800 مىڭ  تەڭگەلىك اي سايىنعى 150 مىڭ تەڭگەدەن ستەپەنديا اسەم ەرەجەقىزىنا بۇيىردى. ال، تورەعالي تورەالى ءوز اتىنداعى قوردىڭ ارنايى سىيلىعى مىڭ دوللاردى اسپانبەك شۇعاتايەۆقا تابىستادى.

ايتا كەتسەك، وسىدان ءبىر اپتا ۋاقىت بۇرىن عانا ءدال وسىنداي اتپەن الماتىداعى «الاتاۋ» ءداستۇرلى ونەر تەاترىندا ايتىس وتكەن بولاتىن. وعان قوسا 5 جىلدان بەرى ءداستۇرلى بولىپ قالعان «التىن دومبىرا» ايتىسى دا اقتوبەدە تۇسىنىكسىز جاعدايدا وتكەن ەدى. باسىندا «جىر ارقاۋى — جاڭعىرۋ» دەپ حابارلانعان ايتىستىڭ جۇلدەسى تاپسىرىلاردا بيىلعى «التىن دومبىرا» ايتىس ەكەنى حابارلانعان. ول ايتىستى مادەنيەت جانە سپورت مينيسترلىگى ۇيىمداستىرعان. وعان قاتىسقان اقىندار وسى جولعى الماتىداعى ايتىسقا قاتىسقان جوق. ال الماتىداعى ايتىستى جەكەلەي كاسىپكەرلەر قارجىلاندىرعان.

ايتىستىڭ جۇلدەسىن تاپسىرار كەزدە قازىلار القاسىنا ءتوراعالىق ەتكەن ءاسانالى ءاشىموۆ «ايتىستىڭ ەڭ جوعارى اتاعى — ايتىستىڭ اقتانگەرى» دەپ مالىمدەدى. ايتىسقا سونىمەن قوسا «ايقىن» گازەتىنىڭ باسشىسى نۇرتورە ءجۇسىپ، تانىمال ايتىس اقىندارى سەرىك قالييەۆ، داۋلەتكەرەي كاپ ۇلى، باۋىرجان حاليوللا، «قازاق ادەبيەتى» گازەتىنىڭ باس رەداكتورى جاناربەك ءاشىمجاندار قازىلىق ەتتى.