قىرعىز رەسۋپبليكاسىنىڭ پرەزيدەنتى سوورونباي جەەنبەكوۆ ەۋرازيالىق ەكونوميكالىق وداقتىڭ كەدەن كودەكسى تۋرالى كەلىسىمىن راتيفيكاسيالاۋ تۋرالى زاڭعا قول قويدى، دەپ حابارلايدى Qamshy.kz اقپارات اگەنتتىگى «قازاقپارات»-قا سىلتەمە جاساپ.

بۇعان دەيىن اتالعان زاڭعا ارمەنيا رەسپۋبليكاسى، بەلارۋس رەسپۋبليكاسى، قازاقستان رەسپۋبليكاسى مەن رەسەي فەدەراسياسىنىڭ باسشىلارى قول قويعان بولاتىن.

وسىلايشا، ەۋرازيالىق «بەستىكتىڭ» بارلىق مەملەكەتىندە جوعارعى بيلىك ورگاندارىمەن ەاەو كەدەن كودەكسى تۋرالى كەلىسىمدى بەكىتۋ كەزەڭى اياقتالدى.

«قازىرگى ۋاقىتتا ارمەنيا، بەلارۋس، قازاقستان جانە رەسەي ەلدەرىنىڭ سىرتقى ىستەر مينيسترلىكتەرىنەن جاڭا كەدەن كودەكسىنىڭ راتيفيكاسيالانعانى تۋرالى حابارلاندىرۋ الىندى»، - دەيدى ەۋرازيالىق ەكونوميكالىق كوميسسيانىڭ كەدەندىك سەرىكتەستىك بويىنشا ءمينيسترى مۇقاي قادىرقۇلوۆ.

مەملەكەت باسشىلارىنىڭ كەلىسىمدەرىنە سايكەس، ەۋرازيالىق ەكونوميكالىق وداقتىڭ كەدەن كودەكسى 2018 جىلدىڭ 1 قاڭتارىنان باستاپ كۇشىنە ەنىپ، 2010 جىلعى كەدەن وداعىنىڭ كەدەن كودەكسىنىڭ ورنىنا قولدانىلادى.

ەسكە سالا كەتسەك، ەاەو كەدەن كودەكسىن ازىرلەۋ 2013 جىلدان باستاپ جۇرگىزىلگەن بولاتىن. وداقتىڭ جاڭا كەدەن زاڭناماسىنىڭ جۇمىسىنا ەۋرازيالىق ەكونوميكالىق وداقتىڭ 300-گە تارتا ساراپشىسى، اتقارۋشى بيلىكتەگى مەملەكەتتىك ورگانداردىڭ جانە ەاەو بيزنەس-بىرلەستىكتەرىنىڭ وكىلدەرى اتسالىستى. ەاەو كەدەن كودەكسىنىڭ ماقساتى - بارىنشا تىكەلەي ارەكەت ەتۋ ءۇشىن ءبىرىڭعاي كەدەندىك زاڭناما جاساۋ بولىپ تابىلادى.