قازاقستاننىڭ بۇۇ جانىنداعى تۇراقتى وكىلى قايرات وماروۆ بۇۇ قاۋىپسىزدىك كەڭەسىنىڭ ءتوراعاسى رەتىندە تۇڭعىش باسپا ءسوز ءماسليحاتىن وتكىزدى، دەپ جازادى Qamshy.kz اقپارات اگەنتتىگى.

قازاقستان سىرتقى ىستەر مينيسترلىگىنىڭ (ءسىم) حابارلاۋىنشا، استانا بۇل مىندەتتى قاڭتاردىڭ 1-ىنەن 31-نە دەيىن اتقارادى.

بۇۇ قاۋىپسىزدىك كەڭەسىنە مۇشە ەلدەردىڭ تۇراقتى وكىلدەرى قاڭتار ايىنداعى ءتوراعالىق باعدارلاماسىن قاڭتاردىڭ 2ء-ى كۇنى قاراستىرىپ، سول كۇنى قاۋىپسىزدىك كەڭەسى جۇمىسىنىڭ باعدارلاماسى تۋرالى باسپا ءسوز ءماسليحاتىن وتكىزدى.

بريفينگ بارىسىندا ەلشى قانتاردا اتقارىلاتىن ءتوراعالىقتىڭ باعدارلاماسىن تانىستىردى. نەگىزگى ءۇش ءىس-شارا جوسپارلانۋدا:

1) ەلباسى نۇرسۇلتان نازاربايەۆتىڭ قاتىسۋىمەن وتەتىن جاپپاي قىرىپ-جوياتىن قارۋدى تاراتپاۋ بويىنشا وتىرىس. 

2) قازاقستان سىرتقى ىستەر ءمينيسترى قايرات ءابدىراحمانوۆتىڭ توراعالىعىمەن ورتالىق ازيا جانە اۋعانستان بويىنشا پىكىرسايىس. كەزدەسۋگە وا جانە اۋعانستاننىڭ سىرتقى ىستەر مينيسترلەرى قاتىسادى.

3) تاياۋ شىعىس بويىنشا ەلشىلەر دەڭگەيىندەگى توقساندىق پىكىرتالاستار.

بۇدان وزگە كولۋمبياداعى بەيبىت پروسەسى، سيرياداعى جاعداي، افريكاداعى جەتى بىتىمگەرشىلىك وپەراسياعا شولۋ جانە تاعى باسقالارى تالقىلانباق.

50 مينۋتقا سوزىلعان باسپا ءسوز ءماسليحاتىندا بۇۇ جانىنداعى تىلشىلەر يران، سولتۇستىك كورەيا، يزرايل-پالەستينا جانجالى، پاكىستان، يەمەن، ميانما، كليماتتىڭ وزگەرۋى جونىندە ساۋالداردى قويدى.

قاڭتاردىڭ 18ء-ى كۇنى قازاقستان پرەزيدەنتى نۇرسۇلتان نازاربايەۆتىڭ توراعالىعىمەن بۇۇ قاۋىپسىزدىك كەڭەسى مۇشەلەرىنىڭ "جاپپاي قىرىپ-جويۋ قارۋىن تاراتپاۋ: سەنىمدى نىعايتۋ شارالارى" تاقىرىبىندا جوعارى دەڭگەيدەگى تاقىرىپتىق پىكىرتالاستارى وتەدى. ساپار بارىسىندا، بۇعان دەيىن حابارلانعانداي، نازاربايەۆ اقش پرەزيدەنتى دونالد ترامپپەن كەزدەسەدى دەپ جوسپارلانعان.

استانا بۇۇ قاۋىپسىزدىك كەڭەسىنىڭ ءتوراعاسى قىزمەتىندەگى باسىمدىقتارى رەتىندە يادرولىق قارۋسىز الەمدى جاقىنداتۋ؛ جاھاندىق سوعىس قاتەرىن بولدىرماۋ جانە جەرگىلىكتى جانجالداردى رەتتەۋ؛ ايماقتىق قاۋىپسىزدىك پەن ىنتىماقتاستىقتى نىعايتۋدا ورتالىق ازيانىڭ مۇددەلەرىن ىلگەرىلەتۋ؛ تەرروريزمگە قارسى كۇرەس جانە وزگە ماقساتتاردى اتاپ وتىر.

قازاقستان بيلىگى تاۋەلسىزدىگىن جاريالاعالى بەرى وتكەن 26 جىلدىڭ ىشىندە ەلدىڭ ۇلكەن جەتىستىكتەرگە قول جەتكىزگەنى جانە الەمگە تانىمال بولعانى تۋرالى ايتادى. حالىقارالىق قۇقىق قورعاۋشى ۇيىمدار رەسمي استانانى ەلدە وزگە پىكىردەگىلەردى قۋدالاپ، نەگىزگى قۇقىقتار مەن بوستاندىقتاردى شەكتەيتىنى جانە تۇرمەدە ساياسي تۇتقىنداردى ۇستاپ وتىرعانى ءۇشىن سىناپ كەلەدى.