يت جىلى الەم حالقىن قانداي ماڭىزدى وقيعالار كۇتىپ تۇر؟ الەم جانە قازاقستان ءۇشىن ماڭىزدى وقيعالاردى Qamshy.kz اقپارات اگەنتتىگى Sputnik قازاقستان-عا سىلتەمە بەرىپ  نازارلارىڭىزعا ۇسىنادى.

الەمدىك ساياسات

2018 جىلدىڭ 1 قاڭتارىنان باستاپ قازاقستان بۇۇ قاۋىپسىزدىك كەڭەسىنە ءتوراعالىق ەتەدى. كەڭەستىڭ تۇراقتى ەمەس مۇشەلەرى بۇل قىزمەتكە كەزەكپەن كىرىسەدى. ءتوراعالىقتىڭ نەگىزگى ماسەلەسى ورتالق ازيا مەن اۋعانستان بويىنشا قك قۇجاتىن (قارارلار، ءتوراعانىڭ مالىمدەمەسى) قابىلداۋ بولماق.

سيرياداعى احۋال بيىل دا الەم حالقىنىڭ باستى نازارىندا بولادى. 2017 جىلدىڭ سوڭىندا رەسەي پرەزيدەنتى ۆلاديمير پۋتين ءساتتى جۇرگىزىلگەن وپەراسيادان كەيىن سيريادان رەسەيلىك اسكەريلەردىڭ شىعارىلعانى تۋرالى مالىمدەگەن ەدى. سيريا پرەزيدەنتى باشار اسادتىڭ بولاشاعى، دەەسكالاسيا ايماقتارى، شيەلەنىستىڭ جاڭا وشاقتارى – وسى جانە وزگە دە سۇراقتاردىڭ جاۋابى 2018 جىلى بەلگىلى بولۋى مۇمكىن.

استانادا ورتالىق ازيا ەلدەرى باسشىلارىنىڭ ءسامميتى ءوتۋى ىقتيمال. وڭىرلىك مەملەكەتتەردىڭ باسشىلارى مۇنداي فورماتتا كوپتەن باس قوسپادى. الايدا ءسىم باسشىسى قايرات ءابدىراحمانوۆ ۇسىنعان جاڭا كەزدەسۋدىڭ وتەتىنى-وتپەيتىنى ازىرگە بەلگىسىز.

استانانىڭ مەرەيتويى 

بيىل ەلوردانىڭ 20 جىلدىق مەرەيتويى كەڭ اۋقىمدا اتالىپ وتەتىنى انىق. مەرەكەنى ۇيىمداستىرۋ ءۇشىن ارنايى كوميسسيا قۇرىلدى. وعان پرەزيدەنت اكىمشىلىگىنىڭ باسشىسى ادىلبەك جاقسىبەكوۆ جەتەكشىلىك ەتەدى.

تۇجىرىمداماعا سايكەس، مەرەيتوي ءۇش كەزەڭ بويىنشا اتالىپ وتپەك: دايىندىق – 2017 جىلدىڭ 10 جەلتوقسانىنا دەيىن، نەگىزگى – 2017 جىلدىڭ 10 جەلتوقسانىنان 2018 جىلدىڭ 6 شىلدەسىنە دەيىن، مەرەكەدەن كەيىن – 2018 جىلدىڭ 6 شىلدەسىنەن 2018 جىلدىڭ 31 جەلتوقسانىنا دەيىن.

پرەزيدەنت سايلاۋى

رەسەيدە 18 ناۋرىزدا پرەزيدەنت سايلاۋى وتەدى. نە دەگەنمەن، قازاقستان ءۇشىن كورشى مەملەكەتتى كىم باسقاراتىنى ماڭىزدى ەكەنى ايقىن. سەبەبى قوس ەلدى بايلانىستىراتىن ورتاق دۇنيە جەتەرلىك. بارىنەن بۇرىن، سايلاۋشىلارعا پرەزيدەنت تاعىنا تالاساتىن كسەنيا سوبچاكتىڭ قانشا داۋىس جينايتىنى قىزىقتى بولاتىن سياقتى.

سونداي-اق، 2018 جىلى فينليانديا مەن گرۋزيادا دا پرەزيدەنت سايلاۋى وتەدى. ايتا كەتسەك، بيىل گرۋزيادا مەملەكەت باسشىسى سوڭعى رەت جالپىحالىقتىق داۋىس بەرۋ ارقىلى سايلانادى. 2024 جىلدان باستاپ پرەزيدەنتتى 300 وكىلدەن قۇرالعان سايلاۋشىلار القاسى سايلايدى.

ءساۋىر ايىندا ميلليونداعان تۇرعىننىڭ نازارى بوستاندىق ارالىنا اۋادى. كۋبالىق ريەۆوليۋسيونەر ءارى فيدەل كاسترونىڭ ءىنىسى راۋل كاسترو 2017 جىلدىڭ سوڭىندا مەملەكەت باسشىسى تاعىن بوساتاتىنىن مالىمدەگەن ەدى.

بۇعان قوسا،  مولدوۆا مەن ليۆاندا پارلامەنت سايلاۋى وتەدى.

سپورت

سپورت جارىستارى ءار جىل سايىن ۇزىلمەيتىن ءداستۇرلى شارا دەسەك تە بولادى. بيىل، اسىرەسە، ەكى ءدۇبىرلى دودا ەل نازارىنا ءىلىنىپ وتىر: قىسقى وليمپيادا ويىندارى مەن فۋتبولدان الەم چەمپيوناتى.

قىسقى وليمپيادا 9-25 اقپان ارالىعىندا وڭتۇستىك كورەيانىڭ ءپحونچحان قالاسىندا وتەدى. ال فۋتبولدان الەم چەمپيوناتى رەسەيدىڭ 11 قالاسىندا 12 ستاديوندا وتەدى دەپ جوسپارلانعان.

سونىمەن قاتار، بيىل جازعى ازيا ويىندارى دا جالاۋىن جەلبىرەتەدى. بايراقتى باسەكە يندونەزيا استاناسى دجاكارتا مەن پالەمبانگ قالاسىندا وتپەك.

مادەنيەت

مادەنيەت سالاسىنىڭ باستى وقيعاسى – حالىقارالىق "ەۋروۆيدەنيە" بايقاۋى. كونكۋرس 8-12 مامىر ارالىعىندا پورتۋگاليا استاناسى ليسسابوندا وتەدى.

الايدا، قازاقستاندىقتار ءۇشىن بيىل "بالالار ەۋروۆيدەنيەسى" قىزىقتى بولماق. سەبەبى مۋزىكا بايقاۋىندا العاش رەت كىشكەنتاي وتانداسىمىز دانەليا تولەشوۆا ب ا ق سىنايدى. ۋكراينالىق "بالالار داۋىسى" شوۋىنىڭ جەڭىمپازى تبيليسيگە بارادى. كونكۋرستىڭ فينالى 26 قاراشاعا جوسپارلانعان.