الماتىدا كولىك رەفورماسىن جانە قوعامدىق كولىك جۇيەسىن تۇراقتاندىرۋ اياسىندا جىلجىمالى سوستاۆتى جاڭالاۋ جانە باعىتتار جەلىسىن ۇلعايتۋ جۇمىستارى جۇرۋدە. بۇل تۋرالى الماتى قالاسى اكىمدىگىنىڭ باسپا ءسوز قىزمەت حابارلادى، دەپ جازادى Qamshy.kz اقپارات اگەنتتىگى.

الماتى اكىمى باۋىرجان بايبەك جۇمىس ساپارى بارىسىندا №12 باعىتى بويىنشا «قازاقستان» قوناق ۇيىنەن «مەدەۋ» بيىك مۇز ايدىنىنا دەيىن باراتىن جاڭا اۆتوبۋستاردى كوردى.

الماتىدا بيىلعى كولىك رەفورماسى اياسىندا سىيىمدىلىعى ءارتۇرلى 388 اۆتوبۋس الىندى، ولاردىڭ 195–ءى باعىتتار بويىنشا قىزمەت كورسەتۋدە، تاعى 200 جاڭا اۆتوبۋس قالاعا كەلدى جانە ولار كەزەڭدەر بويىنشا جولعا شىعادى. ءوز كەزەگىندە جەكە تاسىمالداۋشىلار دا 254 جاڭا اۆتوبۋس الدى،ولاردىڭ 91–ءى قالا جولدارىندا.

جالپى قالانىڭ اۆتوبۋس پاركىنىڭ 30%-عا جاڭارۋى جانە باعىت جەلىسىنىڭ ۇلعايۋى جولاۋشىلار لەگىن 20،6% ارتتىردى. ەگەر 2016 جىلى 174،6 ملن. ترانزاكسيالانسا، 2017 جىلى 220،1 ملن. ترانزاكسيالاندى. تاسىمالداۋشى جوسپارلى شىعۋدى قامتاماسىە ەتە الماسا، ينتەرۆال مەن جىلجىمالى سوستاۆتى جاڭارتۋ «الماتىەلەكتروترانسقا» بەرىلەدى. مىسالى، №70 باعىتتا اۆتوبۋستار جاڭاردى، ينتەرۆال قىسقاردى، سونىڭ ارقاسىندا جولاۋشىلار لەگى 12 ەسە ءوستى، ياعني تاۋلىگىنە 395 ادامنان 4،6 مىڭ ادامعا دەيىن جەتتى. جاقىندا 18 مەترلى اۆتوبۋس- گارموشكالار №201 باعىتى بويىنشا جۇرە باستادى، ول كۇنىنە 11،6 مىڭ ادامدى تاسىمالداۋدا، بولجامداعى جولاۋشىلار لەگى – 25 مىڭ ادام.

№12 باعىتى بويىنشا جولعا شىققان 12-مەترلى تومەن ەدەندى اۆتوبۋستار ەۆرو-5 ەكولوگيالىق سىنىپقا ساي، سىيىمدىلىعى 100 ادامنان جوعارى، كونديسيونەرلەرمەن، ۆيدەوباقىلاۋ كامەرالارىمەن،پاندۋستارمەن جانە باسقالارمەن تولىق جابدىقتالعان. اتالعان باعىتتى «الماتىەلەكتروترانس» ج ش س ۇيىمداستىرعان، جاي كۇندەرى اۆتوبۋستار اراسىنداعى ينتەرۆال التى مينۋتقا قىسقارعان، ال دەمالىس كۇندەرى ەكى مينۋتقا ازايعان. بوساعان اۆتوبۋستاردى «Green Bus company» ج ش س №120 باعىتتى كۇشەيتۋ ءۇشىن پايدالانادى، كەيىن بۇل باعىت اينالمالى بولادى.

ەسكە سالساق، بۇرىندارى الماتىدا كولىكتى رەفورمالاۋ اياسىندا №22، 70، 86، 65، 103، 50، 126، 112 باعىتتارى بويىنشا جاڭا اۆتوبۋستار جولعا شىعىپ، №77 باعىت قايتا اشىلىپ، كولىكتەر №201 ماگيسترالدى باعىتى بويىنشا جۇرە باستاعان ەدى. كورشى وبلىستان قالاعا قوسىلعان ەلدى مەكەندەرگە تولىق كولىك قىزمەتىن كورسەتۋ ماسقاتىندا سەگىز باعىت اشىلعان بولاتىن.