الەۋمەتتىك جەلىدە ايەلدەرگە قول كوتەرۋ ماسەلەسى تۋراسىندا ريزابەك باتتالوۆ ايتقان ۋاعىزدىڭ ۆيدەوسى تاراعان. الايدا اتالمىش ۆيدەونىڭ وسىدان ءۇش جىل بۇرىن تاسپاعا جازىلعانى انىقتالدى. بۇل تۋرالى قمدب باسپا ءسوز حاتشىسى اعابەك قونارباي ۇلى ءوزىنىڭ فەيسبۋكتەگى پاراقشاسىندا مالىمدەدى، دەپ حابارلايدى Qamshy.kz اقپارات اگەنتتىگى.
«ريزابەك باتتال ۇلىنىڭ: "ايەلدى اركەز ۇرىپ تۇرۋعا بولادى"، - دەگەن ۋاعىزىنا قاتىستى تۇسىنىكتەمە سۇراعان ارىپتەستەرىمە مىناداي ماسەلەلەردى مالىمدەيمىن:
بىرىنشىدەن، الەۋمەتتىك جەلىدە تاراعان بەينە ماتەريال وسىدان ءۇش جىل بۇرىن تاسپاعا جازىلعان. وسى ۆيدەو ءقازىر قانداي "قاجەتتىلىكتىڭ" نەگىزىندە قايتا جاريالانىپ جاتقانىن ءوز باسىم تۇسىنبەدىم.
ەكىنشىدەن، ريزابەك باتتال ۇلى وسىعان دەيىن يمامدىق قىزمەتتە بولماعان. اقپاراتتىق-ناسيحات توبىنىڭ مۇشەسى رەتىندە جاماعات تاراپىنان تۇسكەن ساۋالعا ازاماتتىق كوزقاراسىن بىلدىرگەن. بۇگىندە الماتىداعى "نۇر مۇباراك" ۋنيۆەرسيتەتىندە قىزمەت ەتىپ جۇرگەن ر.باتتالۇلىن "يمام" دەپ اتاۋ - تىلشىلەر تاراپىنان كەتكەن قاتە اقپارات. بۇعان جول بەرمەڭىزدەر!
ۇشىنشىدەن، كەز-كەلگەن ۋاعىزشىنىڭ شاريعاتتاعى شەتىن، نازىك ماسەلەنى ءوز تانىمى مەن تابيعاتىنا سالىپ تۇسىندىرۋىنە جول بەرىلمەيدى. بۇل - جەڭىل جاۋاپ بەرە سالاتىن جاعداي ەمەس. ءدىندى ادامدارعا قورقىتىپ ەمەس، سۇيىنشىلەپ جەتكىزىڭدەر نەمەسە سەندەردىڭ ارالارىڭداعى ەڭ قايىرلىلارىڭ - ايەلدەرىڭە جاقسى قاراعاندارىڭ دەگەن ماعىنادا كەلەتىن حاديستەر حالىققا كوبىرەك ناسيحاتتالۋى ءتيىس. جاعىمسىز مىنەز كورسەتكەن جارىمىزعا كوركەم تۇردە ءتۇسىندىرۋ، وعان ناسيحات ايتۋ، شىنايى جاناشىرلىق سەزىمىڭدى جەتكىزۋ، توسەكتە جالعىز قالدىرۋ، دالەلدەنگەن ايىبى ءۇشىن ۋاقىتشا سويلەمەي قويۋ، تاعى باسقا تاربيەنىڭ ادەپ شەڭبەرىندەگى امالدار قامشىنىڭ سوققىسىنان اسىپ تۇسەتىن تاسىلدەر. قيىنى - قيسىق قابىرعانى تۇزەيمىن دەپ ونى سىندىرىپ الۋ. ايەلدى كۇشپەن باعىندىرۋ - شاراسىزدىق، بالكىم السىزدىك. ر.باتتال ۇلىنىڭ ءسوزىن قوعام قابىلداماي جاتسا - بۇل تابيعي قۇبىلىس.
تورتىنشىدەن، قازاقستان مۇسىلماندارى ءدىني باسقارماسى ۋاعىز ايتۋدىڭ ادەبى مەن تارتىبىنە قاتىستى ارنايى ەرەجەنىڭ جوباسىن ازىرلەۋدە. ءتارتىپ ەرەجەسى ۋاعىز ايتۋدىڭ ءبىرىڭعاي جۇيەسىن قالىپتاستىرۋعا ىقپال ەتەدى»، - دەپ جازدى اعابەك قونارباي ۇلى.
