بۇل – اقىن سەرىك قاپشىقپاي ۇلىنىڭ سەكسەننىڭ سەڭگىرىندە تۇرىپ وقىعان ولەڭى بولاتىن. ءتورت جىل بۇرىن الماتىدا – جازۋشىلار وداعىنىڭ ساحناسىندا زاڭعارعا شىققان سەركەدەي ءمۇيىزى ايتىكتەنىپ، قاسقايىپ تۇرىپ وقىپ ەدى وسى ولەڭىن. جۇرت ءدۇر سىلكىنگەن.
"كيىم ءتۇرىن تاڭداساڭ، قوڭىرىنان دەۋشى ەدىڭ،
سونىڭدى ەندى ويلاسام، جانىڭ ەكەن ول سەنىڭ.
ەتىك ءتۇرىن تاڭداساڭ، بەرىگىنەن دەۋشى ەدىڭ،
سونىڭ ەندى ويلاسام، جانىڭ ەكەن ول سەنىڭ".
وسىلاي جەلكىلدەتىپ، جەلپىلدەتىپ باستالاتىن ۇزاق داستاندى سەكەڭ دوسى توقتارقان جەكىبايعا ارناعان بولاتىن. شىن مانىندە سەرىك قاپشىقپايدىڭ ءوزi وسىنداي كوركەم مىنەزدى، ەركi بەرىك، قايسار، ءتوزىمدى جان ەدى.
"مەنىكى مە قۇبىلا؟!
مەنىكى مە قۇبا تاڭ؟!
مەنىكى عوي كۇن مىنا،
مەنىكى عوي بۇل وتان"، – دەپ تەبiرەنەتiن اقىن.
جوعالتىپ العان باقىتىن، ايرىلىپ قالعان قىمباتىن ءبىر ساتكە تاۋىپ الىپ، كەۋدەسىنە باتىرا قۇشاقتاپ، تاعاتى تاۋسىلا ايعايلاعان كۋانىشتى جاننىڭ داۋىسى كەلەدى قۇلاعىڭا. ول – ايرىلىپ قالعان ازاتتىعىن، كوز جازىپ قالعان وتانىن قايتا تاپقان، قۇشاعىنا قاپسىرا قۇشقان جاننىڭ – اقىننىڭ داۋسى ەدى.
ءيا، سەكە، مىناۋ اتقان ازاتتىقتىڭ قۇبا تاڭى دا، قازاقتىڭ ازات ۇلى وتانى دا سىزدىكى: ەشكىمنىڭ تالاسى جوق، سەكە!
شىڭجاڭنىڭ شاۋەشەگىنەن شىققان ومارعازى ايتان، زاداقان مىڭباي، سەرىك قاپشىقپاي دەگەن كىسىلەر شىڭجاڭ قازاق پوەزياسىنىڭ مەكتەبىن قالىپتاستىرعان، ءبىر ءداۋىرىن جاساعان قۇبىلىس ەدى. بۇرىنىراق تا ومارعازى ايتان، وتكەن جىلى زاداقان مىڭباي قايتتى ومىردەن. ەندى بۇگىن سەرىك قاپشىقپايدىڭ دا اقىن جۇرەگى سوعۋىن توقتاتتى.
"ۋىتىن جايىپ ىسىكشە،
بىرەۋدىڭ اسسا اتاعى.
اتاعىم مەنىڭ كۇشىكشە.
ۇيشىگىندە جاتادى"،
- دەگەنى بار ەدى سەكەڭنىڭ. تىنباي ءوز جۇرەگىمەن سىرلاسىپ، تىنباي ولەڭ ورۋمەن عانا ءومىر ءسۇردى سەكەڭ. سەكسەننىڭ سەڭگىرىنە كەلگەنشە اتاعىن الدىعا سۇيرەپ، ارپالىسقان جان ەمەس ەدى ول. كوركەم مىنەزدى سەكەڭ جاساعان پوەزيا قازاق ءتىلىنىڭ سۇلۋ قۇبىلىسى – ءمىنسىز ولەڭدەر سەرىك قاپشىقپاي اتاعىن ۇيشىكتە قالدىرماس. تاۋەلسىزدىك نىعايار، "حالىق اعارار"، كازاقتىڭ كوركەم ءتىلى ۇستەمدىك قۇرار. سول كەزدە سەرىك قاپشىقپاي جاساعان كوركەم مۇرا دا، جالاۋىن جەلبىرەتىپ تۇعىرىندا تۇرار.
سەكە، تاۋەلسىز ەلىڭىزدە ەڭبەك ەتتىڭىز، "كاركىسى" بولدىڭىز، " ءبىراق ازات وتانى بار كىسى" بولدىڭىز جانە وعان كاناعات ەتتiڭiز... جانىڭىز ءجانناتتا بولسىن! ءسىز سۇيگەن وتان ماڭگى بولسىن!
جانازاڭىزدا ساپتا تۇرىپ، شاكiرتiڭiز، ءىنىڭىز: الماس احمەتبەك ۇلى.
(سۋرەتتە "تارباعاتاي" جۋرنالىنىڭ رەداكتورلارى: سەرىك قاپشىقباي، قۇمار دەمەسىن، الماس احمەتبەك ۇلى)
پىكىر قالدىرۋ