ەل پرەزيدەنتى نۇرسۇلتان نازاربايەۆ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا جاڭا جاھاندىق اقيقات جاعدايىنداعى باسەكەگە قابىلەتتىلىك جايلى ايتا كەلە، قازاقستان الەمگە مۇناي رەسۋرستارى جانە ءىرى حالىقارالىق باستامالارىمەن عانا ەمەس، مادەني جەتىستىكتەرىمەن دە تانىلۋى كەرەكتىگىن اتاپ ءوتتى. وسى ماڭىزدى جۇمىستا اكادەميالىق قوعامداستىق پەن ۋنيۆەرسيتەتتەردىڭ اتقارار ءرولى ەرەكشە.

جاڭا جىلدىڭ العاشقى كۇندەرىندە ءال-فارابي اتىنداعى قازاق ۇلتتىق ۋنيۆەرسيتەتىنىڭ دەلەگاسياسى يتاليانىڭ ايگىلى مادەني جانە تۋريستىك ورتالىعى ۆەنەسيادا ورنالاسقان كا’فوسكاري ۋنيۆەرسيتەتىندە بولدى. وقۋ ورنىنىڭ كوپ عاسىرلىق تاريحى مەن باي ءداستۇرى بار جانە ەۋروپا مەن الەمنىڭ ۇزدىك ۋنيۆەرسيتەتتەرىنىڭ ءبىرى بولىپ سانالادى.

سەرىكتەس ۋنيۆەرسيتەتتەر ەكى جىل بويى عىلىمي ىنتىماقتاستىق پەن ستۋدەنت الماسۋ جۇمىستارىن بەلسەندى جۇرگىزدى – قازىرگى تاڭدا باعدارلاما بويىنشا قازۇۋ-دىڭ 10 ستۋدەنتى كا-فوسكاري ۋنيۆەرسيتەتىندە ءبىلىم الىپ جاتسا، ءوز كەزەگىندە قازاقستان جاعى يتاليالىق جوعارى وقۋ ورنىنىڭ ستۋدەنتتەرىن قابىلداۋدا.

دامىپ كەلە جاتقان جەمىستى ىنتىماقتاستىقتىڭ ناتيجەسى رەتىندە رەسمي ساپار بارىسىندا كا-فوسكاري ۋنيۆەرسيتەتىندەگى قازاقستان ورتالىعىنىڭ جۇمىسى باستالدى.

رەسمي كەزدەسۋدە قازۇۋ رەكتورى عالىم مۇتانوۆ پەن كا-فوسكاري ۋنيۆەرسيتەتىنىڭ رەكتورى ميشەلە بۋگليەسي ەكى جاقتى ىنتىماقتاستىقتى ودان ءارى كەڭەيتۋ، قازاقستاندىق ورتالىقتىڭ دامۋى مەن جۇمىسىن العا جىلجىتۋ جونىندەگى سۇراقتاردى تالقىلادى. اتالمىش ورتالىقتىڭ قىزمەتى مامانداردى بىرگە دايارلاۋ اياسىندا اكادەميالىق الماسۋدى قولداۋعا، بىرلەسكەن ءعىلىمي-بىلىم بەرۋ جوبالارىن دامىتۋ جانە جۇزەگە اسىرۋعا، قازاقستاندىق جانە يتاليالىق اۆتورلاردىڭ كىتاپتارى مەن مونوگرافيالارىن اۋدارۋعا جانە ت.ب. باعىتتالعان.

قازاقستان ستۋدەنتتەرىنىڭ يتاليا ءتىلى مەن مادەنيەتىنە دەگەن قىزىعۋشىلىعىن نازارعا الا وتىرىپ، قازۇۋ بازاسىندا يتاليا ءتىلى مەن مادەنيەتى ورتالىعىن قۇرۋ جونىندە ۇسىنىس ايتىلدى. سەرىكتەس جوو-لاردا ورتالىقتاردىڭ اشىلۋى ىنتىماقتاستىقتى جاڭا ساپالى دەڭگەيگە كوتەرەدى، ال ولاردىڭ قىزمەتى قازاقستان مەن يتاليا اراسىنداعى دوستىق كوپىرىنە اينالاتىن بولادى.

سونداي-اق ساپار بارىسىندا ءعىلىمي-بىلىم بەرۋ جەتىستىكتەرى مەن قازاقستاننىڭ مادەني مۇراسىن تانىتۋعا باعىتتالعان ايتۋلى وقيعا ورىن الدى. ءال-فارابي اتىنداعى قازۇۋ ق ر ۇلتتىق اكادەميالىق كىتاپحاناسى جانە كا-فوسكاري ۋنيۆەرسيتەتىمەن بىرلەسە «قازاقستانمەن تانىسۋ: جاڭا جىبەك جولىن قارسى الۋ» اتتى حالىقارالىق كونفەرەنسيانى ۇيىمداستىرىپ وتكىزدى.

شارا يتالياداعى قازاقستان رەسپۋبليكاسىنىڭ ەلشىلىگى مەن قازاقستانداعى يتاليا ەلشىلىگىنىڭ قولداۋىمەن ءوتتى. قر-داعى يتاليا ەلشىسى ستەفانو راۆانيان كونفەرەنسيادا سويلەگەن سوزىندە قازاقستاننىڭ كەڭىنەن تانىلۋى ءۇشىن مۇنداي كەزدەسۋلەردىڭ ماڭىزدىلىعىن، سونىمەن قاتار ەكونوميكا سالاسىندا عانا ەمەس، ءبىلىم بەرۋ مەن عىلىمدا دا ەكىجاقتى قارىم-قاتىناستاردى كەڭەيتۋ قاجەتتىگىن تىلگە تيەك ەتتى. كا-فوسكاري ۋنيۆەرسيتەتىنىڭ ازيا جانە افريكا دەپارتامەنتىنىڭ ديرەكتورى الدو فەرراري قازۇۋ رەكتورىمەن وتكەن كەزدەسۋ جانە كونفەرەنسيا ەكى جوو قارىم-قاتىناسىن جاڭا دامۋ ساتىسىنا كوتەرگەنىنە نازار اۋداردى.

«بولاشاققا باعدار: رۋحاني جاڭعىرۋ» باعدارلامالىق ماقالاسىن جۇزەگە اسىرۋعا بەلسەنە كىرىسكەن ءال-فارابي اتىنداعى قازۇۋ ءبىرقاتار ءعىلىمي-بىلىم بەرۋ جانە مادەني جوبالاردى باستاپ، جۇزەگە اسىرۋدا.

وسىلايشا، ۋنيۆەرسيتەت حيميا جانە حيميالىق تەحنولوگيالار بويىنشا روستوك (گەرمانيا) جانە كاراچي (پاكىستان) قالالارىندا بىرلەسكەن زەرتحانالار اشتى، سۋكۋبا ۋنيۆەرسيتەتىمەن بىرگە كامپۋستاعى كامپۋس جوباسى بويىنشا جۇمىس اتقارىلۋدا، قازۇۋ پەكين شەت تىلدەر ۋنيۆەرسيتەتىنەن قازاقستان مادەني ورتالىعىن، ال شانحاي شەت تىلدەر ۋنيۆەرسيتەتىنەن قازاق ءتىلى مەن ادەبيەتى كافەدراسىن اشتى، ىستامبۇل جانە يوردانيا ۋنيۆەرسيتەتتەرىندە ءال-فارابي ورتالىعى قۇرىلعان، سونداي-اق نيدەرلاندىدا ءال-فارابي ورتالىعىن قۇرۋ ماقساتىندا جۇمىس جۇرگىزىلۋدە.