قازاقستان عالامدىق دارەجەدە ايەلدەردىڭ قورعالۋىنا ۇلكەن ۇلەس قوسىپ كەلەدى. قازاقپاراتقا قازاقستان تۋرالى وي-پىكىرىمەن بولىسكەن «بۇۇ-ايەلدەرى» (UN Women) بەيبىتشىلىك جانە قاۋىپسىزدىك قۇرىلىمىنىڭ باسشىسى پايۆي كاننيستو وسىلاي دەدى، دەپ حابارلايدى Qamshy.kz اقپارات اگەنتتىگى.

«ايەلدەردىڭ الەۋمەتتىك-ەكونوميكالىق مۇمكىندىكتەرى مەن قۇقىقتارىنىڭ قورعالۋىندا ءبىزدىڭ جۇمىسىمىزعا ەرەكشە ۇلەس قوسىپ جۇرگەن قازاقستانعا ريزاشىلىعىمىز مول. قازاقستاننىڭ ديپلوماتياسى بۇل باعىتتىڭ العا جىلجۋىندا زور ۇلەسىن قوسۋدا. انتيادرولىق كۇش-جىگەرىن تانىتا بىلگەن قازاقستان ادامزاتتىڭ كوپتەگەن حالىقارالىق ماسەلەلەرىن شەشۋدە، عالامداعى ايەلدەردىڭ جاعدايىنىڭ جاقسارۋىنا اتسالىسىپ كەلەدى»، - دەيدى ول.

 پ.كاننيستو ءوز سوزىندە جىل سايىن قورعانىس بيۋدجەتىنە بولىنەتىن قاراجاتتىڭ 1 پايىزىن بۇكىل الەمدەگى ەلدەردىڭ الەۋمەتتىك جانە ەكونوميكالىق دامۋىنا ءبولۋ تۋرالى قازاقستاننىڭ باستاماسىنا زور باعا بەردى.

«ءبىز قازاقستان پرەزيدەنتى نۇرسۇلتان نازاربايەۆتىڭ قاتىسۋىمەن يادرولىق قارۋلاردىڭ تاراتىلماۋى تاقىرىبىندا وتەتىن دەباتتاردى اسىعا كۇتىپ ءجۇرمىز. سونىمەن بىرگە، قازاقستان اۋعانستان ماسەلەسىنە ەرەكشە نازار اۋدارۋعا ۇندەيدى. البەتتە، بۇل باعىت اۋعان ەلىندەگى حالىقتىڭ، اسىرەسە ايەلدەردىڭ قۇقىعىن قورعاۋداعى جۇمىستى كۇشەيتە تۇسەرى داۋسىز»، - دەيدى ول.

ەسكە سالا كەتسەك، «بۇۇ-ايەلدەرى» - گەندەرلىك تەڭدىك پەن ايەلدەردىڭ قۇقىعى مەن ەكونوميكالىق مۇمكىندىكتەرىن كەڭەيتۋگە باعىتتالعان بۇۇ قۇرىلىمى. «بۇۇ-ايەلدەرى» بىرىككەن ۇلتتار ۇيىمىنا مۇشە مەملەكەتتەردى گەندەرلىك تەڭدىك بويىنشا الەمدىك ستاندارتتارىنا ساي بولۋعا شاقىرادى. سونىمەن بىرگە، ۇيىم مەملەكەتتەردىڭ ۇكىمەتتەرىمەن، ازاماتتىق قوعامداستىقتارىمەن بىرلەسە وتىرىپ، بۇكىل الەمدەگى ايەلدەر مەن قىزداردىڭ قۇقىعىن قورعاۋ ءۇشىن زاڭناما ازىرلەۋ، ساياسي ستراتەگيا قۇرۋ  جۇمىستارىن جۇرگىزەدى.