ساياسات ساحناسىندا كورىنبەي كەتكەن تۇلعالار تۋرالى ايتقاندا اسلان مۋسين مەن نۇرتاي ابىقايەۆ ويعا ورالادى. ۇزاق جىلدار بويى قازاقستاندا لاۋازىمدى قىزمەتتەر اتقارعان شەنەۋنىكتەرءدىڭ اتى ءقازىر كوپ اتالمايدى.

جاقىندا اسلان ءمۋسيننىڭ ۇلى شەتەلدە كوز جۇمعاندا ب ا ق بەتتەرىندە بۇرىنعى پرەزيدەنت اپپاراتى باسشىسىنىڭ ەسىمى قايتا اتالا باستادى.

ەستەرىڭىزگە سالا كەتەيىك، 24 جەلتوقساندا 38 جاستاعى اسىلبەك مۋسين ريگا قالاسىندا عيماراتتىڭ 15-قاباتىنان قۇلاپ قايتىس بولدى. اسلان ءمۋسيننىڭ ۇلى وزىنە قول جۇمسادى دەگەن بولجام بار.

وسى قايعىلا وقيعاعا دەيىن اسلان مۋسين توڭىرەگىندەگى دابىرا ءبىراز باسەڭدەپ قالعان ەدى. بىلتىر زەينەت جاسىنا جەتكەن شەنەۋنىكتى نۇرسۇلتان نازاربايەۆ وتستاۆكاعا جىبەرگەن.

وكىلەتتىلىگى توقتاعاننان كەيىن اسلان ءمۋسيندى بەلسەندى قىزمەتتە كورمەدىك. ول ءقازىر شەتەلدە تۇرادى دەگەن اقپارات بار. كەيبىر ساراپشىلار ءمۋسيننىڭ شەتەلگە كەتكەنى ونىڭ ءوزى ءۇشىن ءتيىمدى ەكەنىن ايتادى. بەيرەسمي دەرەكتەرگە سۇيەنسەك، ول بالا-شاعاسىمەن گەرمانيادا تۇرادى ەكەن. ساياساتكەر ءامىرجان قوسانوۆتىڭ پىكىرىنشە، اسلان مۋسين ساياسات ساحناسىنان كەتسە دە، نازاربايەۆ ونى كەز كەلگەن ۋاقىتتا بيلىككە قايتا شاقىرۋى مۇمكىن.

– بىزدە كەز كەلگەن شەنەۋنىكتىڭ تاعدىرى ەلباسىنىڭ قۇزىرىندا، ول قالاي شەشەدى – سولاي بولادى. وعان ەش تاڭ قالۋعا بولمايدى، - دەيدى ءامىرجان قوسانوۆ.

نۇرسۇلتان نازاربايەۆ الپىستى القىمداعان اسلان ءمۋسيندى قىزمەتىنەن بوساتقاندا ودان ساياسي استار ىزدەگەندەر بولدى. دەگەنمەن كوبى بۇل جاڭالىقتى وڭ وزگەرىسكە بالادى. سەبەبى ۇرپاقتار ساباستىعى، بۋىن الماسۋ سەكىلدى ۇردىستەر ساقتالعانىنا ريزا بولدى. كەز كەلگەن سالادا زەينەت جاسىنداعى ازاماتتاردىڭ جاستارعا ورىن بوساتقانى – قۇپتارلىق ارەكەت.

زەينەت جاسىنداعى شەنەۋنىكتەر قىزمەتىن جالعاستىرا بەرسە، بۇل – حالىقتىڭ قالتاسىن قاعىپ، قازىنانى ىسىراپ ەتۋ. سەبەبى مەملەكەت قىزمەتتەگى زەينەتكەرلەرگە ەكى ەسە شىعىندالادى. وعان زەينەتاقى تولەيدى – ءبىر، جالاقى تولەيدى – ەكى. شەنەۋنىكتەردىڭ جالاقىسى ورتاشا جالاقىدان الدەقايدا جوعارى ەكەنىن دە ەسكەرۋ كەرەك.

بۋىن الماسۋدىڭ جاڭاشىلدىق پەن جاڭا كوزقاراستى قالىپتاستىرۋ جولىندا ماڭىزى زور. سەبەبى جاستار جۇمىسقا تىڭ يدەيامەن كەلەدى. سايكەسىنشە، قازىرگى زامان تالابىنا ساي قولايلى جاعداي جاساپ، وڭ وزگەرىستەر ەنگىزۋگە قاۋقارلى. وسى ورايدا اسلان ءمۋسيننىڭ مەملەكەتتىك قىزمەتتەن كەتۋى – قۇپ الاتىن جاعداي.

ايتا كەتەيىك، اسلان مۋسين 2008-2012 جىلدارى پرەزيدەنت اپپاراتىن باسقاردى. اتىراۋ وبلىسىنىڭ اكىمى بولدى. ق ر ەكونوميكا جانە بيۋدجەتتى جوسپارلاۋ ءمينيسترى قىزمەتىن اتقاردى. ەسەپ كوميتەتىنىڭ ءتوراعاسى، قازاقستاننىڭ حورۆاتياداعى ەلشىسى بولدى.

2017 جىلى ءبىراز شەنەۋنىك وكىلەتتىلىگىن توقتاتقان ەدى. سونىڭ ءبىرى – نۇرتاي ابىقايەۆ. كەزىندە «سۇر كاردينال» اتانعان سۇستى تۇلعا نۇرسۇلتان نازاربايەۆتىڭ سەنىمدى سەرىگى رەتىندە ەستە قالدى.

ساياساتتانۋشى سەيداحمەت قۇتتىقادام نۇرتاي ابىقايەۆتى پرەزيدەنتتىڭ بارلىق قۇپياسىن بىلەتىن ادام دەپ سيپاتتايدى. ەكەۋىنىڭ ءبىر رۋدان، ءبىر وتباسىنان شىققانىن مەڭزەيدى.

قوعام بەلسەندىلەرىنىڭ ءبىرسىپىراسى نۇرتاي ابىقايەۆتىڭ 70 جاسىندا ساياسي ارەنادان كەتۋىن قالىپتى قۇبىلىس رەتىندە قابىلدادى. الايدا شەنەۋنىكتىڭ بيلىكتەن شەتتەتىلۋىن ەليتالار قاقتىعىسىنىڭ سالدارى دەگەندەر دە تابىلدى.

نۇرتاي ابىقايەۆتىڭ وتباسى شەتەلدە تۇرادى دەگەن اقپارات بار. بۇرىنعى شەنەۋنىكتىڭ ءوزى دە جاقىندارىنىڭ جانىندا بولۋى ىقتيمال.

بىلتىر نۇرسۇلتان نازاربايەۆ سول كەزدەگى سەنات دەپۋتاتى نۇرتاي ابىقايەۆتى قابىلداعاندا كوپشىلىك ونى جاقسىلىقتىڭ نىشانى دەپ ويلادى. نۇرتاي ابىقايەۆ جاڭادان جوعارى لاۋازىمعا تاعايىندالۋى مۇمكىن دەپ توپشىلادى. الايدا كوپ ۋاقىت وتپەي ابىقايەۆ زەينەت جاسىنا جەتۋىنە بايلانىستى قىزمەتىنەن بوساتىلدى.

ءامىرجان قوسانوۆ زەينەتكە شىعۋدىڭ وزىندە كلاندىق-ساياسي استار بار ەكەنىن ايتادى.

– ابىقايەۆ پەن ءمۋسيننىڭ، ارينە، ورنى بولەك، ويتكەنى ولار ەلباسىنىڭ ەڭ جاقىن سەرىكتەستەرى بولدى. بيلىكتىڭ ىشىندە نە بولىپ، نە قويىپ جاتقانىن جاقسى بىلەدى، تالاي قۇپياعا كۋا بولعان. بۇلار ساياسي ارەنادان كەتسە، ونىڭ ەسەسىنە ولاردىڭ تالاي قۇرداسى ءالى دە مەملەكەتتىك، باسشىلىق قىزمەتتەردە ءجۇر. مۋسين مەن ابىقايەۆ قۇيرىقتارىنا قوڭىراۋ بايلاپ جىبەرمەگەنىنە ءتاۋبا دەسىن، تىپ-تىنىش كەتپەي، ءىستى بولىپ كەتۋلەرى دە مۇمكىن ەدى، - دەدى ءامىرجان قوسانوۆ.