25 قاڭتار الماتى اكىمى باۋىرجان بايبەك تاتارستان رەسپۋبليكاسى پرەمەر-مينيسترىنىڭ ورىنباسارى ۆاسيل شايحرازييەۆپەن كەزدەستى، دەپ جازادى Qamshy.kz اقپارات اگەنتتىگى قالا اكىمدىگىنىڭ باسپا ءسوز قىزمەتىنە سىلتەمە جاساپ.

تاراپتار ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى نىعايتۋ ماسەلەلەرىن تالقىلادى.

مەگاپوليس اكىمى ەكى ەل حالىقتارىنىڭ تىعىز مادەني جانە تاريحي باۋىرلاستىعى ىسكەرلىك بايلانىستاردى نىعايتۋعا ىقپال ەتەتىنىن اتاپ ءوتتى. قازىرگى كەزدە قازاقستاندا شەتەلدەگى سانى جاعىنان ەڭ كوپ ەكىنشى تاتار قوعامداستىعى تۇرادى. قالاداعى ءۇش ەتنومادەني بىرلەستىكتەر مادەنيەتتى، ءتىلدى، تاتار حالقىنىڭ ءداستۇرىن دامىتۋدا ماڭىزدى جۇمىستاردى جۇزەگە اسىرىپ، ەلىمىزدەگى جالىپحالىقتىق بىرلىكتى نىعايتۋعا ايتارلىقتاي ۇلەس قوسۋدا.

ءوز كەزەگىندە ۆاسيل شايحرازييەۆ الماتى مەن قازان اراسىنداعى ءوڭىرارالىق ىنتىماقتاستىقتىڭ حالىقتار دوستىعىن نىعايتۋعا جانە ءتۇرلى سالالار بويىنشا تاجىريبە الماسۋعا بارىنشا ىقپال ەتىپ وتىرعانىن ايتتى.

«بۇگىن جامبىل اتىنداعى قازاق مەملەكەتتىك فيلورمانيادا وتەتىن تاتار مۋزىكاسىنىڭ كونسەرتى جەرگىلىكتى كورەرمەندەردى باي تاتار رەپەرتۋارىمەن تانىستىرىپ، مادەني بايلانىستى نىعايتا تۇسەدى»، - دەدى تاتارستان پرەمەر-مينيسترىنىڭ ورىنباسارى.

كەزدەسۋ بارىسىندا تاتارستاندىق دەلەگاسياعا «ءبىر تەرەزە» قاعيداسى بويىنشا ينۆەستورلارعا قىزمەت كورسەتەتىن ورتالىقتىڭ، يندۋستريالدى ايماق پەن «يتپ» اەا-نىڭ جانە «Smart City» جوباسىنىڭ الەۋەتتەرى كورسەتىلدى.

جالپى، تاراپتار ءتۋريزمدى دامىتۋ، كاسىپكەرلىككە قولداۋ كورسەتۋ، ءبىلىم، مادەنيەت جانە باسقا اسپەكتىلەردە ىنتىماقتاستىقتى كۇشەيتۋ ماسەلەلەرىن تالقىلادى.