وسىدان ءبىر اي بۇرىن ۇلىنان ايىرىلعان تەلەجۋرناليست ساۋلە ابەدينوۆا ۇلىن جوقتاپ، جۇرتتى تەبىرەنتتى. ءوزىنىڭ فەيسبۋكتەگى پاراقشاسىندا جالعىز بالاسىن قيماسا دا، ءومىردى قايتا باستاۋعا بەكىنگەنىن جازعان.
«مەنىڭ بويىمدا بۇگىندە ەكى ساۋلە ءومىر ءسۇرىپ ءجۇر - بالاسى ولگەنگە دەيىنگى ساۋلە جانە بالاسى ولگەننەن كەيىنگى ساۋلە...
كەيدە ءوزىمدى الدارقاتىپ، تۇك بولماعانداي، بالاسى ولگەنگە دەيىنگى ءتورت قۇبىلاسى تۇگەل ساۋلەنىڭ كەيپىنە ەنەمىن...
وندايدا "ءۇش ارسىز" مەنى بيلەيدى...
ءتىپتى، وسى فب-عا كىرىپ، پوستتاردى، ماقالالاردى وقيمىن، مۋزىكا تىڭدايمىن، ۇناعان دۇنيەلەرگە بارماعىمدى باسامىن، بولىسەمىن...
ۇناماعان نارسەلەرگە كۇيىپ-پىسىپ، بوقتايمىن، "توبەلەسەمىن"، ءتىپتى... مىسالى، ءدال بۇگىن، ۇناماسا دا، سونشالىقتى جيىركەنىشتى بولسا دا - كوك ءبورىنى قورلاعان تەكسىزدەردىڭ جازاسى تەزىرەك بەرىلسە ەكەن دەگەن ماقساتپەن سول ۆيدەونى ءبولىسىپ تە جىبەردىم... جاسىرمايمىن، ولاردى قارعاپ تا جىبەردىم...
ءيا... ءبىر قاراعاندا، سول باياعى وزدەرىڭىز بىلەتىن "اقىلى از، ەموسياسىن تەجەي المايتىن" ساۋلەمىن...
الايدا... مويىندايمىن...
مەن مىڭ جەردەن بۇرىنعى ساۋلە بولىپ كورىنگىم كەلسە دە...
... بۇرىنعى ساۋلە ەمەسپىن...
ىشىمدە ءبىر وزەك ءۇزىلىپ تۇسكەن، ءىشىم ءولىپ قالعان ساۋلەمىن...
ومىرگە بۇرىنعىدان مىڭ ەسە اشىنعان ساۋلەمىن....
ءيا...مەن قارا جامىلىپ، بالامدى جوقتاپ ازا تۇتقالى 41 كۇن...
قۇلىنىمدى جەر قوينىنا تاپسىرعالى 40 كۇن...
بالاپانىم-اۋ، سۋىقتى ۇناتپاۋشى ەدىڭ عوي...توڭعاق ەدىڭ عوي...قالاي جاتىرسىڭ مىناداي ايازدا قارا جەردىڭ استىندا...
قاراڭعىنى جەك كورۋشى ەدىڭ عوي....قالاي جاتىرسىڭ تاس قاراڭعى قابىردە......
ول سۋىقتى ءدال مەندەي جەك كورەتىن...
ول ولگەن كۇننەن باستاپ، ءومىردىڭ ايازىنا تابيعاتتىڭ ايازى قوسىلىپ، جانىمدى دا، ءتانىمدى دە قارىپ ءوتتى...
جانىم دەرتتى، جۇرەگىم مۇز...
جەتسەم دەگەن ارماندارىنا جەتە المادى...
كورسەم دەگەن باقىتىمدى كورە المادىم...
"تىم بولماسا تۇسىمە كىرشى" دەپ جالىنعانىما 40 كۇن بولدى...
تۇسىمە دە كىرمەيدى...
نە دۇرىس ۇيقى جوق...
"تاعى ءتۇن....
تاعى مەنەن ۇيقى قاشتى،
قايتەمىن قاڭىراعان كۇيكى باستى؟!.
الدىمدا مىناۋ ءفاني تىرجالاڭاش،
شىعارىپ ءتىلىن ماعان، سيقىن اشتى..."
وسىنشاما اۋىر سىناقتى بەرگەن قۇداي سول سىناقتى كوتەرە الاتىن قۋات تا بەرەتىن شىعار...
ابزالىم...
ابىزىم-قوبىزىم...
"اناشىم" دەگەن ءسوزىڭدى ساعىندىم...
"مامۋليا، مامۋسيا، مازە" دەگەن سوزدەرىڭدى ساعىندىم...
"ساكە" دەگەن ءسوزىڭدى ساعىندىم...
"ساۋكەنتاي" دەگەن ءسوزىڭدى ساعىندىم...
تىم بولماسا تۇسىمە ەنشى، قۇلىنىم...
41 كۇن...
بارا عوي، بوتام.... اق سۇتىمە ىرزامىن... اللا الدىڭنان جارىلقاسىن!..
مەن، اناڭ، تالبەسىكتە تەربەتتىم...
جەر-اناڭ جەربەسىكتە تەربەتسىن!...
***
مەن وزگەردىم...
ەندى ءبىر كەزدەگى ءتورت قۇبىلاسى تۇگەل ساۋلە جوق...
ەندىگى ساۋلە - باسقا ساۋلە...
بۇرىنعىدان ءجۇز ەسە اقىماق...
بۇرىنعىدان ءجۇز ەسە ەموسيونالدى...
ومىرگە بۇرىنعىدان ءجۇز ەسە قۇشتار، ءومىردى بۇرىنعىدان ءجۇز ەسە سۇيەتىن...
بۇرىنعىدان ءجۇز ەسە باقىتتى بولاتىن ساۋلە كەلدى...
سالەمەتسىزدەر مە!...
قايىرلى تاڭ، ساۋلە!...
ءومىردى قايتا باستايمىز با؟؟؟
كەتتىك!!!».
پىكىر قالدىرۋ