تايلاند سوتى ميسۋوكي سيگەتۋ ەسىمدى جاپون ميللياردەرىمەن سوتتاسىپ جاتىر. ميللياردەر سوتتان ءوزىنىڭ بالالارىن قايتارىپ بەرۋدى تالاپ ەتۋدە. پوليسيا جاپوندىقتىڭ 15  بالاسىن تاۋىپ، قالعان بالالارىن ىزدەستىرۋدە. كەيبىر ادامداردىڭ پىكىرىنشە، ميللياردەر جىگىت  ءوز ۇرپاقتارىنان ارميا تىزبەكشى.

«ەستىمەگەن ەلدە كوپ» دەمەكشى، جاپونيانىڭ تانىمال ميللياردەرىنىڭ ەرەكشە وقيعاسى تۋرالى لەنتا.رۋ جازادى.

ۆاسسانا ەسىمدى ايەل  New Life اتتى كومپانيامەن كەلىسىمشارت جاساسقان. بۇل كومپانيا   تابيعي جولمەن بالالى بولا المايتىن جۇپتارعا سۋرروگات انا بولۋعا ايەلدەردى ىزدەيدى. بۇل قىزمەت ءۇشىن ايەلدەرگە 10 مىڭ دوللار قاراجات تولەنەدى ەكەن.

30 جاستاعى ۆاسسانا بانگكوكتا بالاسى جانە تاعى جەتى اداممەن بىرگە پاتەر جالداپ تۇراتىن. كومپانيا ۇسىنعان مۇمكىندىكتى پايدالانباقشى بولعان ايەل سۋرروگات انا بوۋلعا كەلىسەدى. ول ءوزىنىڭ كليەنتىنىڭ كىم ەكەنىن، ياعني كىمگە بالا تۋۋىپ بەرەتىنىن بىلمەگەن، بالاسىنىڭ اكەسىن باستاپقىدا تانىماعان. «ەگەر وسىنشاما اقشا ۇسىنسا، بالالى بولۋدى قاتتى قالايتىن ەرلى-زايىپتىلار بولۋى كەرەك» دەپ ويلاعان ايەل قاتتى قاتەلەسكەنىن كەيىن بىلگەن.

2013 جىلدىڭ جازىندا ۆاسسانا بوسانىپ، ەكى ايدان كەيىن بالاسىنىڭ اكەسىمەن تانىسقان. ۇزىن شاشتى جاپوندىق جىگىت ەشتەڭە دەمەستەن، كۇلىمسىرەپ قانا قويعان.

"ءوزىنىڭ زاڭگەرى ارقىلى مەنى اتا-انا قۇقىعىمنان ايىرۋ تۋرالى كەلىسىم جۇرگىزدى"،- دەيدى ايەل. ايەل كەلىسىپ بارلىق قۇجاتتاردى راسىمدەگەن. ءبىر جىلدان كەيىن ۆاسسانا ءوزىنىڭ كليەنتىن تەلەديداردان كورگەن. جاڭالىقتاردان بانگكوك قالاسىنىڭ سىرتىنداعى ۇيلەردىڭ بىرىندە پوليسيا تەكسەرۋ جۇرگىزىپ، 2 جاس-2 اپتا ارالىعىنداعى توعىز بالا تابىلعان. ولاردىڭ بارلىعى الگى جاپون جىگىتىنىڭ بالالارى ەكەنى بەلگىلى بولعان.

Bangkok Post باسىلىمى كوپ بالالى جاپوندىقتىڭ شەتەلدىك ءتولقۇجاتىنىڭ كوشىرمەسىن تاۋىپ العان. بەلگىلى بولعانداي، كوپ بالالى اكە 24 جاستاعى  ميسۋوكي سيگەتا بولىپ شىققان. مالىمەتتەرگە قاراعاندا ونىڭ اكەسى جاپونياداعى ەڭ باي ادامداردىڭ ءبىرى ەكەن.

سيگەتا 2012 جىلدان باستاپ سۋرروگات انالارعا دەگەن قىزىعۋشىلىعىن بىلدىرگەن. ول سۋرروگات انالارعا 500 مىڭ دوللاردان اسا قاراجات جۇمساعان. سيگەتانىڭ وسى ءتاسىل ارقىلى  قانشا بالانىڭ اكەسى اتانعانى بەلگىسىز. دنق ناتيجەلەرى بويىنشا ول 15 بالانىڭ اكەسى دەپ تانىلعان. بانگكوگتاعى تۇرعىن ۇيلەردىڭ بىرىندە ونىڭ اتىنا جازىلعان 21 بالا تابىلعان.

سيگەتا بانگكوگتا بالا «شىعارۋمەن» ارنايى جوسپار بويىنشا اينالىسقان. ونىڭ اگەنتتەرى ايەلدەردى تاۋىپ اكەلىپ وتىرعان. دارىگەرلەر ولاردىڭ دەنساۋلىقتارىن قاداعالاعان. بالا تۋعان سوڭ ونىڭ قۇجاتتارىن راسىمدەۋمەن زاڭگەرلەر اينالىسقان. تايلاندتاعى ينتەرپول بيۋروسىنىڭ ديرەكتورى بۇعان دەيىن مۇندايدى ەشقاشان كورمەگەنىن، ەستىمەگەنىن ايتادى. «وسىنشاما بالانى دۇنيەگە اكەلۋ وعان نە ءۇشىن كەرەك ەكەنىن تۇسىنبەي-اق قويدىق»،-دەيدى ولار. باستاپقىدا پوليسيا ماسەلە  بالالار ساۋداسى مەن ەكپلۋاتاسياسىندا دەپ ويلاعان. الايدا،  New Life كومپانياسىن نەگىزدەۋشى  ايەلدىڭ ايتۋىنشا، سيگەتانىڭ باستى ماقساتى «ۇلكەن وتباسىن قۇرىپ، بولاشاقتا سايلاۋدا جەڭىسكە جەتۋ» بولعان. ميسۋوكي سيگەتا ءوزىنىڭ ءومىرىنىڭ سوڭىنا دەيىن جىل سايىن 10 – 15 بالانى دۇنيەگە اكەلۋدى ماقسات ەتىپ قويعان. ميللياردەر ءوز ۇرپاقتارىنىڭ بولاشاقتا ءوزىن پرەزيدەنتتىككە سايلاۋ كەزىندە كومەكتەسەتىنىن ويلاعان، وسىنداي تاسىلمەن بۇكىل الەمدى بيلەۋدى قالاعان.

سيگەتانىڭ ءوزى بىرنەشە ونداعان ۇرپاق ءسۇيۋدى قالايتىنىن مويىنداماي وتىر. ونىڭ ايتۋىنشا، بالالار وعان ول ومىردەن وتكەن سوڭ، دۇنيە-مۇلكىن، قازىناسىن  قالدىرۋ ءۇشىن كەرەك. ميللياردەردىڭ زاڭگەرلەرى سيگەتانىڭ بالالارىنىڭ بارلىعىندا تۋۋ تۋرالى كۋالىكتىڭ بار ەكەندىگىن، اتتارىندا مۇلىك بار ەكەنىن، ياعني ءبارىنىڭ زاڭدى تۇرعىدا جاسالىپ جاتقانىن ايتادى.

جاپونيالىق ميللياردەر ءتورتىنشى جىل تايلاند بيلىگىمەن بالالارىن قايتارۋ ءۇشىن سوتتاسىپ جاتىر.