بەلگىلى جازۋشى-دراماتۋرگ راحىمجان وتاربايەۆ دۇنيەدەن ءوتتى، دەپ حابارلايدى Qamshy.kz اقپارات اگەنتتىگى.

«وتە جاقىن ادامداردان ەستىپ وتىرمىن بۇل حاباردى. قايران اعام-اي! سەنە الماي وتىرمىن! وتكەن تۇندە جۇرەكتەن دۇنيە سالدى.توبەمنەن جاي تۇسكەندەي بولىپ وتىرمىن! يمانى سالامات بولسىن، قايتەيىن...»، - دەدى اقىن باۋىرجان قاراعىز ۇلى. 

راحىمجان وتاربايەۆ 1956 جىلى 19 قازاندا اتىراۋ وبلىسى قۇرمانعازى اۋدانىندا دۇنيەگە كەلگەن. 1977 جىلى ورال پەداگوگيكا ينستيتۋتىن ءتامامداعان. ءار جىلداردا «ورال ءوڭىرى» گازەتىندە ءتىلشى، قازاق ءتىلى مەن ادەبيەتى ءپانىنىڭ ءمۇعالىمى، قازاق تەلەراديو كوميتەتىندە رەداكتور، «قازاق ادەبيەتى» گازەتىندە، «جالىن» الماناحىندا ءبولىم مەڭگەرۋشىسى، قىرعىزستاندا قازاقستان ەلشىلىگىنىڭ اتتاشەسى، ماڭعىستاۋ وبلىستىق راديوتەليەۆيدەنيە كومپانياسىنىڭ ءتوراعاسى، اتىراۋ وبلىستىق دراما تەاترىنىڭ ديرەكتورى، ق ر پرەزيدەنتى اكىمشىلىگىندە سەكتور مەڭگەرۋشىسى قىزمەتتەرىندە بولعان. 2009 جىلدىڭ مامىرىندا استاناداعى ۇلتتىق اكادەميالىق كىتاپحانانىڭ باس ديرەكتورى بولدى. جازۋشىنىڭ ءار جىلدارى «شەر»، «جۇلدىزدار قۇلاعان جەر»، «جايىق جىرى»، «قاراشا قازدار قايتقاندا»، «داۋىسىڭدى ەستىدىم»، «وتۆەرجەننىي مير» اتتى پروزالىق جيناقتارى جانە تاڭدامالى شىعارمالارىنىڭ 2 تومدىعى جارىق كورگەن. قىتايدىڭ «ۇلتتار» باسپاسىنان جۇڭگو، قازاق تىلىندە 2 تومدىعى، رەسەيدىڭ «حۋدوجەستۆەننايا ليتەراتۋرا» باسپاسىنان ورىس تىلىندە ءبىر تومدىعى جانە قىرعىز تىلىندە كىتاپتارى جارىق كورگەن. جەكەلەگەن شىعارمالارى تۇرىك، اراب، اعىلشىن تىلدەرىندە باسىلعان. «بەيبارىس سۇلتان»، «باس»، «ناشاقور جايلى نوۆەللا»، «نۇرجاۋعان-عۇمىر»، «سىرىم باتىر»، «مۇستافا شوقاي» سىندى پەسالارى رەسپۋبليكالىق جانە شەتەل تەاترلارىندا ساحنالانعان. ماحامبەت سىيلىعىنىڭ لاۋرەاتى. قازاقستاننىڭ ەڭبەك سىڭىرگەن قايراتكەرى. حالىقارالىق ايتماتوۆ اكادەمياسىنىڭ اكادەميگى.