كيىكباي جاقىپ ۇلى ەسىمدى Facebook قولدانۋشىسى نازاربايەۆ مەكتەبىنە ءتۇسۋ ءۇشىن تاپسىراتىن سىناق كىتاپشاسىندا مس سايلاۋبەك تۋرالى سۇراق جۇرگەنىنە نارازىلىق ءبىلدىردى. ول تانىمال رەپەردىڭ ەسىمى ەنگىزىلگەن كىتاپشانى ۆيدەوعا ءتۇسىرىپ، «ايتارىم جوق... نە بولىپ كەتتى!»، – دەپ جازدى. بۇل جاريالانىمدى جۇزدەگەن ادام ءبولىسىپ، قىزۋ تالقىعا سالدى، دەپ حابارلايدى Qamshy.kz اقپارات اگەنتتىگى. 

سايلاۋبەكتىڭ ەسىمى تەست كىتاپشاسىنا نە ماقساتپەن ەنگىزىلگەنى بەلگىسىز. اۆتورلارى قازبەك ساعيدولدا مەن سەرىكبولسىن دۇيسەمباي دەپ كورسەتىلگەن وقۋ قۇرالىندا مس سايلاۋبەكتىڭ «ايتۋعا وڭاي»، «پۋست گوۆوريات» تەلەباعدارلامالارى ارقىلى تانىلعانى ايتىلادى. بۇعان قوسا، ونىڭ جاسى، قاي جەردىڭ تۋماسى ەكەنى ەگجەي-تەگجەيلى جازىلىپتى.

ال سوڭىندا «مس سايلاۋبەكتى جۇلدىز بولۋىنا نە اسەر ەتتى؟» دەگەن سۇراق قويىلادى.

مۇنى كورگەن كوپشىلىك سۋرەت فوتوشوپ دەپ سەنىمسىزدىك تانىتسا، ءبىرقاتارى كىتاپقا ەنگەن وسىنداي مىسالداردان سوڭ ەلدىڭ بولاشاعىنا كۇمان كەلتىرگەن.