جۋرناليست ەرجۇمان وتەش ۇلى سمايىلدىڭ دۇنيەدەن وتكەنىن ەگەمەن قازاقستان" رەسپۋبليكالىق گازەتى" اكسيونەرلىك قوعامىنىڭ باسقارما ءتوراعاسى دارحان ءقىدىرالى Facebook جەلىسىندە جازدى.

«ەگەمەن قازاقستان ۇجىمى بۇگىن اۋىر قايعىعا ۇشىرادى. ەل گازەتىن ەكى رەت باسقارعان، «ەگەمەننىڭ قارا نارى» اتانعان ەر-اعا – ەرجۇمان اعا سمايىل بۇ فانيدەن باقيعا اتتانعانى تۋرالى سۋىت حابار ەستىدىك.

كوڭىل قۇرعىر سەنە المايدى. جىل باسىندا ەگەمەندىكتەر ەر-اعانىڭ 70 دەگەن مەرەيلى جاسىن ارنايى اتاپ ءوتىپ ەدى. بىرەر كۇن بۇرىن عانا ءبىر داستارxان باسىندا باس قوسىپ، ارقا-جارقا اڭگىمەلەسىپ ەدىك.

قارالى xاباردى ەستىپ، ەسەڭگىرەپ قالدىق. مارقۇمنىڭ وتباسىنا، بالالارىنا، جاقىندارىنا كوڭىل ايتامىز. 
اعامىزدىڭ يمانى جولداس بولسىن!

باقۇل بول، اعا!» دەپ جازدى دارحان ءقىدىرالى.

ەرجۇمان وتەش ۇلى سمايىل 1948 جىلى 5 قاڭتاردا دۇنيەگە كەلگەن. قازاق مەملەكەتتىك ۋنيۆەرسيتەتىندە وقىعان. قازاقستان رەسپۋبليكاسى جۋرناليستيكا اكادەمياسىنىڭ اكادەميگى، ب ا ق سالاسىنداعى پرەزيدەنت سىيلىعىنىڭ تۇڭعىش لاۋرەاتى، قازاق­ستاننىڭ ەڭبەك سىڭىرگەن قايراتكەرى، الماتى وبلىسىنىڭ قۇرمەتتى ازاماتى، قازاقستان پرەزيدەنتى سىيلىعىنىڭ جانە باۋبەك بۇلقىشيەۆ اتىنداعى سىيلىقتىڭ العاشقى يەگەرى.

ەڭبەك جولىن «سوسياليستىك قازاقستان» (قازىرگى «ەگەمەن قازاقستان») گازەتىنىڭ ءتىلشىسى بولىپ باستاعان. 1979-1987 جىلدارى - «لەنينشىل جاس» (قازىرگى «جاس الاش») گازەتىندە رەداكتوردىڭ ورىنباسارى. 1987-2003 جىلدارى - «ەگەمەن قازاقستان» گازەتىنىڭ ءبولىم مەڭگەرۋشىسى، رەداكتوردىڭ ورىنباسارى، باس رەداكتورىنىڭ ءبىرىنشى ورىنباسارى، باس رەداكتورى. 2003-2010 جىلدارى «ەگەمەن قازاقستان» رەسپۋبليكالىق گازەتى» اشىق اكسيونەرلىك قوعامىنىڭ پرەزيدەنتى، ۆيسە-پرەزيدەنتى قىزمەتىن اتقارعان.

قازاق كسر جوعارعى كەڭەسىنىڭ قۇرمەت گراموتاسىمەن ماراپاتتالعان.