«ەۋرازيا» ءبىرىنشى تەلەارناسى باس ديرەكتورىنىڭ ورىنباسارى، ەكس-سەناتور سۆەتلانا جالماعامبەتوۆا «قالاۋلىم» باعدارلاماسىنا قاتىستى ايتىلعان سىنعا جاۋاپ بەردى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الا وتىرىپ.

«ەۋرازيا» ءبىرىنشى ارناسىندا كورسەتىلەتىن «قالاۋلىم» باعدارلاماسى تۋرالى جۇرت ءبىرازدان بەرى شۋلاپ ءجۇر. حالىقتىڭ نارازىلىعىنان كەيىن اقپارات جانە كوممۋنيكاسيالار مينيسترلىگى باعدارلامانى تەكسەرۋگە ۋادە بەرگەن ەدى. الايدا كوپشىلىكتىڭ سىنىنا ۇشىراعان «قالاۋلىم» ءالى ەفيردەن كورسەتىلىپ كەلەدى.

بۇگىن «نۇر وتان» پارتياسى جانىنداعى «ميراس» رەسپۋبليكالىق كەڭەسىنىڭ وتىرىسىندا دا بۇل ماسەلە نازاردان تىس قالمادى. ءماجىلىس دەپۋتاتى باقىتگۇل حامەنوۆا ەلىمىزدە تۇككە تۇرعىسىز جەڭىل دۇنيەلەر ءتۇسىرۋ سانگە اينالىپ بارا جاتقانىن ايتىپ كۇيىندى. 

وسىدان كەيىن ەكس-سەناتور،  تەلەارنا باس ديرەكتورىنىڭ ورىنباسارى سۆەتلانا جالماعامبەتوۆا جيىندا ايتىلعان ءبىراز سىنعا جاۋاپ بەردى.

««قالاۋلىم» باعدارلاماسىنا توقتالايىن. باقىتگۇل، (ءماجىلىس دەپۋتاتى حامەنوۆا – رەد.ەسكەرت.) سىزگە باعدارلاما ۇنامايدى. ءسىز كورمەسەڭىز، كورمەي-اق قويىڭىز. بۇل باسقا توك-شوۋلارمەن سالىستىرعاندا رەيتينگىسى ەڭ جوعارى باعدارلاما. بىردە-بىر تەلەارنادا 3 ساعات بويى كورەرمەننىڭ نازارىن ۇستاپ وتىراتىن باعدارلاما جوق»، — دەدى  ول.

جالماعامبەتوۆا رەيتينگىسى جوعارى «قالاۋلىم» باعدارلاماسىندا وتە وزەكتى ماسەلەلەر قوزعالاتىنىن اتاپ ءوتتى.

«بۇل باعدارلاما وتە ماڭىزدى ماسەلەلەردى كوتەرەدى. بۇگىنگى تاڭدا، وكىنىشكە قاراي، ەلىمىزدە تۇرمىس قۇرماي، جالعىز قالعان قىزدار كوپ. ولار اندا-مىندا بارۋعا ۇيالادى. ال بۇل ماسەلەنى ءبىز تەك توقال الىپ قانا شەشۋ كەرەكپىز بە؟ 21 عاسىردا ءومىر سۇرە وتىرا، نەگە ورتا عاسىرعا شەگىنۋىمىز كەرەك؟ بۇعان قوسا قۇرىلىستا، تاعى باسقا جەرلەردە جۇمىس ىزدەپ جۇرگەن ازاماتتار كوپ، ولار ۇيلەنۋگە ۋاقىت تابا الماي ءجۇر. سوندىقتان وسونداي ازاماتتار باعدارلاماعا كەلەدى. الەۋمەتتىك جەلىدە جامان پىكىرلەر ايتىلىپ جاتىر دەيسىزدەر. ءبىراق جاقسى پىكىرلەر دە بار. بىزگە كوپ حات تۇسەدى. كورەرمەندەر حابارلاسىپ، "باعدارلامانى نەگە استانادا تۇسىرمەيسىڭدەر؟ ءبىز دە قاتىسايىق" دەيدى. ال ەندى ءبىرى العىسىن ءبىلدىرىپ جاتادى»، — دەدى ەكس-سەناتور.

جالماعامبەتوۆا رەيتينگ ءۇشىن باستاپقى كەزدە ەفيردەن ىڭعايسىز جاعدايلار كورسەتىلگەنىن مويىندادى.

«العاشىندا رەيتينگتى كوتەرۋ ءۇشىن ءبىز تىكەلەي ەفيردە قولايسىز جاعدايلاردى كورسەتتىك. ءبىراق باعدارلامانىڭ رەيتينگىسى كوتەرىلە باستاعان سوڭ، بۇل ماسەلەنى باسقاشا شەشە باستادىق.  قازىرگى تاڭدا بىزدە تەحنيكالىق مۇمكىندىكتەر جەتەرلىك. ەگەر ەفيردە ۇرىس-كەرىس شىقسا، بارلىعىن كەسىپ تاستايمىز. وسىلايشا باعدارلامانى رەتكە كەلتىرىپ جاتىرمىز»، — دەدى ءسوز سوڭىندا ول.