قازىرگى تاڭدا اتا – بابا ءداستۇرىن ۇلىقتاۋ مەن وركەنيەتتى ورلەتەر سالتىمىزدىڭ تاسادا قالىپ، ءتول مەيرامدارىمىزدىڭ ۇمىتىلىپ بارا جاتقاندىعى جاسىرىن ەمەس. وسى تۇستا ەلىمىزدىڭ باس باسىلىمى «ەگەمەن قازاقستان» گازەتىنە ق ر مادەنيەت جانە سپورت ءمينيسترى ارىستانبەك مۇحامەدي ۇلى «ناۋرىز ەڭ اۋەلى بالدىرعاندارعا ارنالۋى كەرەك» دەگەن تاقىرىپتا اۋقىمدى سۇحبات بەرىپ، ناۋرىزعا قاجەت ىرگەلى ىزدەنىستەردى اتاپ ءوتىپ،  سەگىز ۇسىنىس جاساعان ەدى.

ەلباسىمىزدىڭ ۇلت يگىلىگى ءۇشىن جاساعان «بولاشاققا باعدار: رۋحاني جاڭعىرۋ» ستراتەگيالىق باعدارلاماسىن نەگىزگە الا وتىرىپ، ناۋرىز مەيرامىن ۇلىقتاۋدى قولعا العان مينيستر قوعامنىڭ بارلىق ماسەلەلەرىن قامتي كەلە، ۇلكەن سەنىم ارتىپ وتىر.

ۇلىستىڭ ۇلى كۇنى – ءاز-ناۋرىز مەيرامى ۇلتىمىزدىڭ بار اسىل قۇندىلىقتارىن كورسەتىپ، ۇلىقتاۋعا تاماشا مۇمكىندىك بەرەتىن مەرەكە. بۇل كۇنى جاقسى مەن جامان، اق پەن قارا دەگەن ۇعىم سانادا بولسا دا، جەر بەتىندە تەك كۇن شۋاعىن شاشقان، بىر-بىرىنە مەيىرىممەن قاراپ، كەشىرىمدى بولا بىلگەن، جارقىن ءجۇزى بال-بۇل جايناعان قالىڭ جۇرتتىڭ ورتاق مەرەكەسى. بۇل كۇندە ادامدار بىر-بىرىمەن ءتوس قاعىستىرىپ، رەنىش بولسا، كەشىرىم سۇراپ، ايتار العىسى بولسا جاۋدىرىپ، جاقسى كۇن مەن نۇرلى تىرشىلىك ءۇشىن شۇكىرشىلىك ەتەتىن كۇن.

وسى ورايدا ق ر ۇلتتىق كىتاپحاناسى ءمينيستردىڭ ۇسىنىسىنا قولداۋ ءبىلدىرىپ، ءتۇرلى شارالاردى باستاپ تا كەتتى. ماسەلەن، ناۋرىز ايىنىڭ ءبىرىنشى جۇلدىزىندا «العىس ايتۋ» كۇنىنە وراي «العىسىم شەكسىز حالقىما» اتتى مەرەكەلىك كونسەرت پەن فلەشموب ءوتتى. ۇلىستىڭ ۇلى كۇنىن ءبىر اي بويى تويلاۋدى ۇسىنعان ءمينيستردىڭ ۇسىنىسى وسىلايشا ءبىرىنشى ناۋرىزدان باستاۋ الدى.

الماتى قالاسىنداعى دوستىق ۇيىندە ۇلتتىق كىتاپحانا  كوشپەلى كىتاپ كورمەسىن ۇيىمداستىردى. كورمەگە ۇلتتىق كىتاپحانا قورىنان ءارتۇرلى ۇلت وكىلدەرىنىڭ تاريحىن جانە قازىرگى ءومىرىن، جەر اۋدارۋ ۇدەرىستەرىن، ولاردى ورنالاستىرۋدى، مادەنيەتىن، سالت-داستۇرلەرىن، ادەت-عۇرىپتارىن جانە ونەرىن پاش ەتەتىن، قازاق، ورىس جانە اعىلشىن تىلدەرىندە 100-دەن استام باسىلىمدار ۇسىنىلدى.

«ناۋرىز ەڭ اۋەلى بالدىرعاندارعا ارنالۋى كەرەك» دەپ مينيستر ارىستانبەك مۇحامەدي ۇلى ايتقانداي، ق ر ۇلتتىق كىتاپحاناسى «قازاقستان كىتاپتارى» زالىندا بالالار مەن جاسوسپىرىمدەرگە ارنالعان كىتاپ كورمەسىن ۇيىمداستىرىپ، بۇل ايدىڭ قادىر-قاسيەتىن، ءمان-ماڭىزىن تۇسىندىرۋگە اتسالىسۋدا.

ناۋرىز مەيرامى بارشا قازاقستاندىقتار ءۇشىن ەرەكشە مەرەكە. كوكتەم كەلىپ، جاڭا جىلدىڭ، جاڭا ءومىردىڭ باستالۋى. سول سەبەپتى دە ق ر ۇلتتىق كىتاپحاناسىنىڭ قىزمەتكەرلەرى «ناۋرىز مەيرامىن ءبىر اي بويى تويلاۋ» تۋرالى ۇسىنىستى قۋانا قولدايدى، جانە ول ءۇشىن بارىنشا اتسالىسادى. سونداي-اق، الداعى ۋاقىتتا 22 ناۋرىز ۇلىستىڭ ۇلى كۇنىنە وراي ق ر ۇلتتىق كىتاپحاناسى مەرەكەلىك شارالاردى ۇيىمداستىرىپ، ۇلتتىق مەيرامدى ۇلىقتاۋدى جالعاستىراتىن بولادى.

قۇرمەتتى، قازاقستاندىقتار! سىزدەردى ۇلىستىڭ ۇلى كۇنى – ناۋرىز مەيرامىمەن قۇتتىقتايمىن! ەلىمىز تىنىش، جۇرتىمىز امان بولسىن! اق مول بولسىن! ناۋرىز – جىل باستاۋى! بارشاڭىزعا جاڭا ءومىر، جاڭا قادامدار مەن جاڭا بەلەستەر تىلەيمىن! كوك بايراعىمىز كوكتە جەلبىرەي بەرسىن! ءاز-ناۋرىز قۇتتى بولسىن!

ج. ت. سەيدۋمانوۆ،

ق ر ۇلتتىق كىتاپحاناسىنىڭ

ديرەكتورى