ت. جۇرگەنوۆ اتىنداعى قازاق ۇلتتىق ونەر اكادەمياسى مەن «كەنەن ازىربايەۆ اتىنداعى كوممەرسيالىق ەمەس قورى» 15-20 جاس ارالىعىنداعى جاسوسپىرىمدەر اراسىندا «جاس ەكپىن» بايقاۋىن وتكىزەدى. بۇگىن سوعان ارنالعان باسپا ءسوز كونفەرەنسياسى بولدى، دەپ جازادى Qamshy.kz اقپارات اگەنتتىگى. 

كونفەرەنسياعا قازاقستاننىڭ ەڭبەك سىڭىرگەن ءارتىسى، «ءداستۇرلى مۋزىكالىق ونەر» كافەدراسىنىڭ مەڭگەرۋشىسى رامازان ستامعازييەۆ، «ءداستۇرلى مۋزىكالىق ونەر» كافەدراسىنىڭ دوسەنتى مۇرات ءابۋعازى، كەنەن اندەرىنىڭ ناسيحاتشىسى، «ءداستۇرلى مۋزىكالىق ونەر» كافەدراسىنىڭ ۇستازى شولپان دارجانوۆا مەن «كەنەن ازىربايەۆ اتىنداعى كوممەرسيالىق ەمەس قورىنىڭ» ديرەكتورى ازىربايەۆ مۇحيت باقىت ۇلى، كەنەن ازىربايەۆتىڭ قىزى تورتكەن ازىربايەۆا قاتىستى.

– قازاق دالاسىندا عاسىردان-عاسىرعا كەلە جاتقان ۇلتتىق ونەرىمىز بار. ونىڭ ىشىندە ءان ءداستۇرى مەن كۇي ءداستۇرىن اۋىز تولتىرىپ ايتۋعا بولادى. حالىق اسپاپتارى – دارىپتەۋگە تۇرارلىق قۇندىلىق. ءان مەنەن كۇيدىڭ كوكپارىندا قايناپ، قازاق دالاسىنداعى ونەر مەكتەپتەرىنىڭ پۇشپاعىن يلەپ جۇرگەن جاس بۋىنداردى جيناپ، وسى بايقاۋدى وتكىزسەك دەگەن ارمانىمىز بولدى. 2018 جىلدىڭ 15-16 ناۋرىزىندا الىستان ات شاپتىرىپ كەلەتىن جاستاردىڭ دوداسىن ءوز كوزىمىزبەن كورسەك دەگەن ويىمىز بار. بايقاۋدى وتكىزۋگە التىن كوپىر بولىپ،  «كەنەن ازىربايەۆ اتىنداعى كوممەرسيالىق ەمەس قورى» قارجىلىق قولداۋ كورسەتىپ وتىر، - دەپ ايتىپ ءوتتى رامازان ستامعازييەۆ.

بايقاۋعا مۋزىكالىق ورتا وقۋ ورىندارىنىڭ ستۋدەنتتەرى مەن ارنايى مامانداندىرىلعان  مۋزىكا مەكتەپتەرىنىڭ 11-12-سىنىپ وقۋشىلارى قاتىسادى. بايقاۋ  «ءداستۇرلى ءان» جانە «ءداستۇرلى كۇي» ەكى نوميناسيالارى بويىنشا وتەدى.

«جاس ەكپىن» بايقاۋى عاسىرلار بويى ۇرپاقتان ۇرپاققا امانات مۇرا بولىپ جەتكەن حالقىمىزدىڭ ءداستۇرلى ان-كۇي سالاسىنداعى اسىل قازىناسىن جان-جاقتى ناسيحاتتاۋ، جاس ۇرپاقتى بۇگىنگى كۇننىڭ تالابىنا ساي تاربيەلەۋدى ماقسات تۇتادى.