بۇگىن استانا قالاسىندا «پرەزيدەنتتىڭ بەس الەۋمەتتىك باستاماسىن» قولداۋ بويىنشا جاستار فورۋمى ءوتتى. فورۋمدى قازاقستان رەسپۋبليكاسى ءدىن ىستەرى جانە ازاماتتىق قوعام مينيسترلىگى مەن س.سەيفۋللين اتىنداعى قازاق اگراتەحنيكالىق ۋنيۆەرسيتەتىمەن بىرلەسىپ وتكىزدى.

قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى باقىتبەك سماعۇل، سەرىك ساپييەۆ، ق ر ءدىن ىستەرى جانە ازاماتتىق قوعام ۆيسە-مينيسترى ابزال نۇكەنوۆ، «س.سەيفۋللين اتىنداعى قازاق اگراتەحنيكالىق ۋنيۆەرسيتەتى» اق-نىڭ باسقارما ءتوراعاسىنىڭ ءبىرىنشى ورىنباسارى ابدىروۆ ايتجان، رەسپۋبليكالىق جاستار ۇيىمدارىنىڭ مەن جوعارى وقۋ ورىندارىنىڭ جاستاردىڭ ءوزىن-وزى باسقارۋ ورگاندارىنىڭ جەتەكشىلەرى قاتىستى.

ءدىن ىستەرى جانە ازاماتتىق قوعام ۆيسە-مينيسترى ا. نۇكەنوۆ فورۋم قاتىسۋشىلارىنا قۇتتىقتاۋ ءسوز ارناپ، ەلباسىنىڭ باستامالارىن ءارقايسىسىنا توقتالىپ، ءتۇسىندىرىپ كەتتى.

«جاستاردىڭ ەڭ وزەكتى جانە ماڭىزدى ماسەلەلەرى - ءبىلىم الۋ، جۇمىسقا ورنالاسۋ، باسپانالى بولۋ. ەلباسىنىڭ بەس الەۋمەتتىك باستاماسى جاستاردى الاڭداتاتىن باستى ماسەلەلەرگە كەشەندى جاۋاپ»، - دەدى ابزال نۇكەنوۆ.

ا.نۇكەنوۆتىڭ ايتۋىنشا، جاتاقحانالار قۇرىلىسىن سالۋعا جاستاردىڭ وزدەرىن تارتۋ ماسەلەسى قارالۋدا. بۇل ءبىر ۋاقىتتا جاستاردى جۇمىسپەن قامتۋ ماسەلەسىن شەشەدى.

پرەزيدەنتتىڭ بەس الەۋمەتتىك باستاماسى تۋرالى ءوز ويىمەن  وليمپيادا چەمپيونى سەرىك ساپييەۆتە ءبولىستى.

س. ساپييەۆتىڭ سوزىنشە سايلاۋشىلاردىڭ 70% وتىنىشتەرى  باسپانا ماسەلەسى بولىپ وتىرعانىن ايتۋدا. سونىمەن قاتار، قوعامدا جينالعان ماسەلەلەرىن شەشۋدە ەلباسىنىڭ ۇندەۋى ەرەكشە ماڭىزدى ەكەندىگىن اتاپ ءوتتى.

سەرىك ساپييەۆ جاستارعا: «ەل يگىلىگى ءۇشىن وقىڭدار، ەڭبەك ەتىڭدەر، بۇنىڭ ءبارى قولدان كەلەدى» دەپ سەنىمىن ارتتى.

سونداي-اق، فورۋم بارىسىندا جاستار ۇيىمدارىنىڭ كوشباسشىلارى ءوز ويلارىمەن ءبولىستى. ماسەلەن، قازاقستان ستۋدەنتتەرى ءاليانسىنىڭ كوشباسىشىسى يلياس تۇستىكبايەۆ ستۋدەنتتەر اتىنان پرەزيدەنتتىڭ بەس الەۋمەتتىك باستاماسىن قولدايتىندىعىن جەتكىزدى.

ءىس-شارانىڭ قورىتىندىسى بويىنشا ەل پرەزيدەنتىنىڭ بەس الەۋمەتتىك باستامالارىن ىسكە اسىرۋ بويىنشا ناقتى ۇسىنىمدار ازىرلەندى.