قازاقستان مۇسىلماندارى ءدىني باسقارماسىنىڭ ءتوراعاسى سەرىكباي قاجى وراز الماتىدا تانىمال جازۋشى باۋىرجان مومىش ۇلىنىڭ كەلىنى زەينەپ احمەتوۆامەن، بەلگىلى قوعام قايراتكەرى، ءتىل جاناشىرى اسىلى وسمانمەن، فيلولوگيا عىلىمدارىنىڭ دوكتورى، كورنەكتى عالىم ايگۇل ىسىماقوۆامەن، 17 جىلدا 628 بالانى باۋىرىنا باسقان باتىر انا تۇياق ەسقوجينامەن سۇحباتتاسىپ، ءتول مەرەكەلەرى قارساڭىندا سىي-قۇرمەت جاسادى، دەپ جازادى Qamshy.kz اقپارات اگەنتتىگى قمدب باسپا ءسوز قىزمەتىنە سىلتەمە جاساي وتىرىپ.
كەزدەسۋدە سەرىكباي قاجى ساتىبالدى ۇلى ءمۇفتيات ءوزىنىڭ ءدىني قىزمەتى اياسىندا بيىلعى جىلدى «يسلام جانە وتباسى» دەپ اتاعانىن جەتكىزدى.
«قۇدايعا شۇكىر، ءبارىمىز دە ۇل-قىز، نەمەرە ءوسىرىپ وتىرمىز. ولاردىڭ ەرتەڭگى بولاشاعىنا الاڭدايمىز، تاربيەسى ءۇشىن قام جەيمىز. وتاننىڭ ءوزى وتباسىنان باستالادى ەمەس پە؟ ەلىمىزدىڭ جان-جاقتى دامۋى تەكتىلىككە تاربيەلەنگەن ۇلاعاتتى ۇرپاققا تىكەلەي بايلانىستى. ءقازىر جاستاردى قازاقى ءداستۇر مەن يماندىلىق تۇرعىسىنان تاربيەلەۋگە كوڭىل ءبولىپ وتىرمىز. زەينەپ اپا، ايگۇل حانىم، اسىلى اپاي، سىزدەردىڭ جاستارعا ايتىپ جۇرگەن اقىل-كەڭەستەرىڭىزدى كورىپ-ەستىپ جۇرەمىز. قانشاما جەتىم بالانى باۋىرىنا باسىپ، قامقورلىعىنا العان تۇياق اپانىڭ ساۋاپتى ءىسى ەرلىككە پارا-پار امال دەپ ەسەپتەيمىن. سىزدەر بۇگىنگى تاۋەلسىز ەلىمىزدىڭ باتىر انالارىسىزدار. بارشاڭىزعا اللا رازى بولسىن. ءبارىمىزدىڭ ماقساتىمىز ءبىر عوي. ول – ۇلاعاتتى ۇرپاق ساباقتاستىعىن قالىپتاستىرۋ»، – دەدى باس ءمۇفتي سەرىكباي قاجى وراز.
جىلى ءجۇزدى كەزدەسۋ سوڭىندا قوعام قايراتكەرلەرى باس مۇفتيگە جۇرەكجاردى تىلەگىن جەتكىزىپ، العىس ءبىلدىردى.
