جامبىل وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا مۇراتحان ءتوقماديدىڭ ىسىنە قاتىستى سوت وتىرىسى باستالدى، دەپ حابارلايدى Qamshy.kz اقپارات اگەنتتىگى. بۇل تۋرالى Tengrinews.kz جازدى.
پروكۋرور مۇراتحان ءتوقماديدى 11 جىل جانە 6 ايعا باس بوستاندىعىنان ايىرۋدى سۇرادى. سونداي-اق، ول بيزنەسمەننىڭ جاساعان قىلمىستارىن جيناقتاپ، ونى 12 جىلعا قاماۋعا الۋدى سۇرادى. مۇنىمەن قوسا، مەملەكەتتىك ايىپتاۋشى ءتوقماديدىڭ جۇرگىزىلگەن ساراپتامالاردىڭ شىعىنى رەتىندە مەملەكەتتىك بيۋدجەتكە 356 000 تەڭگە تولەۋىن سۇرادى. مەملەكەتتىك ايىپتاۋشى قورىتىندى ايىپتاۋلاردى ءبىر ساعات ۋاقىتتان اسا وقىدى. ساراپشىلار مەن تەرگەۋ ساراپتامالارىنىڭ قورىتىندىلارى قايتا ايتىلدى. تەرگەۋ قارۋدىڭ وزدىگىنەن اتىلىپ كەتە المايدى جانە وسىعان دەيىن جۇرگىزىلگەن ساراپتامالار مەحانيكالىق كەدەرگىلەردىڭ سالدارىنان دۇرىس بولماي شىقتى دەگەن قورىتىندىعا كەلدى. بۇل قورىتىندىلاردى شەتەلدىك ساراپشىلار دا راستادى. ال مۇراتحان ءتوقماديدىڭ ادۆوكاتى سوتتالۋشىعا 10 جىلدان اسا ۋاقىت مەرزىم بەرمەۋىن سۇرادى.
«وسى قىلمىستى ءوزىنىڭ جانە جاقىندارىنىڭ ءومىرى ءۇشىن قورىققاندىقتان جاسادى. بۇل جازانى جەڭىلدەتەدى. سونداي-اق، ول كىنانى ءوزى مويىندادى. قىلمىستى اشۋعا كومەكتەستى. ءتوقمادي پروسەسسۋالدىق كەلىسىمدەگى شارتتاردىڭ بارلىعىن ورىندادى. سونداي-اق، سوتتالۋشىنىڭ 5 بالاسى بار ەكەنىن ەسكەرۋدى سۇرايمىن»، - دەدى ءتوقماديدىڭ ادۆوكاتى.
«مويىندايمىن، وكىنەمىن. بارلىق جاعدايدى ەسكەرۋدى سۇرايمىن. (...) تاعىلعان ايىپتارمەن كەلىسەمەن. كامەلەتكە تولماعان بالالارىمنىڭ بار ەكەنىن ەسكەرۋدى سۇرايمىن. پروسەسسۋالدىق كەلىسىمدەگى شارتتاردىڭ بارلىعىن ورىندادىم»، - دەدى ءتوقمادي سوتتا.
ەسكە سالا كەتەيىك، 8 ناۋرىزدا الەۋمەتتىك جەلىلەردە مۇراتحان ءتوقماديدىڭ قاشىپ كەتكەنى جايلى مالىمەت تارالعان ەدى. "08.03.2018 جىلى كەشكى 19.30 بەن 20.00 اراسىندا تارازداعى وبلىستىق اۋرۋحانادان مۇراتحان ءتوقمادي بەلگىسىز باعىتتا قاشىپ كەتكەن، ول ادام ءولتىردى دەگەن ايىپپەن قاماۋدا بولعان. ول تىزەگە دەيىن تۇسەتىن قارا كۇرتە مەن دجينس كيگەن، اياعىندا نە تۋفلي، نە كروسسوۆكا بولعان"، - دەلىنگەن ەدى حابارلامادا. ءبىراق بيزنەسمەن كەيىنىرەك ۇستالىپ، ۇقك ونىڭ ۇستالۋىنا قاتىستى پىكىر بىلدىرگەن ەدى.
سونداي-اق، وسىعان دەيىنگى سوت وتىرىسىندا بيزنەسمەن ءوز كىناسىن مويىنداعان ەدى.
مۇراتحان ءتوقمادي بىلتىر 12 ماۋسىمدا ۇستالعان بولاتىن. الماتىدا ارنايى قىزمەت «دەپۋتاتتىق كورپۋس» اتتى قىلمىستىق توپتى ۇستاۋ بويىنشا وپەراسيا وتكىزگەن ەدى. باق-تا شىققان اقپارات بويىنشا، بۇل قىلمىستىق توپتى «قازشىنىقۇرىلىس» زاۋىتىنىڭ يەسى مۇراتحان ءتوقمادي باسقارعان. سونداي-اق، پروكۋراتۋرا مالىمەتىنشە، ونىڭ ءۇيىن ءتىنتۋ كەزىندە قارۋ-جاراق پەن ءوق-دارى تابىلعان. ال تاياۋدا بيزنەسمەنگە قاتىستى ۇكىم شىققان. مۇراتحان ءتوقمادي 3 جىلعا باس بوستاندىعىنان ايىرىلعان بولاتىن.
پىكىر قالدىرۋ