ەۋرووداق رەسەيدىڭ 150 ازاماتى مەن 38 كومپانياسىنا قاتىستى سانكسيالار مەرزىمىن جارتى جىلعا ۇزارتتى. بۇل تۋرالى ەۋروپا كەڭەسىنىڭ رەسمي سايتىندا حابارلاندى.

شەكتەۋلەر ۋكراينانىڭ اۋماقتىق تۇتاستىعى مەن تاۋەلسىزدىگىنە ءقاۋىپ توندىرۋگە بايلانىستى سالىنعان. بريۋسسەلدىڭ پىكىرىنشە، رەسەيدە قالىپتاسقان جاعداي سانكسيانى وزگەرتۋگە مۇمكىندىك بەرمەيدى.

سانكسياعا ىلىنگەن رەسەيلىكتەر مەن كومپانيالاردىڭ اكتيۆتەرى بۇعاتتالىپ، ەو-عا ساپارلاۋىنا تىيىم سالىنادى.

ەو مەن اقش كرەملگە قارسى سانكسياسىن 2014 جىلى رەسەي قىرىمدى اننەكسيالاپ، دونباستاعى قاقتىعىسقا كيلىككەنى ءۇشىن سالعان. ماسكەۋ قىرىمدى رەسەيگە قوسىپ العانىن «تاريحي ادىلدىكتىڭ ورناۋى» دەپ اتايدى، ءبىراق ۋكرايناداعى سوعىسقا قاتىسى بارىن جوققا شىعارادى.