سونىمەن، جازۋشىلاردىڭ الماتىدا وتكەن قۇرىلتايىنا بارىپ قايتتىق. ساتيراعا قىزىقتى كەيىپكەرلەردى الىپ قايتتىق. «جازۋشىلار دا جىندى ەكەن عوي؟» دەگەن كوڭىل–كۇيدى پاپكىمىزگە سالىپ قايتتىق. مۇحتار شاحانوۆ پەن نۇرلان ورازالين تۋرا مەنىڭ كىشكەنتاي بالالارىم سياقتى ەكەن. ءبىرىن ءبىرى مازاقتاپ، تىلدەرىن شىعارىپ، «قورازسىڭ، شاكالسىڭ» دەستى.
قابدەش ءجۇمادىلوۆ دەگەن كوكەمىز قالامگەر ارىپتەسىنە قاراتا ءسوز سويلەپ: «سوۆەت زامانىندا «حالتۋرششيك» ەدى، مىنا زاماندا و توبا، ءسوز سەركەسى بولا شىعىپتى!» دەپ تاڭ قالعان بولدى. قايدان كەلگەنىن ءبىر قۇداي بىلەدى، ءبىر ماسكۇنەم ساحناعا شىعىپ كەتىپ: «جازۋشى ج-جولداستار، ءبىر ءان شىرقاپ بەرەيىنشى؟» دەپ قويمادى. ونى ساحنادان سۇيرەپ شىعاردى. ءبىراق ءبىر وكىنىشتىسى، توبەلەس بولمادى. نەگىزى توبەلەسۋ كەرەك ەدى. جەكپە- جەك! سوندا بىزدەر، دەلەگاتتار كىممەن توبەلەسەرىمىزدى بىلمەي ابىدىرىپ تۇرار ما ەدىك... شىركىن– اي، توبەلەس بولىپ كەتسە عوي؟ اۋزىم اڭقيىپ وتىرعان مەنىڭ اۋزىما ءبىر ءسابىز كىرىپ كەتسە. كۇرتىلدەتىپ جەي بەرسەم، توردە وتىرعان مارحابات اعامنىڭ ماڭدايىنا كارتوشكە سارت ەتە قالسا... كەندەباي اعامنىڭ بەتىنە پوميدور بىلش ەتە قالسا. زىليحا قارىنداسىمنىڭ يىعىنا سالات توگىلىپ كەتسە... نارماحان اعامىز بىرەۋدى ءبىر ۇرىپ قۇلاتىپ الىپ، ارتىنان قۋالاپ كەشىرىم سۇراپ جۇرسە. مومبەك جوق! سويتسەك، ءبىر جازۋشىنى ۇرىپ قۇلاتىپ، ۇستىنە ۇيمەلەگەندەردىڭ اراسىندا قالىپ كەتسە، ونى سيراعىنان تارتىپ، ارەڭ شىعارساق... امزەنى ءبىر جازۋشىلار ۇرىپ جاتسا، ونى اجىراتىپ جۇرسەك، ءبىر دراماتۋرگ ءحانبيبى اپامىزدىڭ جەلكەسىن قاسىپ جاتسا. بىرەۋدەن بىرەۋ قورقىپ، قاشىپ جاتسا، ءسويتىپ، دەلەگاتتاردىڭ ميى اشىپ جاتسا... شويبەك توبەلەسكە قاتىسپاي، اۋلاق جەردە ءشاي ءىشىپ وتىرسا، باقىتجان الديار "كوكەلەر نە ىستەپ كەتتى؟" دەپ جىلاپ تۇرسا... سەرىك ءجانابىل "توبەلەس قاشان بىتەدى؟" دەپ قۇدايدان مەيىرىم سۇراپ تۇرسا...
قۇداي-اي، مۇنىڭ بەتىن ارى ەتسىن، مۇنداي توبەلەس بولعان جوق، بولايىن، بولايىن دەپ قالدى. دەسەك تە، جاڭا ءتوراعا بولىپ بەلگىلى اقىن ۇلىقبەك ەسداۋلەتتىڭ سايلانعانىنا كەرەمەت قۋانىپ قايتتىم!
مۇحتار شەرىم
پىكىر قالدىرۋ