قازاقستان پرەزيدەنتى نۇرسۇلتان نازاربايەۆ استانادا وتكەن ورتالىق ازيا ەلدەرى باسشىلارىنىڭ باس قوسۋىندا رەسەيدەگى سايلاۋعا قاتىستى پىكىرىن ءبىلدىرىپ، بۇل كەزدەسۋ رەسەي، جۇڭگو سەكىلدى ءىرى ەلدەرمەن بايلانىسقا كەرى اسەرىن تيگىزبەيدى دەپ مالىمدەدى.
استانادا وتكەن ورتالىق ازيا ەلدەرى مەملەكەت باسشىلارىنىڭ كەزدەسۋى كەزىندە نازاربايەۆ 2017 جىلى قازاقستاننىڭ ورتالىق ايماق ەلدەرىمەن ەكسپورت كولەمى 35 پايىزعا ارتقانىن، مۇنداي كورسەتكىشكە "بۇرىن-سوڭدى قول جەتپەگەنىن" ايتتى.
ونىڭ سوزىنشە، ايماق ەلدەرى شەكارالارىندا جاڭا تەكسەرۋ جانە وتكىزۋ بەكەتتەرى اشىلىپ، كولىك قاتىناسى قالپىنا كەلىپ، شەكارا ماسەلەلەرى بىرتىندەپ رەتتەلىپ جاتىر.
"ارينە، ءبىز بۇل جەردە ورتالىق ازيا جانە قازاقستانمەن تۇيىقتالىپ قالامىز دەمەيمىن. ءبىزدىڭ جۇڭگو جانە رەسەي سياقتى ۇلكەن كورشىلەرىمىز بار. ولارمەن بەرىك بايلانىستامىز. ءبىز بۇل ىرگەلى كورشىلەرىمىزبەن، ۇلكەن نارىقپەن بەلسەندى ىنتىماقتاستىق ورناتقانبىز جانە ونى جالعاستىرعىمىز كەلەدى"،- دەدى نازارايەۆ.
قازاقستان پرەزيدەنتى ءسوزىنىڭ سوڭىندا رەسەيدەگى الداعى پرەزيدەنت سايلاۋىنىڭ جاقسى وتكەنىن قالايتىنىن جانە رەسەي پرەزيدەنتى ۆلاديمير پۋتينگە ساتتىلىك تىلەيتىنىن ايتتى.
رەسەيدە پرەزيدەنت سايلاۋى الداعى جەكسەنبى، 18 ناۋرىزدا وتەدى.
