ءبىلىم جانە عىلىم ۆيسە-مينيسترى بيبىگۇل اسىلوۆا 7 جاستاعى وقو تۇرعىنىنا قاتىستى سوت-مەديسينالىق ساراپتاما 2018 جىلدىڭ اقپان ايىندا جاسالعانىن حابارلادى، دەپ جازادى Qamshy.kz اقپارات اگەنتتىگى tengrinews.kz-كە سىلتەمە جاساپ.

«بىزدە دەپارتامەنتتىڭ رەسمي مالىمەتى بار، ءبىراق ونى جاريالاي المايمىز. وندا بالالاردىڭ جەكە دەرەكتەرى بار. بۇل – سوت-مەديسينالىق ساراپتاما. وڭتۇستىك قازاقستان وبلىسى بەرگەن رەسمي قۇجات»، - دەدى بيبىگۇل اسىلوۆا.

ساراپتامانىڭ اقپاندا جۇرگىزىلگەنىن ق ر بعم بالالار قۇقىعىن قورعاۋ كوميتەتىنىڭ ءتوراعاسى نۇربەك ورشىبەكوۆ تە راستادى.

ۆيسە-مينيستر جاعداي ۆەدومستۆا باقىلاۋىندا ەكەنىن ايتتى.

«العاشقى ءوتىنىش 15 اقپاندا كەلدى. سول ۋاقىتتان بەرى ءبىزدىڭ كوميتەت وقو ءبىلىم دەپارتامەنتىمەن بايلانىستا. ءوتىنىش ءبىلىم باسقارماسىنان كەلىپ ءتۇستى» دەدى اسىلوۆا.

ۆيسە-مينيستر ۆەدومستۆانىڭ كەش اقپاراتتانعانى ءبىلىم دەپارتامەنتىنىڭ جاۋاپكەرشىلىگىندە ەكەنىن ايتتى.

«بارلىق ساراپتاما جۇرگىزىلىپ بولعاننان كەيىن بۇل ماسەلەنى جاي قالدىرمايمىز»، - دەدى ۆيسە-مينيستر.