استانادا ءوز بالالارىن تەپكىنىڭ استىنا الىپ، قىزىنىڭ ميىن شايقالتقان اكە ءالى كۇنگە دەيىن جاۋاپقا تارتىلماعان. وسىلاي دەپ بىزگە شاعىم ايتىپ كەلگەن كوپبالالالى انا جانايقايىن جەتكىزدى. ول بۇرىنعى كۇيەۋىنىڭ ۇستىنەن بۇعان دەيىن دە تالاي مارتە شاعىمدانىپتى. الايدا، قۇزىرلى ورگاندار بەلگىسىز سەبەپتەرمەن ءىستى جاۋىپ تاستايتىنىن العا تارتادى. كۇيەۋىنەن ابدەن قورلىق كورگەن كەلىنشەك ونىڭ كىناسى دالەلدەنبەي، جەڭىل جازامەن قۇتىلىپ كەتە مە دەپ كۇدىكتەنىپ وتىر. بۇل تۋرالى Qamshy.kz اقپارات اگەنتتىگى «ەۋرازيا» ءبىرىنشى ارناسىنا سىلتەمە جاساپ حابارلايدى. 

گۇلنۇردىڭ وتباسىندا بولعان سۇمدىق وقيعا ءوزى جالداپ تۇراتىن ءۇيدىڭ سىرتقى بەينەكامەراسىنا جازىلىپ قالعان. سول كۇنى ول كۇيەۋىنە بالالارىمەن سەرۋەندەپ كەلۋگە رۇقسات بەرگەن ەكەن. بەينەجازبادا بەزبۇيرەك اكەنىڭ قارا «دجيپپەن» كەلگەنى كورىنەدى. ءبىراق نەگە ەكەنى بەلگىسىز كىشكەنتاي باۋىرلارىن كۇتىپ الۋعا كەلگەن 10 جاستاعى انەلدى كوكىرەگىنەن يتەرىپ جىبەرەدى. اكەسىنەن مۇندايدى كۇتپەگەن قىز ۇيىنە قاراي قاشىپ بارا جاتقاندا، ەر ادام ونىڭ سوڭىنان قۋىپ سوققىنىڭ استىنا الىپتى. كەيىن قارىنداسىنىڭ داۋىسىن ەستىپ سىرتقا شىققان 16 جاستاعى ۇلكەن ۇلىن دا تەپكىلەپ تاستايدى.    

«مەنى تاڭ قالدىرعانى، بالامدى سوققىعا جىققان اكە ءالى كۇنگە دەيىن قاماۋعا الىنباعان، قۇزىرلى ورگاندار، ونى ءتىپتى، جاۋاپ الۋعا شاقىرماعان سىڭايلى.  تەك، «قالادا جوق، سول سەبەپتى شاقىرتپادىق» دەيدى. سوندا تۋعان بالاسىن تەپكىلەپ، ميىن شايقالتقان ادامنان پوليسيا قالايشا ءالى تۇسىنىكتەمە دە الماعان؟» - قورلىق كورگەن كەلىنشەك گۇلنۇر.

12 جاستاعى جەتكىنشەكتىڭ مەكتەپتەن قالىپ، اۋرۋحانادا جاتقانىنا بۇگىن 6 كۇن بولىپتى. دارىگەرلەر وعان ميى شايقالعان دەگەن دياگنوز قويعان. اق حالاتتىلار كىشكەنتاي قىزدىڭ ساۋىعىپ كەلە جاتقانىن جەتكىزدى. ودان بولەك، ماماندار سوڭعى كەزدەرى ۇلكەندەردەن ءجابىر كورىپ، ەمحاناعا تۇسەتىن بالالاردىڭ سانى ارتىپ كەلە جاتقانىن دا ايتىپ قالدى.  

«بىزدە قازىرگى ۋاقىتتا سوققىدان، ءجابىر كورگەن بالالار ءجيى كەلىپ تۇسەدى. ونداي بالالار ەمحاناعا كەلىپ تۇسكەن بەتتە، 102-گە حابارلايمىز. ولار كەلىپ ماسەلەنى شەشۋگە تىرىسادى. كەيبىر بالالار كەلەدى، توسەكتەن، ۇستەلدەن قۇلاپ تۇسكەن. ول ەندى اتا-اناسىنىڭ جاۋاپسىزدىعىنان» - دەيدى №2 بالالار اۋرۋحاناسى، نەيروحيرۋرگيا ءبولىمىنىڭ مەڭگەرۋشىسى ەربول قوزىباعاروۆ.

ءوزى مەن بالالارىنىڭ بولاشاعى ءۇشىن ءجۇزىن كورسەتكىسى كەلمەگەن گۇلنۇر كۇيەۋىمەن 15 جىل بويى ءبىر شاڭىراقتىڭ استىندا ءومىر ءسۇردىم دەيدى. ءبىراق سودان بەرى كورگەن كۇنىم قورلىق دەپ ەگىلەدى. بولماشى نارسە ءۇشىن جۇدىرىق الا جۇگەرەتىن كۇيەۋىنىڭ مىنەزىنە بالالارى ءۇشىن ءتوزىپ كەلىپتى. 

 «بارلىعى مەنى ءقازىر ايىپتاۋعا ءازىر. نەگە ونىڭ سونداي مىنەزىن بىلگەندە، ەرتەرەك اجىراسىپ كەتپەدىڭ دەيدى. ءبىراق مەن بالالارىم اكەسىز وسپەسىن دەپ، مۇمكىندىگىنشە ونىڭ جاعىنا شىعاتىن ەدىم. ءبارى بەكەر ەكەن. ماعان قول كوتەرسە مەيلى، ءبىراق تۋعان پەرزەنتىن تەپكىلەپ تاستاعانىن قالاي كەشىرۋگە بولادى؟» - قورلىق كورگەن كەلىنشەك گۇلنۇر.

وسى وقيعاعا قاتىستى قالالىق ىشكى ىستەر دەپارتامەنتىنە  حابارلاسقانىمىزدا، ولار ورىن العان جاعدايعا بايلانىستى سوتقا دەيىنگى تەرگەۋ ءجۇرىپ جاتقانىن حابارلادى. سوندىقتان "باسقا مالىمەتتەردى جاريالاي المايمىز" دەگەننەن ارىگە اسپادى. ودان بولەك، انەلدىڭ جاعدايىن ەلىمىزدىڭ بالا قۇقىقتارى جونىندەگى ۋاكىلى زاعيپا بالييەۆا دا كورىپ كەلىپتى. 

«تەرگەۋشىلەرمەن بىرگە باردىم. قىز ەشتەڭە ايتپايدى. بالا عوي. اكەسىن جاقسى كورەدى. ەشقانداي باعا بەرە المايمىن. ءبىراق ءقازىر جاعدايى جاقسى. ەمدەلىپ جاتىر» - دەيدى ق ر پارلامەنتى ءماجىلىسىنىڭ دەپۋتاتى، ق ر بالا قۇقىقتارى جونىندەگى ۋاكىل زاعيپا بالييەۆا.

ءقازىر بەس بالاسىمەن پاتەر جالداپ كۇنەلتىپ وتىرعان كەلىنشەك  «دجيپ» ءمىنىپ جۇرگەن بەزبۇيرەك اكەنىڭ اليمەنت تولەمەۋى ءۇشىن ايلىعىم 40 مىڭ تەڭگە دەپ جالعان انىقتاما جاساتىپ العانىن ايتادى. ءبىراق گۇلنۇرعا ول ماڭىزدى ەمەس. كەلىنشەك ءوزى مەن بالالارىن جايىنا قالدىرىپ، ۇلى-قىزىنا قول كوتەرگەن اكە زاڭ الدىندا جاۋاپ بەرسە دەيدى.