ىمىرت ۇيىرىلگەندە قازۇۋ (ول ۋاقىتتا قازمۋ) قالاشىعىنداعى جاستار سىرتقا شىعۋعا قورقاتىن. سەبەبى جارتى جىل ىشىندە بۇل جەردە زورلانىپ ولتىرىلگەن 3 قىزدىڭ ءمايىتى تابىلعان.

بۇل سوۆەت وداعى ىدىراپ جاتقان كەز ەدى. ەلىمىزدەگى ەڭ ءىرى ۋنيۆەرسيتەتتى ۇرەي جايلادى. قىز-كەلىنشەكتەر ەمىن-ەركىن جۇرۋدەن قالدى.

قالاشىقتا پايدا بولعان «مانياك» تۋرالى قاۋەسەت جاستار اراسىندا گۋلەپ كەتتى.

ءبىرىنشى قۇرباننىڭ ءمايىتىن ۋنيۆەرسيتەتكە كورشىلەس كوپقاباتتى ۇيدەن ويىن بالالارى تاۋىپ العان. باۋىزدالعان قىزدى كورگەن التى جاستاعى بالا تالايعا دەيىن سويلەي الماي قالىپتى. جاس قىز زورلانعان، سومكەسى تونالعان. باسىندا ميليسيا قانداي دا ءبىر «مانياك» جايلى ويلاماعان دا.

ماماندار قىزدىڭ مايىتىنە ساراپتاما جاساپ، قىلمىسكەردىڭ قان توبىن انىقتادى. قانى II توپقا جاتاتىنىن بىلگەن سوڭ ميليسيا وسى ايعاقتى نەگىزگە الىپ، بۇرىن-سوڭدى جاۋاپقا تارتىلعانداردى تەكسەرەدى. الايدا ودان ناتيجە شىقپايدى.

ءبىر اي وتكەن سوڭ الماتىنىڭ ءىىب قىزمەتكەرلەرى ىىم-نەن كومەك سۇرايدى. ويتكەنى تاعى ءبىر قىز ءىز-تۇزسىز جوعالعان. قازۇۋ توڭىرەگىن شارلاعان ميليسيا ەشتەڭە تابا المايدى. بۇل قىلمىستارعا «مانياكتىڭ» قاتىسى بارى ايقىن بولادى.

قانىشەردىڭ كىم ەكەنىن انىقتاۋ وڭايعا سوقپادى، بۇل پروسەسس تىم ۇزاققا سوزىلدى. ميليسيا رەكتوراتتان بۇرىنعى ستۋدەنتتەر مەن وقۋدان شىعارىلعانداردىڭ ءتىزىمىن الىپ، ەگجەي-تەگجەيلى زەرتتەيدى. ۋنيۆەرسيتەت وقىتۋشىلارى مەن قىزمەتكەرلەرىنە دەيىن كۇدىككە ىلىنەدى. ءىز كەسۋشىلەر 7000-عا جۋىق مەديسينالىق كارتانى تەكسەرىپ شىققان.

ءبىر نارسە انىق ەدى – قىلمىسكەر ۋنيۆەرسيتەت ماڭايىندا تۇرادى جانە ونىڭ اۆتوكولىگى جوق.

ءتىپتى، پوليسيا مىناداي قيتۇرقى ارەكەتكە بارعان. ميليسيانىڭ بەس قىزمەتكەرى ايەلدەرشە كيىنىپ، بەتتەرىن ارلەپ، ۋنيۆەرسيتەت ماڭايىندا سەرۋەندەپ جۇرگەن. الايدا قىلمىسكەر بۇل تۇزاققا دا تۇسپەيدى.

ءبىر كۇنى ميليسيا قىزمەتكەرلەرى كەزەكتى ءبىر قۇرباننىڭ ءمايىتىن وقيعا ورنىندا تەكسەرىپ جاتقان كەزدە سىرتتارىنان باقىلاپ تۇرعان ەر ادامدى بايقايدى. ول بۇرىن «زورلاۋ» بابىمەن سوتتالعان سەرگەي مانجيكوۆ دەگەن ازامات ەدى. الايدا ونىڭ قان توبى قىلمىسكەردىكىمەن سايكەس كەلمەگەندىكتەن، ميليسيا سەرگەيدى كۇدىكتى رەتىندە قاراستىرا المايدى.

بىرنەشە كۇن وتكەن سوڭ س. مانجيكوۆ پوليسيانى ءوزىنىڭ تۇرعىلىقتى جەرىنە شاقىرىپ، ءبىر جاعىمسىز ءيىستىڭ مازالايتىنىن ايتادى. ونىڭ ۇيىنە بارعان قۇقىق قورعاۋ قىزمەتكەرلەرى ەشقانداي ءيىس شىقپايتىنىن انىقتاپ، مانجيكوۆتىڭ اقىل-ەسى كەم دەگەن ويعا كەلەدى.

وسى ۋاقىت ارالىعىندا تاعى ءبىر قىلمىس بولادى. ادەتتەگىدەي، تاعى ءبىر قىز زورلانىپ، ولتىرىلگەن. ءبىراق ەشقانداي ايعاق تابىلمايدى.

ءسويتىپ جۇرگەندە پوليسياعا ءبىر جۇپ حابارلاسادى. ولاردىڭ ايتۋىنشا، بەلگىسىز ەر ادام ەكەۋىنە شابۋىل جاساعان. كەزدەسۋگە كەشىگىپ كەلگەن جىگىت ءوزىنىڭ قۇربىسىنا بىرەۋدىڭ  ءتيىسىپ جاتقانىن كورگەن. سول جەردە توبەلەس باستالىپ، قىلمىسكەر جىگىتتى پىشاقتاپ، قاشىپ كەتكەن. جابىرلەنگەن قىز وزىنە شابۋىلداعان ەر ادامدى سۋرەتتەپ بەرگەندە پوليسيا ونى بىردەن تانيدى. قىلمىسكەر – ميليسيانىڭ كوز الدىندا جۇرگەن سەرگەي مانجيكوۆ ەدى.

ونىڭ مەكەن-جايىن بىلەتىن ءتارتىپ ساقشىلارى قىلمىسكەردى بىردەن ۇيىندە تۇتقىندايدى. باسىندا ءوزىنىڭ كىناسىن مويىنداماعان ول تەك قان توبى قىلمىسكەردىكىمەن سايكەس كەلگەننەن كەيىن عانا بارلىق شىندىقتى جايىپ سالادى.

مانجيكوۆتىڭ قان توبى II ەمەس، III بولىپ شىققان. قاتە جاسالعان ءبىرىنشى ساراپتامانىڭ كەسىرىنەن تاعى ءبىر قىز قۇربان بولدى.

قانىشەردىڭ ۇيىندە ءتىنتۋ جۇرگىزگەن ميليسيا قىزمەتكەرلەرى ولگەن قىزداردىڭ زاتتارىن تاپقان. قىلمىسكەر، ءتىپتى، ءوز قۇرباندارىنىڭ اشەكەيلەرىن اپكەلەرىنە، سۇيىكتىسىنە سىيلاعان.

سوت وتىرىسىندا قىلمىسكەر كەشىرىم سۇراپ جىلاپ، تىزەرلەپ تۇرىپ جالبارىنعان كورىنەدى. الايدا سوت ونى ءولىم جازاسىنا كەسەدى. سەرگەي مانجيكوۆ 1993 جىلى الماتىداعى № 1 تەرگەۋ اباقتىسىنىڭ پودۆالىندا اتىلدى.