Ninety One توبىنىڭ ءانشىسى «نۇر وتان» پارتياسىنا قاراستى «جاس وتان» جاستار قاناتىنىڭ IV سەزىندە Q-Pop مۋزىكالىق جانرىن قولداپ پىكىر ءبىلدىردى.

«ءوز ارىپتەستەرىمنىڭ اتىنان جينالعان قاۋىمنىڭ الدىندا پىكىر ءبىلدىرۋ مۇمكىندىگى بەرىلىپ تۇرعانىنا قۋانىشتىمىن. بىردەن ساۋالعا كوشەيىك: مۋزىكا دەگەن نە؟ بۇل سۇراقتىڭ جاۋابىن تاپقان مەنىڭ ءومىرىم تۇبەگەيلى وزگەردى. مەن Ninety One توبىنىڭ ءانشىسى بولدىم. الايدا توپ قۇرىلعالى قيىندىقتار مەن تۇسىنىسپەۋشىلىكتەر كوبەيىپ كەتتى. ەلىمىزدىڭ كوپ قالالارى ءبىزدىڭ ونەر كورسەتۋىمىزگە قارسى بولدى. ءبىز XXI عاسىر مەن قازاق مەنتاليتەتى سايكەس كەلمەيتىن ستەرەوتيپپەن توعىستىق»، - دەدى دۋلات مۇحامەتقالييەۆ.

ول باتىس مادەنيەتىن مىسالعا الىپ، جاستاردىڭ تالابى مەن قالاۋىنا توقتالىپ ءوتتى.

«ءبىز مادەنيەتىمىزدىڭ ساقتالعانىن، ءارى الەمگە ۇنامدى بولعانىن قالاساق، جاستاردىڭ قالاۋىنا جۇگىنگەنىمىز ابزال. مادەنيەتىمىزدى زاماناۋي ترەندكە قاراي بۇرۋىمىز كەرەك. Ninety One بۇگىندە Q-Pop ستيلىنە باعىت الدى، ونداعى ماقساتى – قازاقتىڭ باي ءتىلىن الەمگە تانىتۋ. ءبىزدىڭ اندەر لاتىنشا شىعىپ، شەت ەلدىك تىڭدارماندارىمىز پايدا بولدى. ولار ءتىلىمىزدى ۇيرەنىپ، قازاق تىلىندە ۆيدەو حابارلاما جىبەرەتىن بولدى»، - دەدى ءانشى.

ءانشىنىڭ ايتۋىنشا، وڭتۇستىك كورەيادا K-Pop-قا مەملەكەتتىك دارەجەدە قولداۋ تانىتادى ءارى K-Pop ارقىلى مەملەكەتكە جىلىنا بەس ميلليارد دوللار كولەمىندە تابىس تۇسەدى. مۇحامەتقالييەۆ وسى جانر ارقىلى قازاقستاننىڭ دا ءدال سونداي تابىس كوزىنە كەنەلۋى مۇمكىن ەكەنىن جەتكىزدى.