كليماتولوگتار الداعى ۋاقىتتا ساحارانىڭ جويىلۋى مۇمكىن ەكەنىن ايتادى.

جاھاندىق جىلىنۋ مەن تابيعي كليماتتىق اۋىتقۋلاردىڭ ناتيجەسىندە ساحارا شەكاراسى سوڭعى ءجۇز جىلدا 10%-عا كەڭەيە تۇسكەن. بۇل قۇبىلىس سولتۇستىك افريكاعا كەرى اسەرىن تيگىزىپ جاتىر، دەپ جازادى Qamshy.kz اقپارات اگەنتتىگى.

«ساحارا ءشولىنىڭ ۇلعايۋى اسىرەسە چاد وزەنىنىڭ تارىلۋىنا اكەپ سوقتى. ءشول دالا شەكاراسى وڭتۇستىككە قاراي ىعىسىپ، وزەن تارتىلا باستاعان. قۇبىلىستىڭ ءىزى تەك افريكانىڭ ورتالىق بولىگىندە ەمەس، بارلىق وڭىردە بايقالدى. ءبىز وزەن سۋىنىڭ اجەپتەۋىر ازايعانىن سەنىمدى تۇردە ايتا الامىز»، - دەدى اقش-تاعى مەريلەند ۋنيۆەرسيتەتىنىڭ كليماتولوگى سۋمانت نيگام.

وسىدان 10 مىڭ جىل جانە شامامەن 30-50 مىڭ جىل بۇرىن ءشولدىڭ ورنىندا ءتۇرلى وسىمدىكتەرگە تولى جاسىل القاپ بولعان. انتروپولوگتاردىڭ پىكىرىنشە، جاسىل ساحارا ادامداردىڭ افريكانى تاستاپ، جەر بەتىنە جايىلۋىنا سەبەپ بولدى.

بۇگىندە كليماتولوگتار ساحارانىڭ جويىلىپ كەتۋى مۇمكىن ەكەنىن ايتىپ دابىل قاعۋدا. وعان جاۋىن-شاشىننىڭ ارتۋى سەبەپ بولۋى مۇمكىن. جاھاندىق جىلىنۋ كۇشەيىپ، مۋسسونداردى ساحارا ايماعىنا جانە ساحەل جارتى ءشول دالاسىنا قاراي ىعىستىرادى. سونىڭ ناتيجەسىندە عاسىر اياعىنا تامان ەكى ءوڭىر دە ساۆانناعا اينالادى دەپ بولجايدى عالىمدار.

نيگام مەن ونىڭ ارىپتەسى ناتالي توماستىڭ ايتۋىنشا، ازىرگە ءبارى كەرىسىنشە بولادى. ساحارانىڭ ايماعى ۇلعايىپ، سولتۇستىك قانا ەمەس، وڭتۇستىك وڭىرلەردى دە جايلاۋى مۇمكىن.